ಬಿಜೆಪಿ– ಸೇನಾ ಮರುಮೈತ್ರಿ ಘೋಷಣೆಯಷ್ಟೇ ಬಾಕಿ?

ಮುಂಬೈ (ಪಿಟಿಐ/ಐಎಎನ್‌ಎಸ್‌):  ಬಿಜೆಪಿ­ಯೊಂದಿಗೆ ಮರುಮೈತ್ರಿ ಏರ್ಪಡುವ ಪ್ರಬಲ ಸುಳಿವು ನೀಡಿರುವ ಶಿವಸೇನಾ, ಪ್ರಧಾನಿ ನರೇಂದ್ರ ಮೋದಿ ಅವರು ಅಕ್ಟೋಬರ್‌ ೨೬ರಂದು ಎನ್‌ಡಿಎ ಮಿತ್ರಪಕ್ಷಗಳಿಗೆ ಹಮ್ಮಿಕೊಂಡಿ­ರುವ ದೀಪಾವಳಿ ಔತಣಕೂಟದಲ್ಲಿ ತನ್ನ ಸಂಸದರು ಭಾಗವಹಿಸುತ್ತಾರೆ ಎಂದು ಗುರುವಾರ ಹೇಳಿದೆ.

‘ಮಹಾರಾಷ್ಟ್ರದಲ್ಲಿ ಸ್ಥಿರ ಸರ್ಕಾರ ನೀಡುವುದು ಎರಡೂ ಪಕ್ಷಗಳ ಉದ್ದೇಶ’ ಎಂದೂ ಸೇನಾ ತಿಳಿಸಿದೆ. ‘ದೆಹಲಿಯಲ್ಲಿ ಬಿಜೆಪಿ ಮುಖಂಡರನ್ನು ಭೇಟಿಯಾಗುವಂತೆ ಪಕ್ಷದ ವರಿಷ್ಠ ಉದ್ಧವ್‌್ ಠಾಕ್ರೆ ನಮಗೆ ತಿಳಿಸಿದ್ದರು. ನಮ್ಮ ನಡುವಿನ ಮಾತುಕತೆ ಸಕಾ­ರಾತ್ಮಕವಾಗಿದೆ. ಎರಡೂ ಪಕ್ಷಗಳಿಗೂ ರಾಜ್ಯದಲ್ಲಿ ಉತ್ತಮ ಜನಾದೇಶ ಸಿಕ್ಕಿದೆ. ರಾಜ್ಯದ ಜನರ ಭಾವನೆಯನ್ನು ದೃಷ್ಟಿಯ­ಲ್ಲಿಟ್ಟುಕೊಂಡು ನಾವು ಖಂಡಿತವಾ­ಗಿಯೂ ಸ್ಥಿರ ಸರ್ಕಾರ ಕೊಡುತ್ತೇವೆ’ ಎಂದು ಸೇನಾ ಮುಖಂಡ  ಅನಿಲ್‌ ದೇಸಾಯಿ ಹೇಳಿದ್ದಾರೆ.

‘ದೀಪಾವಳಿಯ ಶುಭ ಸಮಯದಲ್ಲಿ ನಮ್ಮ ನಡುವೆ ಮಾತುಕತೆ ನಡೆಯು­ತ್ತಿದೆ. ದೀಪಾವಳಿ ಆಚರಿಸುವುದಕ್ಕೆ  ನಾವು ದೆಹಲಿಯಿಂದ ಮರಳಿ ಬಂದೆವು.  ಸರ್ಕಾರ ರಚನೆ ಸಂಬಂಧ ಸೋಮವಾರ ಎರಡೂ ಪಕ್ಷಗಳು ಮತ್ತೆ ಸಭೆ ಸೇರಲಿವೆ’ ಎಂದು ಅವರು ತಿಳಿಸಿದ್ದಾರೆ.
‘ರಾಜ್ಯದಲ್ಲಿ ಸ್ಥಿರ ಸರ್ಕಾರ ನೀಡುವುದಷ್ಟೇ ನಮ್ಮ ಉದ್ದೇಶ. ನಾವು ಯಾವುದೇ ಬೇಡಿಕೆ ಇಟ್ಟಿಲ್ಲ’ ಎಂದು ದೇಸಾಯಿ ಸ್ಪಷ್ಟಪಡಿಸಿದ್ದಾರೆ.

ಸಿ.ಎಂ ಸ್ಥಾನದ ಆಕಾಂಕ್ಷಿ ಅಲ್ಲ– ಗಡ್ಕರಿ
ನಾಗಪುರ (ಪಿಟಿಐ/ಐಎಎನ್‌ಎಸ್‌): ಮಹಾ­ರಾಷ್ಟ್ರದ ಮುಖ್ಯಮಂತ್ರಿ ಸ್ಥಾನದ ಸ್ಪರ್ಧೆಯಲ್ಲಿ ತಾವು ಇಲ್ಲ ಎಂದು ಮತ್ತೊಮ್ಮೆ ಸ್ಪಷ್ಟಪಡಿಸಿರುವ ಕೇಂದ್ರ ಭೂಸಾರಿಗೆ ಸಚಿವ ನಿತಿನ್‌್ ಗಡ್ಕರಿ, ‘ನಾನು ರಾಜ್ಯ ರಾಜಕೀಯಕ್ಕೆ ಮರಳುವುದಿಲ್ಲ. ದೆಹಲಿ­ಯಲ್ಲಿ ಕೆಲಸ ಮಾಡುವುದಕ್ಕೆ ಇಷ್ಟಪಡುತ್ತೇನೆ’ ಎಂದಿದ್ದಾರೆ.