ಬೇಹು ಮಾಹಿತಿ ಹಂಚಿಕೆ ಲೋಪವೇ ಕಾರಣ

ನ್ಯೂಯಾರ್ಕ್‌ (ಪಿಟಿಐ):  ಅಮೆರಿಕ, ಬ್ರಿಟನ್‌ ಮತ್ತು ಭಾರತದ ಗೂಢಚರ ಸಂಸ್ಥೆಗಳು ತಮ್ಮ ಅತ್ಯಾ­ಧುನಿಕ ಸರ್ವೇಕ್ಷಣಾ ವ್ಯವಸ್ಥೆ ಮೂಲಕ ಸಂಗ್ರಹಿಸಿದ್ದ ಸುಳಿವುಗಳನ್ನು ಒಟ್ಟು­ಗೂಡಿಸಿ ವಿಶ್ಲೇಷಣೆ ನಡೆಸಿದ್ದರೆ  ಮುಂಬೈ ಮೇಲಿನ 26/11ರ ಉಗ್ರರ ದಾಳಿ  ತಪ್ಪಿಸಬಹುದಾಗಿತ್ತು ಎಂದು ತನಿಖಾ ವರದಿ­ಯೊಂದು ಹೇಳಿದೆ.

ನ್ಯೂಯಾರ್ಕ್‌ ಟೈಮ್ಸ್‌, ಪ್ರೊ ಪಬ್ಲಿಕಾ ಮತ್ತು ಪಿಬಿಎಸ್‌ ಫ್ರಂಟ್‌ಲೈನ್‌ ಸಂಸ್ಥೆಗಳು ಈ ವಿವರವಾದ ವರದಿ ಸಿದ್ಧಪಡಿಸಿವೆ. ಭಯೋ­ತ್ಪಾದನೆ ತಡೆ ಆಯುಧವಾಗಿ ಕಂಪ್ಯೂಟರ್‌ ಆಧಾ­ರಿತ ಸರ್ವೇಕ್ಷಣೆ ಮತ್ತು ಸಂವಹನ ಪ್ರತಿಬಂಧಿಸಿ ಮಾಹಿತಿ ಸಂಗ್ರಹದ ಶಕ್ತಿ ಮತ್ತು ದೌರ್ಬಲ್ಯ ಗಳೆರಡನ್ನೂ ಮುಂಬೈ ದಾಳಿಯು ಬಹಿರಂಗ­ಪಡಿಸಿದೆ ಎಂದು ವರದಿ ಹೇಳಿದೆ.

‘ಇದು ಗೂಢಚರ್ಯೆಯ ಇತಿಹಾಸ­ದಲ್ಲಿಯೇ ಅತ್ಯಂತ ಘೋರ ಪರಿಣಾಮಕ್ಕೆ ಕಾರಣವಾದ ಲೋಪವಾಗಿದೆ. ಅತ್ಯಾ­ಧುನಿಕ ಸರ್ವೇಕ್ಷಣೆ ಮತ್ತು ಇತರ ವ್ಯವಸ್ಥೆಗಳನ್ನು ಬಳಸಿ ಮೂರೂ ದೇಶಗಳ ಗೂಢಚಾರ ಸಂಸ್ಥೆಗಳು ಸಂಗ್ರಹಿಸಿದ್ದ ಮಾಹಿತಿಯನ್ನು ಪರಸ್ಪರ ಹಂಚಿ­ಕೊಳ್ಳುವ ಕೆಲಸ ಮಾಡಲಿಲ್ಲ. ಒಂದು ವೇಳೆ ಈ ಎಲ್ಲ ಮಾಹಿತಿ ಕ್ರೋಡೀಕರ­ಣಗೊಂಡಿದ್ದರೆ ಮುಂಬೈ ಮೇಲಿನ ಅತ್ಯಂತ ಭಯಾನಕ ದಾಳಿಯನ್ನು ತಪ್ಪಿಸಲು ಅವಕಾಶ ದೊರೆಯುತ್ತಿತ್ತು’ ಎಂದು ದೀರ್ಘವಾದ ವರದಿಯಲ್ಲಿ ವಿವರಿಸಲಾಗಿದೆ.

ಲಷ್ಕರ್‌ ಎ ತಯಬಾದ ತಾಂತ್ರಿಕ ವಿಭಾಗದ ಮುಖ್ಯಸ್ಥ ಮತ್ತು ಮುಂಬೈ ದಾಳಿಯ ಷಡ್ಯಂತ್ರ ರೂಪಿಸಿದವರಲ್ಲಿ ಒಬ್ಬನಾದ ಜರಾರ್‌ ಷಾ ಎಂಬಾತನ ಅಂತರ್ಜಾಲ ಚಟುವಟಿಕೆಗಳ ಮೇಲೆ ಭಾರತ ಮತ್ತು ಬ್ರಿಟನ್‌ ಗುಪ್ತಚರ ಸಂಸ್ಥೆಗಳು ಕಣ್ಣಿಟ್ಟಿದ್ದವು. ಆದರೆ ಮುಂಬೈ ದಾಳಿಗೆ ಮೊದಲೇ ಈ ಮಾಹಿತಿಯ ಸಂಯೋಜನೆ ಸಾಧ್ಯವಾಗಲಿಲ್ಲ. ಇದು ಅತ್ಯಂತ ದೊಡ್ಡ ಗುಪ್ತಚರ ವೈಫಲ್ಯ ಎಂದು ವರದಿ ಹೇಳಿದೆ.

ಅಮೆರಿಕ ಕೂಡ ಇತರ ಮೂಲಗಳಿಂದ ಮಾಹಿತಿ ಸಂಗ್ರಹಿ­ಸುತ್ತಿತ್ತು. ಇದರ ಆಧಾರದಲ್ಲಿ ದಾಳಿಗೆ ಮೊದಲು ಹಲವು ಬಾರಿ ಭಾರತದ ಭದ್ರತಾ ಸಂಸ್ಥೆಗಳಿಗೆ ದಾಳಿ ಸಂಚಿನ ಎಚ್ಚರಿಕೆ ನೀಡಿತ್ತು ಎಂದು ವರದಿಯಲ್ಲಿ ಹೇಳಲಾಗಿದೆ.

ಭಾರತದ ಉದ್ಯಮಿ ಎಂಬ ಸುಳ್ಳು: ಜರಾರ್‌ ಷಾ ಅಮೆರಿಕದ ಕಂಪೆನಿ­ಯೊಂದರಿಂದ ಇಂಟರ್‌ ನೆಟ್‌ ಫೋನ್‌ (ವಿಒಐಪಿ–- ಅಂತರ್ಜಾಲ ಮೂಲಕ ಸಂವ­ಹನ ನಡೆಸುವ ಉಪಕರಣ) ಖರೀದಿ­ಸುವಾಗ ತಾನು ಭಾರತದ ಉದ್ಯಮಿ ಎಂದು ಹೇಳಿ ಕೊಂಡಿದ್ದ. ನಂತರ ಇದನ್ನೇ ಬಳಸಿ ಮುಂಬೈ ದಾಳಿಕೋರ­ರೊಂದಿಗೆ ಪಾಕಿಸ್ತಾನ ದಲ್ಲಿದ್ದ ಸಂಚುಕೋರರು ಸಂವಹನ ನಡೆಸಿದ್ದರು.

ಹೆಡ್ಲಿ ಬಗ್ಗೆ ಅನುಮಾನ ಬರಲಿಲ್ಲ:  ಪಾಕಿಸ್ತಾನ ಮೂಲದ ಅಮೆರಿಕನ್‌ ಡೇವಿಡ್‌ ಹೆಡ್ಲಿ, ಲಷ್ಕರ್ ಎ ತಯಬಾ ಮತ್ತು ಐಎಸ್‌ಐ ಸಂಚುಕೋರರಿಗೆ ಹಲವು ಅತ್ಯಂತ ಶಂಕಾಸ್ಪದ ಇ-ಮೇಲ್‌ ಸಂದೇಶಗಳನ್ನು ಕಳುಹಿಸಿದ್ದರೂ ಮುಂಬೈ ದಾಳಿಯಲ್ಲಿ ಆತನ ಪಾತ್ರವನ್ನು ಗುರುತಿಸಲು ಸಾಧ್ಯವಾಗಲಿಲ್ಲ ಎಂದು ವರದಿ ಹೇಳಿದೆ.

ದಾಳಿಗೆ ಮೊದಲು ಮತ್ತು ನಂತರ ಆತ ಹಲವು ಇ–ಮೇಲ್‌ ಸಂದೇಶಗಳನ್ನು ಕಳುಹಿಸಿದ್ದಾನೆ.
ಆದರೆ ಭಾರತ, ಅಮೆ­ರಿಕ ಮತ್ತು ಬ್ರಿಟನ್‌ನ ಬೇಹು­ಗಾರಿಕೆ ಮಾಹಿತಿಯಲ್ಲಿ ಹೆಡ್ಲಿಯ ಹೆಸರು ಇರಲೇ ಇಲ್ಲ.

ಅಮೆರಿಕದ ರಾಷ್ಟ್ರೀಯ ಭದ್ರತಾ ಸಂಸ್ಥೆಯು ಹೆಡ್ಲಿಯ ಹಲವು ಇ–ಮೇಲ್‌ ಸಂದೇಶಗಳನ್ನು ಸಂಗ್ರಹಿಸಿತ್ತು. ಆದರೂ ದಾಳಿಯಲ್ಲಿ ಆತನ ಒಳಗೊಳ್ಳುವಿಕೆ ಸ್ಪಷ್ಟವಾಗಲಿಲ್ಲ. ಡೆನ್ಮಾರ್ಕ್‌ನ ಪತ್ರಿಕೆ­ಯೊಂದರ ಮೇಲೆ ದಾಳಿ ನಡೆಸಲು ಆತ ಸಂಚು ರೂಪಿಸಲಾರಂಭಿಸಿದ ನಂತರವೇ ಎಫ್‌ಬಿಐ ಈತನ ಮೇಲೆ ನಿಗಾ ಇರಿಸಲು ಆರಂಭಿಸಿತು ಎಂದು ವರದಿ ಹೇಳಿದೆ.

ಐಎಸ್‌ಐ ಅಧಿಕಾರಿಗಳು ಶಾಮೀಲು
ಲಷ್ಕರ್‌ ಎ ತಯಬಾ ಮತ್ತು ಪಾಕಿಸ್ತಾನದ ಗುಪ್ತಚರ ಸಂಸ್ಥೆ ಐಎಸ್‌ಐಯ ಕೆಲವು ಅಧಿಕಾರಿಗಳು ಸೇರಿ ಮುಂಬೈ ದಾಳಿಯ ಸಂಚು ರೂಪಿಸಿದ್ದರು ಎಂದು ವರದಿ ಹೇಳೀದೆ.