ನವದೆಹಲಿ(ಪಿಟಿಐ): ಭಾರತದಲ್ಲಿ 2012-2013ರಲ್ಲಿ ಭಯೋತ್ಪಾದನೆ ಚಟುವಟಿಕೆ ಶೇ 70ರಷ್ಟು ಹೆಚ್ಚಿದೆ ಎಂದು ಇನ್ ಸ್ಟಿಟ್ಯೂಟ್ ಆಫ್ ಎಕನಾಮಿಕ್ ಅಂಡ್ ಪೀಸ್ ಸಂಸ್ಥೆ(ಐಇಪಿ) ಹೇಳಿದೆ.
ಐಇಪಿ ಬಿಡುಗಡೆ ಮಾಡಿರುವ ಜಾಗತಿಕ ಭಯೋತ್ಪಾದನೆ ಸೂಚ್ಯಂಕ-2014ರ ಪ್ರಕಾರ ಭಾರತದಲ್ಲಿ ಕಳೆದ ವರ್ಷ 404 ಮಂದಿ ಭಯೋತ್ಪಾದನೆಗೆ ಬಲಿಪಶುಗಳಾಗಿದ್ದಾರೆ. 2011-12ರಲ್ಲಿ ಈ ಸಂಖ್ಯೆ 238ರಷ್ಟಿತ್ತು ಎಂದು ಹೇಳಿದೆ.
ಜಾಗತಿಕ ಮಟ್ಟದಲ್ಲಿ ಹೆಚ್ಚಿನ ಭಯೋತ್ಪಾದನಾ ಚಟುವಟಿಕೆಗಳು ಭಾರತದಲ್ಲೇ ನಡೆದಿದ್ದು, 43 ವಿವಿಧ ಭಯೋತ್ಪಾದನಾ ಸಂಘಟನೆಗಳು ಈ ಕೃತ್ಯಗಳನ್ನು ಎಸಗಿವೆ. ಸಂಘಟನೆಗಳನ್ನು ಇಸ್ಲಾಮಿಕ್ ಭಯೋತ್ಪಾದನೆ, ಪ್ರತ್ಯೇಕತಾವಾದಿ ಭಯೋತ್ಪಾದನೆ ಹಾಗೂ ನಕ್ಸಲ್ ಚಟುವಟಿಕೆಗಳು ಎಂದು ಮೂರು ವಿಭಾಗ ಮಾಡಿ ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
