ಬಹುತೇಕ ಕಟ್ಟಡ ಸಕ್ರಮಕ್ಕೆ ಅನರ್ಹ!

ಬೆಂಗಳೂರು: ವಸತಿ ಕಟ್ಟಡ ನಿರ್ಮಾ­ಣದಲ್ಲಿ ಗರಿಷ್ಠ ಶೇ 50ರಷ್ಟು ನಿಯಮ ಉಲ್ಲಂಘಿಸಿದ್ದರೂ ಅದನ್ನು ಸಕ್ರಮಗೊಳಿ­ಸುವುದಾಗಿ ನಗರಾಭಿವೃದ್ಧಿ ಇಲಾಖೆ ಹೇಳಿದೆ. ಆದರೆ, ‘ಅಕ್ರಮ ಸಕ್ರಮ’ ನಿಯ­ಮಗಳ ಪ್ರಕಾರ ಸಕ್ರಮಕ್ಕೆ ಅರ್ಹವಾಗುವ ಕಟ್ಟಡಗಳು ಎಷ್ಟು?
ನಿಖರವಾಗಿ ಇಷ್ಟೇ ಎಂದು ಹೇಳಲು ಇಲಾಖೆ ಬಳಿ ಮಾಹಿತಿ ಇಲ್ಲ. ಈ ಸಂಬಂಧ ಸಮೀಕ್ಷೆ ಕೂಡ ಆಗಿಲ್ಲ. ಆದರೆ, ಬೆಂಗಳೂರು ಸೇರಿದಂತೆ ರಾಜ್ಯದ ನಗರ,  ಪಟ್ಟಣ ಪ್ರದೇಶಗಳಲ್ಲಿ ಶೇ 50ಕ್ಕಿಂತ ಕಡಿಮೆ ನಿಯಮ ಉಲ್ಲಂಘಿಸಿ ನಿರ್ಮಿಸಿರುವ ಕಟ್ಟಡಗಳು ಸಿಗುವುದು ಅಪರೂಪ ಎನ್ನುತ್ತವೆ ನಗರಾಭಿವೃದ್ಧಿ ಇಲಾಖೆ ಮೂಲಗಳು.

ಬೆಂಗಳೂರು ನಗರದಲ್ಲಿನ 18 ಲಕ್ಷ ವಸತಿ ಕಟ್ಟಡಗಳ ಪೈಕಿ ಶೇ 95ರಷ್ಟು ಕಟ್ಟಡಗಳನ್ನು ನಿಯಮ ಉಲ್ಲಂಘಿಸಿಯೇ ನಿರ್ಮಿಸಲಾಗಿದೆ. ಅದೂ ಶೇ 50ಕ್ಕಿಂತ ಹೆಚ್ಚು ಪ್ರಮಾಣದ ಉಲ್ಲಂಘನೆ ಆಗಿ­ರುವ ಕಾರಣ ಬಹುತೇಕ ಆಸ್ತಿಗಳು ಸಕ್ರಮದ ವ್ಯಾಪ್ತಿಗೆ ಬರುವುದಿಲ್ಲ ಎಂದು ಹೆಸರು ಹೇಳಲಿಚ್ಛಿಸದ ಅಧಿಕಾರಿ­ಯೊಬ್ಬರು ಹೇಳಿದರು.

‘ಬೆಂಗಳೂರು ನಗರದಲ್ಲಿ ನಿವೇಶನಕ್ಕೆ ಸಿಕ್ಕಾಪಟ್ಟೆ ಬೆಲೆ. ಈ ಕಾರಣದಿಂದ ಕಡಿಮೆ ವಿಸ್ತೀರ್ಣದ (20X30, 30X40 ಅಡಿ) ನಿವೇಶನಗಳಲ್ಲಿಯೇ ಹೆಚ್ಚು ಕಟ್ಟಡಗಳಿವೆ. ನಿವೇಶನ ಚಿಕ್ಕದಿರುವ ಕಾರಣ ಅದ­ರಲ್ಲಿ ನಿಯಮ ಪ್ರಕಾರ ಸುತ್ತ ಸ್ಥಳ (ಸೆಟ್‌ಬ್ಯಾಕ್‌) ಬಿಟ್ಟು  ಕಟ್ಟಿದರೆ ವಾಸಕ್ಕೆ ಸಿಗು­ವುದು ಕಡಿಮೆ ಜಾಗ ಎನ್ನುವ ಅಭಿಪ್ರಾಯ ಬಹುತೇಕರದು. ಹೀಗಾಗಿ  ನಿಗದಿತ ಸೆಟ್‌ಬ್ಯಾಕ್‌ ಬಿಟ್ಟವರು ಬಹಳ ಕಡಿಮೆ’ ಎನ್ನುವುದು ಅವರ ವಿಶ್ಲೇಷಣೆ.

ಇದು ಉಲ್ಲಂಘನೆ: ‘ಬೆಳಗಾವಿಯಲ್ಲಿ  30X40 ಅಡಿ ನಿವೇಶನದಲ್ಲಿ ಮನೆ ಸುತ್ತಲೂ ಕನಿಷ್ಠ 3 ಅಡಿ 3 ಇಂಚು ಜಾಗ ಬಿಡಬೇಕು. ಇದು ಸ್ಥಳೀಯ ನಗರಾಭಿವೃದ್ಧಿ ಪ್ರಾಧಿಕಾರದ ನಿಯಮ. ಒಂದು ವೇಳೆ ಕೇವಲ ಎರಡು ಅಡಿ ಜಾಗ ಬಿಟ್ಟಿದ್ದರೂ ಅದನ್ನು ಸಕ್ರಮಕ್ಕೆ ಪರಿಗಣಿಸಬಹುದು.  ಆದರೆ ಒಂದೂವರೆ ಅಡಿ ಜಾಗ ಬಿಟ್ಟು ಕಟ್ಟಿದರೆ ಸಕ್ರಮ ಮಾಡಲು ಅಲ್ಲಿ ಅವಕಾಶ ಇಲ್ಲ. ಕಾರಣ ಅವು ಶೇ 50ಕ್ಕಿಂತ ಹೆಚ್ಚು ಉಲ್ಲಂಘನೆಯಾದಂತಾಗುತ್ತದೆ’ ಎಂದು ಉದಾಹರಣೆ ನೀಡುತ್ತಾರೆ ನಗರ ಮತ್ತು ಗ್ರಾಮಾಂತರ ಯೋಜನಾ ನಿರ್ದೇಶನಾಲಯದ ನಿರ್ದೇಶಕ ಎಸ್‌.ಬಿ.ಹೊನ್ನೂರ್‌.