ಭೂದಾಹ ತಣಿಸಲು ಕೆರೆ ಆಪೋಶನ!

ಬೆಂಗಳೂರು: ಒಂದಾನೊಂದು ಕಾಲದಲ್ಲಿ ಪರಿಶುದ್ಧ ನೀರಿನ ಆಗರವಾಗಿತ್ತು ಉತ್ತರಹಳ್ಳಿ ಭಾಗದ ಚಿಕ್ಕ ಕಲ್ಲಸಂದ್ರ ಕೆರೆ. 12 ಎಕರೆ, 26 ಗುಂಟೆ ಪ್ರದೇಶದಲ್ಲಿ ವಿಸ್ತರಿ­ಸಿದ್ದ ಆ ಕೆರೆಯೀಗ ಭೂಗಳ್ಳರ ಪಾಲಿನ ಸ್ವರ್ಗ­ವಾಗಿ ಹೇಳ ಹೆಸರಿಲ್ಲದಂತೆ ಅಳಿದುಹೋಗಿದೆ. ಕೆರೆ ಪಾತ್ರದ ಅತಿಕ್ರಮಣದಲ್ಲಿ ಕಂದಾಯ ಅಧಿಕಾರಿಗಳು ಭಾಗಿ­ಯಾದ ವಾಸನೆಯೂ ಬಡಿಯುತ್ತಿದೆ.

ಬೆಂಗಳೂರು ದಕ್ಷಿಣ ತಾಲ್ಲೂಕಿನ ಚಿಕ್ಕ ಕಲ್ಲಸಂದ್ರ ಗ್ರಾಮದ ಸರ್ವೆ ನಂ. 76ರಲ್ಲಿ ಈಗಲೂ ಕೆರೆ ಇದೆ ಎನ್ನು­ತ್ತವೆ ಸರ್ಕಾರದ ಎಲ್ಲ ದಾಖಲೆಗಳು. ಆದರೆ, ಆ ಜಾಗದಲ್ಲಿ ಕೆರೆಯಿದೆ ಎನ್ನುವುದಕ್ಕೆ ಈಗ ಯಾವ ಕುರು­ಹುಗಳೂ ಉಳಿದಿಲ್ಲ. ಕೆರೆಪಾತ್ರದಲ್ಲಿ ಕಾನೂನು­ಬಾಹಿರ­ವಾಗಿ ಹಲವು ಕಟ್ಟಡಗಳು ತಲೆ ಎತ್ತಿವೆ.

ಶಾಲೆಯೊಂದು ಕೆರೆ ಅಂಗಳದಲ್ಲಿ ನಡೆಯುತ್ತಿವೆ. ಪೀಠೋ­ಪಕರಣ ಮಳಿಗೆಯೊಂದು ಅಲ್ಲಿಯೇ ವಹಿ­ವಾಟು ನಡೆಸುತ್ತಿದ್ದು, ಲೋಹದ ಸಾಮಾನುಗಳ ತಯಾರಿಕಾ ಘಟಕಗಳು ಸುತ್ತ ಹರಡಿಕೊಂಡಿವೆ. ಇಷ್ಟು ಅತಿಕ್ರಮಣ ಸಾಲದೆಂಬಂತೆ ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ (ಬಿಎಂಟಿಸಿ), ಕೆರೆಯ ಮಧ್ಯೆ ಭಾಗದಲ್ಲಿ ಬಸ್‌ ನಿಲ್ದಾಣವನ್ನೂ ನಿರ್ಮಿಸಿದೆ. ಕೆರೆ ಅಭಿವೃದ್ಧಿ ಪ್ರಾಧಿಕಾರದಿಂದ (ಎಲ್‌ಡಿಎ) ಮಾಹಿತಿ ಹಕ್ಕು ಕಾಯ್ದೆ (ಆರ್‌ಟಿಐ) ಅಡಿಯಲ್ಲಿ ಪಡೆಯಲಾದ ವಿವರಣೆ ಸಹ ಕೆರೆಗೆ ಈಗಾಗಲೇ ಚರಮಗೀತೆ ಬರೆಯಲಾಗಿದೆ ಎಂಬುದನ್ನು ಸಾರುತ್ತದೆ.

‘ಪ್ರಾಧಿಕಾರದ ಬಳಿ ಲಭ್ಯವಿರುವ ದಾಖಲೆಗಳ ಪ್ರಕಾರ, ಕೆರೆ ಸಂಪೂರ್ಣವಾಗಿ ಅತಿಕ್ರಮಣಗೊಂಡಿದ್ದು, ಅದರ ಮೂಲಸ್ವರೂಪವೇ ಮಾಯವಾಗಿದೆ. ಕೆರೆಯ ಯಾವ ಲಕ್ಷಣವನ್ನೂ ಅದೀಗ ಉಳಿಸಿಕೊಂಡಿಲ್ಲ. ವಸತಿಗೃಹ, ಶಾಲೆ, ಡಾಂಬರು ಹಾಕಲಾದ ರಸ್ತೆ, ಬಸ್‌ ನಿಲ್ದಾಣ, ದೇವಸ್ಥಾನ ಹಾಗೂ ಕೊಳಚೆ ಪ್ರದೇಶ ತಲೆ ಎತ್ತಿವೆ’ ಎಂದು ಮಾಹಿತಿ ನೀಡಲಾಗಿದೆ.

ಬೃಹತ್‌ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ) ಕೆರೆಯ ಹೃದಯ ಭಾಗದಲ್ಲೇ ರಸ್ತೆಯನ್ನು ನಿರ್ಮಿಸಿದೆ. ಇದು ಪಾಲಕನ ಸ್ಥಾನದಲ್ಲಿರುವ ಬಿಬಿಎಂಪಿ ಕೆರೆಗೆ ಎಸಗಿದ ಅಪಚಾರ. ಆ ರಸ್ತೆಗೆ ಸಾಹಿತಿ ಶಿವರಾಮ ಕಾರಂತ ಅವರ ಹೆಸರು ಇಡಲಾಗಿದೆ. ಕೆರೆಯ ಒಂದು ತುಂಡು ಭೂಮಿ ಮಾತ್ರ ಹಾಗೇ ಉಳಿದಿದೆ. ಮಕ್ಕಳು ಅದನ್ನು ಆಟದ ಮೈದಾನವನ್ನಾಗಿ ಬಳಕೆ ಮಾಡುತ್ತಿದ್ದಾರೆ.

ಕಂದಾಯ ಇಲಾಖೆಯ ದಾಖಲೆಗಳ ಪ್ರಕಾರಣ ಚಿಕ್ಕ ಕಲ್ಲಸಂದ್ರದ ಸರ್ವೆ ನಂ. 76ರಲ್ಲಿ ಈಗಲೂ ಇರುವುದು ಕೆರೆ. ಹಿಡುವಳಿ ಮತ್ತು ಬೆಳೆ ಹಕ್ಕುಗಳ ದಾಖಲೆ (ಆರ್‌ಟಿಸಿ), ಗ್ರಾಮ ಟಿಪ್ಪಣಿ, ಗ್ರಾಮ ನಕ್ಷೆ ಎಲ್ಲವೂ ಆ ಸ್ಥಳದಲ್ಲೊಂದು ಕೆರೆ ಇತ್ತು ಎನ್ನುವುದನ್ನು ಸಂದೇಹಕ್ಕೆ ಆಸ್ಪದ ಇಲ್ಲದಂತೆ ಹೇಳುತ್ತವೆ. ಆದರೆ, ಭೂಗಳ್ಳರೆಂಬ ತಿಮಿಂಗಲುಗಳು ಇಂತಹ ಕೆರೆಯನ್ನೇ ನುಂಗಿ ನೀರು ಕುಡಿದಿವೆ.

ಕೆರೆ ಏನಾಗಿದೆ ಎನ್ನುವುದು ಕಂದಾಯ ಅಧಿಕಾರಿಗಳಿಗೆ ಸ್ಪಷ್ಟವಾಗಿ ಗೊತ್ತಿದೆ. 2010ರ ಅಕ್ಟೋಬರ್‌ನಲ್ಲಿ ಸರ್ವೇಕ್ಷಣಾ ಇಲಾಖೆಯು ಕೆರೆ ಸಮೀಕ್ಷೆ ಮಾಡಿ ನಕ್ಷೆ ಸಿದ್ಧಪಡಿಸಿದೆ. ಅತಿಕ್ರಮಣಗೊಂಡ ಪ್ರದೇಶವನ್ನು ಆ ನಕ್ಷೆಯಲ್ಲಿ ಸ್ಪಷ್ಟವಾಗಿ ಗುರುತಿಸಲಾ­ಗಿದ್ದು, ಎಂಟು ಜನ ಕಂದಾಯ ಅಧಿಕಾರಿಗಳು ಅದನ್ನು ದೃಢೀಕರಿಸಿದ್ದಾರೆ.

ಬೆಂಗಳೂರು ದಕ್ಷಿಣ ತಾಲ್ಲೂಕಿನ ತಹಶೀಲ್ದಾರ್‌, ಸರ್ವೇಯರ್‌, ಕಂದಾಯ ಅಧಿಕಾರಿ, ಬೆಂಗಳೂರು ನಗರ ಜಿಲ್ಲಾಧಿಕಾರಿಗಳ ತಾಂತ್ರಿಕ ಸಹಾಯಕ ಎಲ್ಲರೂ ಸಮೀಕ್ಷೆ ನಡೆಸಿ ಸಿದ್ಧಪಡಿಸಿದ ನಕ್ಷೆಗೆ ಸಹಿ ಹಾಕಿದ್ದಾರೆ. ಆದರೆ, ಯಾವ ಅಧಿಕಾರಿಯೂ ಅತಿಕ್ರಮಣ ತೆರವುಗೊಳಿಸಲು ಮುಂದಾಗಲಿಲ್ಲ. ಕೆರೆ ಉಳಿಸಲಿಲ್ಲ.

ಕೆರೆ ಅಂಗಳದ ಎಲ್ಲ ಅತಿಕ್ರಮಗಳಿಗೆ ಅಧಿಕೃತ ಮುದ್ರೆ ಒತ್ತಿದ ಬಿಬಿಎಂಪಿ, ಅಲ್ಲಿನ ಕಾನೂನುಬಾಹಿರ ನಿವೇಶನಗಳಿಗೆ ಖಾತೆ ಮಾಡಿಕೊಟ್ಟಿದೆ. ಖಾತೆ ಮಾಡಿಸಿಕೊಂಡವರು ಕಟ್ಟಡ ನಿರ್ಮಿಸಿಕೊಂಡರು. ಕೆರೆ ಪಾತ್ರದಲ್ಲೇ ಕಟ್ಟಡ ಏಳುವುದು ಗೊತ್ತಿದ್ದರೂ ಅಧಿಕಾರಿಗಳು ನಕ್ಷೆಗೆ ಮಂಜೂರಾತಿ ನೀಡಿದ್ದಾರೆ. ಬೆಂಗಳೂರು ವಿದ್ಯುತ್‌ ಸರಬರಾಜು ಕಂಪೆನಿ (ಬೆಸ್ಕಾಂ) ಹಾಗೂ ಜಲಮಂಡಳಿ ಯಾವುದೇ ತಕರಾರು ಎತ್ತದೆ ವಿದ್ಯುತ್‌ ಹಾಗೂ ನೀರಿನ ಸಂಪರ್ಕ ಒದಗಿಸಿಕೊಟ್ಟಿವೆ.

ಕೆರೆಯಿದ್ದ ಪ್ರದೇಶಕ್ಕೆ ಯಾರಾದರೂ ಭೇಟಿ ನೀಡಿದ್ದಾದರೆ ಅಲ್ಲಿ ಅತಿಕ್ರಮಣ ಎಷ್ಟು ವ್ಯವಸ್ಥಿತವಾಗಿ ನಡೆದಿದೆ ಎನ್ನುವುದು ಕಣ್ಣಿಗೆ ಕಟ್ಟುವಂತೆ ಎದ್ದು ಕಾಣುತ್ತದೆ. ‘ಮೊದಮೊದಲು ಕೊಳಚೆ ನೀರನ್ನು ಉದ್ದೇಶ ಪೂರ್ವಕವಾಗಿಯೇ ಕೆರೆಗೆ ಬಿಡಲಾಯಿತು. ಬಳಿಕ ಕಟ್ಟಡದ ತ್ಯಾಜ್ಯವನ್ನು ನೂರಾರು ಲಾರಿಗಳಲ್ಲಿ ತಂದು ಸುರಿಯಲಾಯಿತು. ಅಧಿಕಾರಿಗಳು ಎಲ್ಲವನ್ನೂ ಮೌನವಾಗಿ ನೋಡುತ್ತಿದ್ದರು’ ಎಂದು ಸ್ಥಳೀಯರು ನೋವಿನಿಂದ ವಿವರಿಸುತ್ತಾರೆ.

ಪ್ರಾಕೃತಿಕ ಸಂಪನ್ಮೂಲದ ಈ ಹಗಲು ದರೋಡೆಗೆ ಯಾರಿಂದಲೂ ಆಕ್ಷೇಪಣೆ ಬಾರದಂತೆ ನೋಡಿಕೊಳ್ಳಲು ಪ್ರಭಾವಿ ವ್ಯಕ್ತಿಗಳಿಗೂ ನಿವೇಶನ ಹಂಚಿಕೆ ಮಾಡಲಾಯಿತು. ‘ಹಲವು ರಾಜಕಾರಣಿಗಳು ಹಾಗೂ ಸರ್ಕಾರಿ ಅಧಿಕಾರಿಗಳು ಸಹ ಈ ಅಕ್ರಮದ ಫಲಾನುಭವಿಗಳಾದರು’ ಎಂಬ ಸ್ಥಳೀಯರು ಹೇಳುತ್ತಾರೆ.

ಕೆರೆಯನ್ನು ಅತಿಕ್ರಮಿಸಿಕೊಂಡ ಬಳಿಕ ಭೂ ದಾಖಲೆಗಳನ್ನು ತಿದ್ದಲಾಯಿತು. ನಿವೇಶನಗಳಿಗೆ ಸಿಕ್ಕ, ಸಿಕ್ಕ ಸರ್ವೆ ಸಂಖ್ಯೆ ನೀಡಿ ನೋಂದಣಿ ಮಾಡಿಸಲಾಯಿತು. ಈಗಲೂ ಸರಿಯಾಗಿ ತಪಾಸಣೆ ನಡೆಸಿದರೆ ನಿವೇಶನಗಳು ಇರುವ ಸ್ಥಳಕ್ಕೂ ಅವುಗಳ ಸರ್ವೆ ಸಂಖ್ಯೆಗೂ ತಾಳೆ ಆಗುವುದಿಲ್ಲ ಎಂದು ಕೆರೆ ಸಂರಕ್ಷಣೆಗೆ ಹೋರಾಡುತ್ತಿರುವ ಸಾಮಾಜಿಕ ಕಾರ್ಯಕರ್ತರೊಬ್ಬರು ವಿವರಿಸುತ್ತಾರೆ.

ಪ್ರತ್ಯೇಕವಾದ ಆರ್‌ಟಿಐ ಪ್ರಶ್ನೆಯೊಂದಕ್ಕೆ ಉತ್ತರ ನೀಡಿರುವ ಬಿಬಿಎಂಪಿ ಕೆರೆಗಳ ವಿಭಾಗದ ಅಧಿಕಾರಿಗಳು, ‘ಕೆರೆಗೆ ಸಂಬಂಧಿಸಿದಂತೆ ನಮ್ಮಲ್ಲಿ ಮೂಲ ನಕ್ಷೆ ಅಲಭ್ಯ. ಹೀಗಾಗಿ ಅಲ್ಲಿನ ಅತಿಕ್ರಮಣ ತೆರವುಗೊಳಿಸಿ, ಕೆರೆ ಅಭಿವೃದ್ಧಿಗೊಳಿಸಲು ಸಾಧ್ಯವಾಗುತ್ತಿಲ್ಲ’ ಎನ್ನುವ ಉತ್ತರ ನೀಡಿದ್ದಾರೆ.

ಕೆರೆಯ ಸದ್ಯದ ಸ್ಥಿತಿ ಕುರಿತು ಮಾಹಿತಿ ಬೇಕು ಎಂದು ಪಟ್ಟು ಹಿಡಿದರೆ ‘ಕೆರೆ ಪಾತ್ರ ಭಾಗಶಃ ಅತಿಕ್ರಮಣಗೊಂಡಿದೆ’ ಎಂಬ ವಿವರಣೆ ಸಿಗುತ್ತದೆ. ‘ಬೆಂಗಳೂರು ದಕ್ಷಿಣ ತಹಶೀಲ್ದಾರರಿಂದ ನಕ್ಷೆ ಸಿಕ್ಕ ಬಳಿಕ ಅತಿಕ್ರಮಣ ತೆರವುಗೊಳಿಸಲು ಕ್ರಮ ಕೈಗೊಳ್ಳಲಾಗುತ್ತದೆ’ ಎಂಬ ಹಾರಿಕೆ ಉತ್ತರ ದೊರೆಯುತ್ತದೆ. ‘ಪ್ರಜಾವಾಣಿ’ಗೆ ಬೆಂಗಳೂರು ನಗರ ಜಿಲ್ಲಾಡಳಿತದಿಂದ ಕೆರೆಯ ಪ್ರಮಾಣೀಕೃತ ನಕ್ಷೆ ಪಡೆಯಲು ಸಾಧ್ಯವಾಗಿರುವಾಗ, ಸರ್ಕಾರದ ಭಾಗವೇ ಆಗಿರುವ ಬಿಬಿಎಂಪಿಗೆ ಅದಿನ್ನೂ ಸಿಕ್ಕಿಲ್ಲ!

ಚಿಕ್ಕ ಕಲ್ಲಸಂದ್ರ ಕೆರೆ ಅತಿಕ್ರಮಣಕ್ಕೆ ಸಂಬಂಧಿಸಿದಂತೆ ಬಂದ ದೂರುಗಳನ್ನು ಆಧರಿಸಿ ತಹಶೀಲ್ದಾರರು, ‘ಸ್ಥಳ ಸಮೀಕ್ಷೆ ನಡೆಸಿ ವಾಸ್ತವ ಸಂಗತಿ ಆಧರಿಸಿ ವರದಿ ನೀಡಬೇಕು’ ಎಂದು ಕಂದಾಯ ಅಧಿಕಾರಿಗೆ ಸೂಚಿಸಿದ್ದರು. ಸಮೀಕ್ಷೆ ನಡೆಸಲು ಕಂದಾಯ ಅಧಿಕಾರಿಯೊಬ್ಬರು ಕಳೆದ ಜನವರಿಯಲ್ಲೇ ಸ್ಥಳಕ್ಕೆ ತೆರಳಿದ್ದರು. ಆದರೆ, ಭೂಗಳ್ಳರಿಂದ ಆ ಅಧಿಕಾರಿ ಬೆದರಿಕೆ, ಪ್ರತಿರೋಧ ಎದುರಿಸಬೇಕಾಯಿತು.

ಅಕ್ರಮಗಳ ಕುರಿತು ಸುದೀರ್ಘ ವರದಿ ಸಿದ್ಧಪಡಿಸಿದ ಆ ಅಧಿಕಾರಿ, ತಮಗೆ ಬಂದ ಬೆದರಿಕೆ ಕರೆಗಳ ಬಗೆಗೂ ವರದಿಯಲ್ಲಿ ಪ್ರಸ್ತಾಪಿಸಿದ್ದರು. ಬಲವಾದ ಪೊಲೀಸ್‌ ರಕ್ಷಣೆ ಇಲ್ಲದೆ ಪೂರ್ಣ ಪ್ರಮಾಣದ ಸಮೀಕ್ಷೆ ಕಾರ್ಯ ನಡೆಸಲು ಅಸಾಧ್ಯ ಎಂದು ವಿವರಿಸಿದ್ದರು. ಅವರು ನೀಡಿದ ಈ ವರದಿ ಬಳಿಕ ಸಮೀಕ್ಷೆ ಕೆಲಸ ಅಷ್ಟಕ್ಕೇ ಸ್ಥಗಿತಗೊಂಡಿದೆ.

ಬೆಂಗಳೂರು ನಗರ ಜಿಲ್ಲಾಧಿಕಾರಿ ಹಾಗೂ ತಹಶೀಲ್ದಾರರಿಗೆ ಮ್ಯಾಜಿಸ್ಟ್ರೇಟ್‌ ಅಧಿಕಾರವೂ ಇದೆ. ಸರ್ಕಾರಿ ಭೂಮಿ ಸಂರಕ್ಷಿಸುವ ಹೊಣೆಗಾರಿಕೆಯೂ ಅವರ ಮೇಲಿದೆ. ಆದರೆ, ಅತಿಕ್ರಮಣ ತೆರವುಗೊಳಿಸಲು ಅವರು ಇದುವರೆಗೆ ಕ್ರಮ ಕೈಗೊಂಡಿಲ್ಲ. ಅತಿಕ್ರಮಣದ ವಿರುದ್ಧ ಸ್ಥಳೀಯರು ಯಾರಾದರೂ ಧ್ವನಿ ಎತ್ತಿದರೆ ಅವರ ಧ್ವನಿ ಅಡಗಿಸುವ ಕಲೆ ಭೂಗಳ್ಳರಿಗೆ ಚೆನ್ನಾಗಿ ಕರಗತವಾಗಿದೆ.

ತೋಳ್ಬಲವನ್ನೂ ಬಳಕೆ ಮಾಡಲಾಗುತ್ತಿದೆ. ಇತ್ತೀಚೆಗೆ ಛಾಯಾಗ್ರಾಹಕರೊಬ್ಬರು ಅತಿಕ್ರಮಿತ ಪ್ರದೇಶದ ಫೋಟೊ ತೆಗೆಯಲು ಹೋದಾಗ ಕೆಲವು ಕಟ್ಟುಮಸ್ತಾದ ಯುವಕರು ಬಂದು ಫೋಟೊ ತೆಗೆಯದಂತೆ ಸೂಚಿಸಿದ್ದಲ್ಲದೆ, ತಕ್ಷಣ ಜಾಗ ಖಾಲಿ ಮಾಡುವಂತೆ ಬೆದರಿಕೆ ಒಡ್ಡಿದ ಘಟನೆಯೂ ನಡೆದಿದೆ.

ಕೆರೆ ಅತಿಕ್ರಮಣದಲ್ಲಿ ರಾಜಕಾರಣಿಗಳ ಪಾತ್ರವೇ ಹಿರಿದು ಎಂದು ದೂರುತ್ತಾರೆ ಕರ್ನಾಟಕ ಪ್ರದೇಶ ಕಾಂಗ್ರೆಸ್‌ ಸಮಿತಿ ಕಾರ್ಯದರ್ಶಿ ಗುರಪ್ಪ ನಾಯ್ಡು. ‘ಜನಪ್ರತಿನಿಧಿಗಳ ಪಾಲ್ಗೊಳ್ಳುವಿಕೆ ಇಲ್ಲವೆ ಸಹಕಾರ ಇಲ್ಲದೆ ಯಾವುದೇ ಅಕ್ರಮಗಳೂ ನಡೆಯುವುದು ಅಸಾಧ್ಯ. ಹೀಗಾಗಿ ಕೆರೆ ಕಣ್ಮರೆಯಾದರೂ ಮೌನವಾಗಿರುವ ರಾಜಕಾರಣಿಗಳ ಕಡೆ ನಾವು ಅನುಮಾನದಿಂದ ನೋಡಲೇಬೇಕಿದೆ’ ಎಂದು ಅವರು
ಹೇಳುತ್ತಾರೆ.

ಕಾಂಗ್ರೆಸ್‌ ಸರ್ಕಾರವೇ ರಾಜ್ಯದಲ್ಲಿ ಅಸ್ತಿತ್ವದಲ್ಲಿದ್ದರೂ ನಾಯ್ಡು ಅವರಿಗೂ ಕೆರೆ ಅತಿಕ್ರಮಣ ತೆರವುಗೊಳಿಸಲು ಮುಂದಾಗುವಂತೆ ಸರ್ಕಾರದ ಮೇಲೆ ಒತ್ತಡ ಹೇರಲು ಆಗಿಲ್ಲ. ಕಳೆದ ವರ್ಷ ವಿಧಾನಸಭಾ ಚುನಾವಣೆ ನಡೆದಾಗ ಕೆಪಿಸಿಸಿ ಅಧ್ಯಕ್ಷ ಜಿ. ಪರಮೇಶ್ವರ್‌ ನೇತೃತ್ವದಲ್ಲಿ ಕಾಂಗ್ರೆಸ್‌ ಕಾರ್ಯಕರ್ತರು ಕೆರೆಗೆ ಪಾದಯಾತ್ರೆ ನಡೆಸಿದ್ದರು. ಆ ಹೋರಾಟವೂ ಫಲ ನೀಡಿಲ್ಲ.

ರಾಜಕಾಲುವೆಯೂ ಕಣ್ಮರೆ!
ಬೆಂಗಳೂರು: ಕೆರೆ ಹಾಗೂ ನದಿಗಳಿಗೆ ಮಳೆ ನೀರು ಒಯ್ಯುವ ರಾಜಕಾಲುವೆಗಳ ಒತ್ತುವರಿ ಕುರಿತಂತೆ ಹೈಕೋರ್ಟ್‌ನಲ್ಲಿ ಹಲವು ದಾವೆಗಳು ದಾಖಲಾಗಿ ಒತ್ತಡ ಹೆಚ್ಚಾಗಿದ್ದರಿಂದ ಜಿಲ್ಲಾಡಳಿತ ಬೃಹತ್‌ ನೀರುಗಾಲುವೆ (ರಾಜಕಾಲುವೆ)ಗಳ ಸಮೀಕ್ಷೆ ನಡೆಸಿದೆ.