ಬಾಸ್ಟನ್(ಅಮೆರಿಕ)(ಪಿಟಿಐ): ಸುಪ್ರಸಿದ್ಧ ಬಾಸ್ಟನ್ ಮ್ಯಾರಥಾನ್ ಅಂತಿಮ ರೇಖೆಯ ಬಳಿ ಪತ್ತೆಯಾದ ಎರಡು ಅಪರಿಚಿತ ಬೆನ್ನುಚೀಲಗಳು (ಬ್ಯಾಕ್ಪ್ಯಾಕ್) ಬಾಂಬ್ ಸ್ಫೋಟದ ಭಯ ಹುಟ್ಟಿಸಿದ್ದರಿಂದ ಜನರು ಆ ಪ್ರದೇಶದಿಂದ ಓಡಿಹೋದ ಘಟನೆ ಬುಧವಾರ ನಡೆದಿದೆ.
ಕೆಲಕಾಲ ಆತಂಕಕ್ಕೆ ಕಾರಣವಾದ ಈ ಘಟನೆ ಸರಿಯಾಗಿ ಒಂದು ವರ್ಷದ ಹಿಂದೆ ಇಲ್ಲಿ ಘಟಿಸಿದ್ದ ಭಯೋತ್ಪಾದಕ ದಾಳಿಯನ್ನು ನೆನಪಿಸಿತು.
‘ಈ ಸಂಬಂಧ ಒಬ್ಬ ವ್ಯಕ್ತಿಯನ್ನು ಬಂಧಿಸಲಾಗಿದ್ದು, ಮುನ್ನೆಚ್ಚರಿಕಾ ಕ್ರಮವಾಗಿ ಬಾಯ್ಲ್ಸ್ಟೋನ್ ಬೀದಿಯಲ್ಲಿ ಪತ್ತೆಯಾದ ಬೆನ್ನುಚೀಲಗಳನ್ನು ವಶಪಡಿಸಿಕೊಳ್ಳಲಾಗಿದೆ’ ಎಂದು ಬಾಸ್ಟನ್ ಪೊಲೀಸರು ತಿಳಿಸಿದ್ದಾರೆ. ಚೀಲವನ್ನು ತಂದ ವ್ಯಕ್ತಿ ಬರಿಗಾಲಿನಲ್ಲಿದ್ದ. ದೊಡ್ಡ ಕಪ್ಪು ಮುಖಪರದೆಯನ್ನು ಧರಿಸಿದ್ದ. ಮತ್ತು ‘ಬಾಸ್ಟನ್ ಸ್ಟ್ರಾಂಗ್’ ಎಂದು ಕಿರುಚುತ್ತಿದ್ದ. 25 ವರ್ಷ ವಯಸ್ಸಿನ ಅವನನ್ನು ಕಯ್ವೊನ್ ಎಡ್ಸನ್ ಎಂದು ಗುರುತಿಸಲಾಗಿದೆ. ಎಂದು ಸಿಬಿಎಸ್ ವರದಿ ಮಾಡಿದೆ.