ಭಿನ್ನಮತ ಶಮನಕ್ಕೆ ಮುಖ್ಯಮಂತ್ರಿ ತಂತ್ರ

ಒಂದೂವರೆ ವರ್ಷದ ಹಿಂದೆ ನಿಗಮ– ಮಂಡಳಿಗಳಿಗೆ ಅಧ್ಯಕ್ಷರನ್ನು ನೇಮಿಸಲಾಗಿದೆ. ಈ ನೇಮಕಾತಿ ಸಮಯದಲ್ಲೇ 18 ತಿಂಗಳ ಬಳಿಕ ಬೇರೆಯವರಿಗೆ ಸ್ಥಾನ ಬಿಟ್ಟುಕೊಡಬೇಕು ಎನ್ನುವ ಷರತ್ತು ಹಾಕಲಾಗಿದೆ.

ಈ ಷರತ್ತಿನಂತೆ ಕೆಲವು ನಿಗಮ– ಮಂಡಳಿಗಳ ಅಧ್ಯಕ್ಷರ ಅವಧಿ ಮುಗಿದಿದ್ದು, ಸೇವಾವಧಿಯನ್ನು ಮೂರು ತಿಂಗಳು ವಿಸ್ತರಿಸಲಾಗಿದೆ.
ಖಾಲಿ ಆಗಲಿರುವ ನಿಗಮ ಮಂಡಳಿಗಳ ಪಟ್ಟಿ ಸಿದ್ಧವಾಗುತ್ತಿದ್ದು, ಈ ಸ್ಥಾನಗಳಿಗೆ ಯಾರನ್ನು ನೇಮಿಸಬೇಕೆಂಬ ಕುರಿತು ಮುಖ್ಯಮಂತ್ರಿಗಳು ಹೈಕಮಾಂಡ್‌ ಜತೆ ಚರ್ಚೆ ನಡೆಸಲಿದ್ದಾರೆ.

ರಾಜ್ಯದ ಉಸ್ತುವಾರಿ, ಎಐಸಿಸಿ ಪ್ರಧಾನ ಕಾರ್ಯದರ್ಶಿ ದಿಗ್ವಿಜಯ್‌ ಸಿಂಗ್‌ ಅವರೊಂದಿಗೆ ಸಿದ್ದರಾಮಯ್ಯ ಮೊದಲ ಸುತ್ತಿನ ಚರ್ಚೆ ಮಾಡಲಿದ್ದಾರೆ. ಇಬ್ಬರೂ ಸೇರಿ ಸಿದ್ಧಪಡಿಸುವ ಪಟ್ಟಿಗೆ ಹೈಕಮಾಂಡ್‌ ಅಂತಿಮ ಒಪ್ಪಿಗೆ ನೀಡಲಿದೆ ಎಂದು ಉನ್ನತ ಮೂಲಗಳು ‘ಪ್ರಜಾವಾಣಿ’ಗೆ ತಿಳಿಸಿವೆ.

ಹೇಳಿಯೇ ಕೈಬಿಡಲಾಗಿದೆ: ‘ನಾನು ಏಕಾಏಕಿಯಾಗಿ ಯಾವ ಸಚಿವರನ್ನೂ ತೆಗೆದಿಲ್ಲ. ಪುನರ್‌ರಚನೆಗೆ ಮೊದಲು ಕರೆದಿದ್ದ ಮಂತ್ರಿ ಮಂಡಲದ ಸಭೆಯಲ್ಲಿ ಪುನರ್‌ರಚನೆ ಅನಿವಾರ್ಯ ಆಗಿರುವುದರಿಂದ ಕೆಲವು ಸಚಿವರನ್ನು ಕೈಬಿಡಬೇಕಾದ ವಿಷಯವನ್ನು ಮನವರಿಕೆ ಮಾಡಿದ್ದೆ’ ಎಂದು ತಮ್ಮ ಸಹೊದ್ಯೋಗಿಗಳಿಗೆ ಸ್ಪಷ್ಟಪಡಿಸಿದ್ದಾರೆ.

ವಿರೋಧ ಪಕ್ಷಗಳ ನಾಯಕರು ಹಾಗೂ ಮಾಧ್ಯಮಗಳು ಸತತವಾಗಿ ಕಣ್ಣು ಕಾಣದವರು, ಕಿವಿ ಕೇಳದವರು, ಅನಾರೋಗ್ಯ ಪೀಡಿತರು ಸಚಿವರಾಗಿದ್ದಾರೆ ಎಂಬ ಟೀಕೆಗಳನ್ನು  ಮಾಡಿದ್ದರಿಂದ ಹೊಸ ಸಚಿವರಿಗೆ ಅವಕಾಶ ಮಾಡಿಕೊಡಲಾಗಿದೆ ಎಂದೂ ಅವರು ತಮ್ಮ ಕ್ರಮವನ್ನು ಸಮರ್ಥಿಸಿಕೊಂಡರು ಎಂದು ಮೂಲಗಳು ವಿವರಿಸಿವೆ.

ಸ್ಪೀಕರ್‌ ಸ್ಥಾನಕ್ಕೆ ಕೆ.ಬಿ. ಕೋಳಿವಾಡ ಅವರ ಆಯ್ಕೆ ಹಾಗೂ ಇದೇ 27, 28ರಂದು ನಡೆಯಲಿರುವ ಜಿಲ್ಲಾಧಿಕಾರಿಗಳ ಸಭೆ ಬಗ್ಗೆಯೂ ಅವರು ಸಭೆಗೆ ಮಾಹಿತಿ ನೀಡಿದ್ದಾರೆ.

ಹಿರಿಯ ಸಚಿವರ ಸಭೆ ಬಳಿಕ ಮಾಧ್ಯಮ ಪ್ರತಿನಿಧಿಗಳ ಜತೆ ಮಾತನಾಡಿದ ಮುಖ್ಯಮಂತ್ರಿ, ಕಾಂಗ್ರೆಸ್‌ ಪಕ್ಷದಲ್ಲಿ ಭಿನ್ನಮತವೂ ಇಲ್ಲ, ಗುಂಪುಗಾರಿಕೆಯೂ ಇಲ್ಲ ಎಂದು ಪ್ರತಿಪಾದಿಸಿದರು.

ಇವೆಲ್ಲವೂ ಮಾಧ್ಯಮಗಳ ಸೃಷ್ಟಿ ಅಷ್ಟೆ. ಮಂತ್ರಿ ಮಂಡಲ ಪುನರ್‌ರಚನೆ ಬಳಿಕ ಅಸಮಾಧಾನ ಸಹಜ. ಅದನ್ನೇ ದೊಡ್ಡದು ಮಾಡಲಾಗುತ್ತಿದೆ ಎಂದೂ ಹೇಳಿದರು.