ನೊಯ್ಡಾ: ಬಿಎಂಡಬ್ಲ್ಯು 'ಆಲ್ ನ್ಯೂ ಎಂ3 ಸೆಡಾನ್' ಮತ್ತು 'ಆಲ್ ನ್ಯೂ ಎಂ4 ಕ್ಯುಪೆ' ಐಷಾರಾಮಿ ಕಾರುಗಳು ಗುರುವಾರ ಭಾರತೀಯ ಮಾರುಕಟ್ಟೆಗೆ ಕಾಲಿಟ್ಟವು. ಇಲ್ಲಿನ ಬುದ್ಧ ಇಂಟರ್ ನ್ಯಾಷನಲ್ ಸರ್ಕಿಟ್ ನಲ್ಲಿ ಮಾಜಿ ಕ್ರಿಕೆಟಿಗ ಸಚಿನ್ ತೆಂಡೂಲ್ಕರ್ ಈ ಎರಡೂ ಕಾರುಗಳನ್ನು ಚಾಲನೆ ಮಾಡುವ ಮೂಲಕ ಮಾರುಕಟ್ಟೆಗೆ ಬಿಡುಗಡೆಗೊಳಿಸಿದರು.
'ಈ ಕಾರುಗಳು ಉತ್ತಮ ಡ್ರೈವಿಂಗ್ ಅನುಭವ ನೀಡುತ್ತವೆ. ಇವೆರಡೂ ಕಾರುಗಳನ್ನು ಡ್ರೈವ್ ಮಾಡಿದಾಗ ಬ್ಯಾಟಿಂಗ್ ಮಾಡಿದ ಅನುಭವವಾಯಿತು. ರೇಸಿಂಗ್ ನ ವೇಗಕ್ಕೆ ಹಾಗೂ ಕುಟುಂಬದ ಅಗತ್ಯಕ್ಕೆ ತಕ್ಕಂತ ಕಾರುಗಳಿವು' ಎಂದರು ಸಚಿನ್.
'ಇವು ರೇಸಿಂಗ್ ಸರಣಿಯ ಕಾರುಗಳಾದರೂ ಭಾರತದ ರಸ್ತೆಗಳಿಗೆ ಹೊಂದಿಕೊಳ್ಳುತ್ತವೆ. ಹೊಸ ಪೀಳಿಗೆಯವರಿಗೆ ಈ ಕಾರುಗಳು ಹೆಚ್ಚು ಇಷ್ಟವಾಗುತ್ತವೆ. ಎಂ5 ಹಾಗೂ ಎಂ6 ಕಾರುಗಳು ಸಹ ಶೀಘ್ರದಲ್ಲೇ ಭಾರತದ ಮಾರುಕಟ್ಟೆಗೆ ಬರಲಿವೆ' ಎಂದು ಬಿಎಂಡಬ್ಲ್ಯು ಭಾರತೀಯ ಸಮೂಹದ ಅಧ್ಯಕ್ಷ ಫಿಲಿಪ್ ವೊನ್ ಸಾಹ್ ಹೇಳಿದರು.
'ಆಲ್ ನ್ಯೂ ಎಂ3 ಸೆಡಾನ್'ನ ಎಕ್ಸ್ ಷೋರೂಂ ಬೆಲೆ ರೂ.1.19 ಕೋಟಿ ಮತ್ತು 'ಆಲ್ ನ್ಯೂ ಎಂ4 ಕ್ಯುಪೆ'ನ ಎಕ್ಸ್ ಷೋರೂಂ ಬೆಲೆ ರೂ.1.21 ಕೋಟಿ.
