ಬೆಂಗಳೂರು: ಕೆಂಗೇರಿಯಲ್ಲಿರುವ ಬಿಎಂಟಿಸಿ 12ನೇ ಡಿಪೊ ಕಚೇರಿಯಲ್ಲಿ ದುಷ್ಕರ್ಮಿಗಳು ಭಾನುವಾರ ರಾತ್ರಿ ರೂ2.29 ಲಕ್ಷ ಕಳವು ಮಾಡಿದ್ದಾರೆ.
ಡಿಪೊ ವ್ಯವಸ್ಥಾಪಕ ರವೀಂದ್ರ ಅವರು ನಿರ್ವಾಹಕರು ಕೊಟ್ಟಿದ್ದ ಪ್ರಯಾಣಿಕರಿಂದ ಸಂಗ್ರಹವಾದ ರೂ3.57 ಲಕ್ಷವನ್ನು ಸೂಟ್ಕೇಸ್ನಲ್ಲಿ ಹಾಕಿ, ಕಟ್ಟಡದ ಲೆಕ್ಕಪತ್ರ ವಿಭಾಗದ ಕೊಠಡಿಯಲ್ಲಿಟ್ಟು ಮನೆಗೆ ಹೋಗಿದ್ದರು.
ರಾತ್ರಿ ಆ ಕೊಠಡಿಯ ಬೀಗ ತೆರೆದು ಒಳ ನುಗ್ಗಿರುವ ಕಳ್ಳರು ಸೂಟ್ಕೇಸ್ನಲ್ಲಿದ್ದ ಹಣದಲ್ಲಿ ರೂ 2.29 ಲಕ್ಷ ದೋಚಿ ಪರಾರಿಯಾಗಿದ್ದಾರೆ. ಉಳಿದ ಹಣ ಸೂಟ್ಕೇಸ್ನಲ್ಲೇ ಇದೆ. ರವೀಂದ್ರ ಅವರು ಸೋಮವಾರ ಕಚೇರಿಗೆ ಬಂದಾಗ ಹಣ ಕಳವಾಗಿರುವುದು ಗೊತ್ತಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಕಳ್ಳರು ಕೊಠಡಿ ಅಥವಾ ಸೂಟ್ಕೇಸ್ನ ಬೀಗವನ್ನು ಒಡೆದಿಲ್ಲ. ಬದಲಿಗೆ ಕೀಯಿಂದ ಬೀಗ ತೆರೆದು ಹಣ ದೋಚಿದ್ದಾರೆ. ಡಿಪೊ ಸಿಬ್ಬಂದಿಯೇ ಈ ಕೃತ್ಯ ಎಸಗಿರುವ ಶಂಕೆ ಇದೆ ಎಂದಿದ್ದಾರೆ.