ಭಾರಿ ಅಂತರದಿಂದ ಗೆದ್ದ ಜಯಾ

ಚೆನ್ನೈ/ಭೋಪಾಲ್‌ (ಪಿಟಿಐ): ಚೆನ್ನೈನ ಆರ್‌.ಕೆ.ನಗರ ವಿಧಾನಸಭಾ ಕ್ಷೇತ್ರದ ಉಪಚುನಾವಣೆಯಲ್ಲಿ ಎಐಎಡಿಎಂಕೆ ಮುಖ್ಯಸ್ಥೆ, ಮುಖ್ಯಮಂತ್ರಿ ಜೆ.ಜಯ ಲಲಿತಾ 1.60 ಲಕ್ಷಕ್ಕೂ ಹೆಚ್ಚಿನ ಮತಗಳ ಅಂತರದಿಂದ ಪ್ರಚಂಡ ವಿಜಯ ಸಾಧಿಸಿದ್ದಾರೆ.

ಜಯಾ ಅವರ ಸಮೀಪದ ಪ್ರತಿಸ್ಪರ್ಧಿ ಸಿಪಿಐನ ಸಿ.ಮಹೇಂದ್ರ ಠೇವಣಿ ಕಳೆದು ಕೊಂಡಿದ್ದಾರೆ. ‘ಚಲಾವಣೆಯಾದ 1.81 ಲಕ್ಷ ಮತಗಳಲ್ಲಿ ನನಗೆ ಶೇ 88.43 ಮತಗಳು ಬಿದ್ದಿವೆ. ನಿಜಕ್ಕೂ ಇದೊಂದು ಐತಿಹಾಸಿಕ ವಿಜಯ’ ಎಂದು ಜಯಾ ಬಣ್ಣಿಸಿದ್ದಾರೆ. ಜಯಾ ಮರು ಆಯ್ಕೆಗೆ ದಾರಿ ಮಾಡಿಕೊಡುವುದಕ್ಕಾಗಿ ಆರ್‌.ಕೆ.ನಗರ ಶಾಸಕ ವೆಟ್ರಿವೇಲು ಅವರು ಮೇನಲ್ಲಿ ರಾಜೀನಾಮೆ ನೀಡಿದ್ದರು.

ಅಕ್ರಮ ಆಸ್ತಿ ಗಳಿಕೆ ಪ್ರಕರಣದಲ್ಲಿ ಕರ್ನಾಟಕ ಹೈಕೋರ್ಟ್‌ನಿಂದ ಮೇ 23ರಂದು ಖುಲಾಸೆಗೊಂಡ ಬಳಿಕ ಜಯಾ ಮತ್ತೆ ತಮಿಳುನಾಡು ಗದ್ದುಗೆ ಏರಿ ದರು. ಮುಖ್ಯಮಂತ್ರಿಯಾಗಿ ಅಧಿಕಾರ ಸ್ವೀಕರಿಸಿ ಆರು ತಿಂಗಳ ಒಳಗೆ ಅವರು ಶಾಸಕಿಯಾಗಿ ಆಯ್ಕೆಯಾಗಬೇಕಿತ್ತು. 

ಮುಂದಿನ ವರ್ಷ ತಮಿಳುನಾಡು ವಿಧಾನಸಭೆ ಚುನಾವಣೆಯಲ್ಲಿ ತಮ್ಮ ಪಕ್ಷವು ಗೆಲವು ಸಾಧಿಸಲಿದೆ ಎನ್ನುವುದಕ್ಕೆ ಈ ಉಪಚುನಾವಣೆ ಫಲಿತಾಂಶವೇ ಸಾಕ್ಷಿ ಎಂದೂ ಜಯಾ ಹೇಳಿಕೊಂಡಿದ್ದಾರೆ.

ತನಿಖೆಗೆ ಆದೇಶ:  ಈ ಚುನಾವಣೆ ಯಲ್ಲಿ ಅಕ್ರಮ ನಡೆದಿದೆ. ಆದ ಕಾರಣ ತನಿಖೆ ನಡೆಬೇಕು. ಚುನಾವಣಾ ಆಯೋಗ ಸೂಕ್ತ ಕ್ರಮ ಜರುಗಿಸಬೇಕು ಎಂದು ಸಿಪಿಐ ಆಗ್ರಹಿಸಿದೆ.

ಕಾಂಗ್ರೆಸ್‌ ಗೆಲುವು:  ಕೇರಳದ ಅರುವಿಕ್ಕರ ವಿಧಾನಸಭೆ ಕ್ಷೇತ್ರದಿಂದ  ಕಾಂಗ್ರೆಸ್‌ನ ಕೆ.ಎಸ್‌.ಶಬರಿನಾಥನ್‌ 10 ಸಾವಿರಕ್ಕೂ ಅಧಿಕ ಮತಗಳ ಅಂತರದಿಂದ ಸಮೀಪದ ಪ್ರತಿಸ್ಪರ್ಧಿ ಎಲ್‌ಡಿಎಫ್‌ನ  ವಿಜಯಕುಮಾರ್‌ ಅವರನ್ನು ಮಣಿಸಿ ದ್ದಾರೆ.  ಮಾಜಿ ಸ್ಪೀಕರ್‌ ಜಿ. ಕಾರ್ತಿ ಕೇಯನ್‌  ಫೆಬ್ರುವರಿಯಲ್ಲಿ ಮೃತ ಪಟ್ಟ ಬಳಿಕ ಈ ಕ್ಷೇತ್ರ ತೆರವಾಗಿತ್ತು. ಶಬರಿನಾಥನ್‌ ಅವರು ಕಾರ್ತಿಕೇಯನ್‌  ಪುತ್ರ.