ಲಂಡನ್ (ಪಿಟಿಐ): ಲಂಡನ್ ಮೂಲದ ಕಂಪೆನಿಯೊಂದು ತಾನು ಉತ್ಪಾದಿಸಿದ ಬರ್ಗರ್ ಮತ್ತು ಚಿಪ್ಸ್ಗಳನ್ನು ಬಾಹ್ಯಾಕಾಶಕ್ಎಕ ಕಳುಹಿಸಿದೆ. ಇದೇ ಮೊದಲ ಬಾರಿ ಬಾಹ್ಯಾಕಾಶಕ್ಕೆ ಬರ್ಗರ್ ಮತ್ತು ಚಿಪ್ಸ್ ಕಳುಹಿಸಲಾಗಿದೆ ಎಂದು ಕಂಪೆನಿ ಹೇಳಿದೆ.
ದೊಡ್ಡ ಮನೆಯ ಗಾತ್ರದ ಹೀಲಿಯಂ ಬೆಲೂನ್ನಲ್ಲಿ ಇರಿಸಿ ಬರ್ಗರ್ ಮತ್ತು ಚಿಪ್ಸ್ಗಳನ್ನು ಭೂಮಿಯಿಂದ 1.12 ಲಕ್ಷ ಅಡಿ ಎತ್ತರಕ್ಕೆ ಕಳುಹಿಸಲಾಗಿದೆ. ಕಂಪೆನಿ ಇದಕ್ಕೆ ಸುಮಾರು 2 ಲಕ್ಷ ಖರ್ಚು ಮಾಡಿದೆ.
‘ಚೋಸನ್ ಬನ್’ ಎಂಬ ಹೆಸರಿನ ಕಂಪೆನಿಯ ಸ್ಥಾಪಕರಾದ ಶೋವೆಲ್ ಮತ್ತು ಪೀಟರ್ ಶರ್ಮನ್ ಇಬ್ಬರಿಗೂ ವಿಜ್ಞಾನದಲ್ಲಿ ಬಹಳ ಆಸಕ್ತಿ. ಆಗಸ್ಟ್ನಲ್ಲಿಯೂ ಬಾಹ್ಯಾಕಾಶಕ್ಕೆ ಬರ್ಗರ್ ಕಳುಹಿಸಲು ಇವರು ಯತ್ನಿಸಿದ್ದರು. ಆದರೆ ಆ ಯತ್ನ ವಿಫಲವಾಗಿತ್ತು.
ಬಾಲಕಿ ಪತ್ತೆಗೆ ಫೇಸ್ಬುಕ್
ಶಾರ್ಜಾ (ಐಎಎನ್ಎಸ್): ಶಾರ್ಜಾದಲ್ಲಿ ನಾಪತ್ತೆಯಾದ ಭಾರತ ಮೂಲದ ಎಂಟು ವರ್ಷದ ಬಾಲಕಿಯನ್ನು ಸಾಮಾಜಿಕ ಜಾಲತಾಣಗಳು ಹುಡುಕಿಕೊಟ್ಟ ಕಥೆಯಿದು. ಶಾರ್ಜಾದ ಅಲ್ ಮುಸಲ್ಲಾ ಪ್ರದೇಶದಲ್ಲಿ ಮೂರನೇ ತರಗತಿ ಓದುತ್ತಿರುವ 8 ವರ್ಷದ ಬಾಲಕಿ ಶನಿವಾರ ಮನೆಯಿಂದ ನಾಪತ್ತೆಯಾಗಿದ್ದಳು. ಆ ಸಮಯದಲ್ಲಿ ಬಾಲಕಿಯ ತಾಯಿ ಸಂಜೆ ಪಾಳಿಯ ಕೆಲಸಕ್ಕೆ ತೆರಳಿದ್ದರೆ, ತಂದೆ ಒಂದು ವರ್ಷದ ಮಗುವಿನೊಂದಿಗೆ ನಿದ್ರಿಸುತ್ತಿದ್ದರು.
ಮನೆಯಿಂದ ಹೊರಗೆ ಬಂದಿದ್ದ ಬಾಲಕಿ, ಅದೇ ಪ್ರದೇಶದ ಜೋಯ್ ಆಲುಕ್ಕಾಸ್ ಚಿನ್ನದ ಅಂಗಡಿ ಬಳಿ ಓಡಾಡುತ್ತಿದ್ದಳು. ಇದನ್ನು ಗಮನಿಸಿದ ಸಾರ್ವಜನಿಕರು ಫೇಸ್ಬುಕ್, ವಾಟ್ಸ್ಆ್ಯಪ್ ಮೂಲಕ ಬಾಲಕಿಯ ಚಿತ್ರಗಳನ್ನು ರವಾನಿಸಿದ್ದರು. ಇದನ್ನು ಗಮನಿಸಿದ ಬಾಲಕಿಯ ತಂದೆ ಕೂಡಲೇ ಬಾಲಕಿಯನ್ನು ಪತ್ತೆ ಮಾಡಿ ಮನೆಗೆ ಕರೆದೊಯ್ದರು. ತಮ್ಮ ಮಗಳ ಬಗ್ಗೆ ಮಾಹಿತಿ ನೀಡಿದ ಜನರಿಗೆ ಅವರು ಧನ್ಯವಾದ ಸಲ್ಲಿಸಿದ್ದಾರೆ.