ಮಳೆ ನೋಡೋಣು ಬಾರಾ...

ಮಳೆಗಾಲದಲ್ಲಿ ಜಲಪಾತಗಳ ಭೋರ್ಗರೆತ – ನೊರೆನೊರೆ ನೀರ ನರ್ತನದ ಸೊಬಗು, ಈಗಷ್ಟೇ ಮಿಂದು ಬಂದು ಅಂಗಳಕ್ಕೆ ನಿಂತ ತರುಣಿಯಂಥ ಸಮೃದ್ಧ  ಪ್ರಕೃತಿಯನ್ನು ಮನದಣಿಯೇ ಆಸ್ವಾದಿಸಬಯಸುವವರು ಉತ್ತರಕನ್ನಡಕ್ಕೆ ಹೊರಡಲು ಇದು ಸಕಾಲ.

ಹೇಳಿಕೇಳಿ ಉತ್ತರ ಕನ್ನಡವೆಂಬುದು ಜಲಪಾತಗಳ ಜಿಲ್ಲೆ ಎಂದೇ ಪ್ರಸಿದ್ಧ. ನಡುಮಳೆಗಾಲದಲ್ಲಿ ಇಲ್ಲಿ ಲಗ್ಗೆಯಿಟ್ಟರಂತೂ ಕಡಿದಾದ ದಾರಿ ಬದಿಗಳಲ್ಲಿ, ಎತ್ತರದ ಗುಡ್ಡಗಳ ಒಡಲಲ್ಲಿ ಎಲ್ಲಿ ನೋಡಿದರಲ್ಲಿ ಅರೆಕಾಲಿಕ ಜಲಪಾತಗಳು ಹುಟ್ಟಿಕೊಂಡಿರುತ್ತವೆ.

ಒಂದು ವಾರಾಂತ್ಯ – ಅಂದರೆ ಎರಡು ದಿನದ ಪ್ರವಾಸ ನಿಮ್ಮದಾಗಿದ್ದರೆ ನೀವು ಉತ್ತರ ಕನ್ನಡದ ಯಲ್ಲಾಪುರವನ್ನು ನಿಮ್ಮ ವಿಹಾರದ ವಸತಿ ಕೇಂದ್ರವಾಗಿರಿಸಿಕೊಳ್ಳುವುದು ಸೂಕ್ತ.

ಯಲ್ಲಾಪುರ ದೊಡ್ಡ ಪಟ್ಟಣವೇನೂ ಅಲ್ಲ. ಐಷಾರಾಮಿ ಹೋಟೆಲ್‌ಗಳು, ಹೋಂ ಸ್ಟೇಗಳು, ರೆಸ್ಟೊರೆಂಟ್‌ಗಳು ಇಲ್ಲಿ ಎಡತಾಕುವುದಿಲ್ಲ. ಆದರೆ ಸರಳ ವಸತಿಗೆ ಯಾವುದೇ ಕುಂದಿಲ್ಲದ ಲಾಡ್ಜ್‌ಗಳು ಇವೆ.

ಯಲ್ಲಾಪುರವನ್ನು ವಸತಿ ಕೇಂದ್ರವಾಗಿರಿಸಿಕೊಂಡು ಯಾವ್ಯಾವ ಸ್ಥಳಗಳಿಗೆ ಭೇಟಿ ನೀಡಬಹುದು ಎಂದು ನೋಡೋಣ.
ಒಂದು ಶನಿವಾರದ ಬೆಳಿಗ್ಗೆ ಆರು ಗಂಟೆಗೆ ನೀವು ಯಲ್ಲಾಪುರದಲ್ಲಿದ್ದೀರಿ ಎಂದುಕೊಳ್ಳಿ. ಮೋಡದ ಮರೆಯಿಂದಲೇ ಬಿರಿದುಕೊಳ್ಳುತ್ತಿರುವ ರವಿಯ ಮಂದಬೆಳಕಿಗೆ ಸಣ್ಣಗೆ ಹನಿಯುತ್ತಿರುವ ಸೋನೆಮಳೆಯಲ್ಲಿಯೇ ಪೇಟೆ ದೈನಂದಿನ ಚಟುವಟಿಕೆಗಳಿಗೆ ಅಣಿಯಾಗುತ್ತಿರುವ ಸಮಯವದು.

ಯಾವುದೋ ಅಂಗಡಿಯ ಮುಂದೆ ದಿನಪತ್ರಿಕೆಗಳನ್ನು ಲೆಕ್ಕಹಾಕಿ ಮಡಿಚಿ ಮಳೆಯಲ್ಲಿ ನೆನೆಯದಂತೆ ಪ್ಲಾಸ್ಟಿಕ್‌ ಕವರ್‌ನಲ್ಲಿ ಕಟ್ಟಿ ಸೈಕಲ್‌ ಕ್ಯಾರಿಯರ್‌ ಏರಿಸುತ್ತಿರುವ ಹುಡುಗರು, ರಸ್ತೆ ಪಕ್ಕದ ಕಾಂಪೌಂಡಿನೊಳಗೆ ಕೊಡೆಹಿಡಿದು, ಚಳಿಗೆ ಸಣ್ಣಗೇ ನಡುಗುತ್ತಲೇ ಗಿಡದ ಕೊಂಬೆ ಬಗ್ಗಿಸಿ ದಾಸವಾಳ, ನಂಜಾಟಲೆ ಹೂಗಳನ್ನು ಕಿತ್ತು ಚಬ್ಬೆಗೆ ತುಂಬುತ್ತಿರುವ ಬರಿಮೈ ಹಿರಿಯರೂ ನಿಮ್ಮ ಕಣ್ಣಿಗೆ ಬೀಳಬಹುದು. ಅವೆಲ್ಲ ಯಲ್ಲಾಪುರದ ಬೆಳಗಿನ ಭಾಗ.

ಹೆಚ್ಚು ಸಮಯ ವ್ಯಯಮಾಡುವುದು ಬೇಡ. ನೀವು ಆಯ್ದುಕೊಂಡು ಮುಂಗಡವಾಗಿ ಕಾಯ್ದಿರಿಸಿದ ಹೋಟೆಲ್‌ ರೂಮಿಗೆ ಹೋಗಿ ಬೆಳಗಿನ ದಿನಚರಿಗಳನ್ನು ಮುಗಿಸಿ ತಿಂಡಿ ತಿಂದು ತಯಾರಾಗಿ. ಆಗಲೇ ಎಂಟರ ಗಡಿ ಮುಟ್ಟಿರುತ್ತದೆ. ಈಗ ನಿಮ್ಮ ಮುಂದೆ ಎರಡು ದಿಕ್ಕುಗಳ ಆಯ್ಕೆಯಿದೆ. ಒಂದು ಯಲ್ಲಾಪುರದಿಂದ ಹೊರವಲಯದಲ್ಲಿರುವ ಕೆಲವು ತಾಣಗಳನ್ನು ನೋಡುವುದು. ಇನ್ನೊಂದು ಯಲ್ಲಾಪುರದ ಸಮೀಪದಲ್ಲಿಯೇ ಇರುವ ತಾಣಗಳಿಗೆ ಭೇಟಿ ನೀಡುವುದು.

ಒಂದನೇ ಆಯ್ಕೆಯ ಮೊದಲ ತಾಣ ಯಾಣದ ಸಮೀಪವಿರುವ ವಿಭೂತಿ ಜಲಪಾತ. ಯಲ್ಲಾಪುರದಿಂದ 60 ಕಿ.ಮೀ ದೂರದಲ್ಲಿರುವ ವಿಭೂತಿ ಫಾಲ್ಸ್‌ಗೆ ಹೋಗಲು ‘ಎನ್‌ಎಚ್‌ 52’ರಲ್ಲಿ ಕಾರವಾರದತ್ತ ಸಾಗಬೇಕು. ರಾಷ್ಟ್ರೀಯ ಹೆದ್ದಾರಿಯಾದ್ದರಿಂದ ರಸ್ತೆಯ ಪರಿಸ್ಥಿತಿಯ ಬಗ್ಗೆ ಹೆಚ್ಚು ತಲೆಕೆಡಿಸಿಕೊಳ್ಳಬೇಕಾಗಿಲ್ಲ. ಆದರೆ ಅರಬೈಲ್‌ ಘಟ್ಟದ ಕಡಿದಾದ ತಿರುವುಗಳಲ್ಲಿ ಮಾತ್ರ ಎಚ್ಚರಿಕೆಯಿಂದಲೇ ಸಾಗಬೇಕು.

ಹೆದ್ದಾರಿಯಲ್ಲಿಯೇ 45 ಕಿ.ಮೀ ಸಾಗಿದರೆ ಹೆಬ್ಬುಳ ಎಂಬ ಊರು ಸಿಗುತ್ತದೆ. ಆ ಊರು ದಾಟಿ ಸ್ವಲ್ಪ ಮುಂದೆ ಹೋದ ಕೂಡಲೇ ಎಡಕ್ಕೆ (ಗೋಕರ್ಣಕ್ಕೆ ಹೋಗುವ ರಸ್ತೆ) ಹೊರಳಿಕೊಳ್ಳಬೇಕು. ಅದೇ ರಸ್ತೆಯಲ್ಲಿ ಸುಮಾರು ಮೂರು ಕಿ.ಮೀ. ಸಾಗಿದರೆ ರಸ್ತೆ ಕವಲೊಡೆಯುತ್ತದೆ. ಅಲ್ಲಿ ಮತ್ತೆ ಎಡಕ್ಕೆ ಹೊರಳಿಕೊಳ್ಳಬೇಕು. ಅದು ನಿಮ್ಮನ್ನು ವಿಭೂತಿ ಜಲಪಾತದ ಸನಿಹಕ್ಕೆ ಕೊಂಡೊಯ್ಯುತ್ತದೆ. ಆ ರಸ್ತೆಯಲ್ಲಿ ಸಾಗುವಷ್ಟೂ ಸಾಗಿದ ನಂತರ ಒಂದಿಷ್ಟು ದೂರ ಕಾಡಿನ ದಾರಿಯಲ್ಲಿ ನಡೆದುಕೊಂಡು ಹೋದರೆ ಬೆಟ್ಟ ಸಾಲಿನ ನಡುವೆ ಹಂತ ಹಂತವಾಗಿ ಹರಿದು ಬರುತ್ತಿರುವ ನೊರೆನೊರೆ ಜಲಪಾತ ಸ್ವಾಗತಿಸುತ್ತದೆ.

ಯಲ್ಲಾಪುರದಿಂದ ವಿಭೂತಿ ಜಲಪಾತಕ್ಕೆ ಸುಮಾರು ಒಂದೂವರೆ ಗಂಟೆಯ ಪ್ರಯಾಣ. ದಾರಿಯಿಂದ ಮುಂದುವರಿದರೆ ಬೃಹತ್‌್ ಕಲ್ಲುಬಂಡೆಗಳ ತಾಣ ಯಾಣ ಸಿಗುತ್ತದೆ. ಅದನ್ನೂ ನೋಡಿಕೊಂಡು ಹಾಗೆಯೇ ಶಿರಸಿಯತ್ತ ಪ್ರಯಾಣ ಬೆಳೆಸಬಹುದು. ಅದು ಮತ್ತೆ ಒಂದೂವರೆ ಗಂಟೆ ಪ್ರಯಾಣ. ಮಧ್ಯಾಹ್ನ ಊಟಕ್ಕೆ ಶಿರಸಿಗೆ ತಲುಪಿಕೊಳ್ಳುವುದು ಒಳ್ಳೆಯದು. ಶಿರಸಿಯಲ್ಲಿ ಊಟ ಪೂರೈಸಿಕೊಂಡು ಮುಂದುವರಿಯಬಹುದು.
ಶಿರಸಿಯಿಂದ 23 ಕಿ.ಮೀ. ದೂರದಲ್ಲಿ ಮುರೆಗಾರ್‌ ಜಲತಾಪವಿದೆ. ಅದನ್ನು ತೆಪ್ಪಿಗೆ ಫಾಲ್ಸ್ ಎಂದೂ ಕರೆಯುತ್ತಾರೆ.

ಶಿರಸಿಯಿಂದ ಹುಲೇಕಲ್‌ಗೆ ಹೋಗುವ ರಸ್ತೆಯಲ್ಲಿ 10 ಕಿ.ಮೀ. ಸಾಗಿದರೆ ‘ಸಾಲ್ಕಣಿ ಕ್ರಾಸ್‌’ ಸಿಗುತ್ತದೆ. ಅಲ್ಲಿಂದ ಏಳು ಕಿ.ಮೀ ಸಾಗಿ ಮುರೇಗಾರ್‌ ಕ್ರಾಸ್‌ನಲ್ಲಿ ಬಲಕ್ಕೆ ತಿರುಗಿಕೊಳ್ಳಿ. ಅಲ್ಲಿಂದ 1.5 ಕಿ.ಮೀ ದೂರದಲ್ಲಿ ‘ದುಗ್ಗುಮನೆ ಬಸ್‌ಸ್ಟಾಪ್‌’ ಸಿಗುತ್ತದೆ. ಅಲ್ಲಿ ಮುರೇಗಾರ್‌ ರಸ್ತೆಯಲ್ಲಿ ಸಾಗಿದರೆ ನಾಲ್ಕು ಕಿ.ಮೀ ದೂರದಲ್ಲಿ ಜಲಪಾತವಿದೆ. ಶಿರಸಿಯಿಂದ ಮುರೆಗಾರ್‌ಗೆ ಮುಕ್ಕಾಲು ಗಂಟೆ ಪ್ರಯಾಣ.

ಮುರೆಗಾರ್‌ ಹಳ್ಳದ ನೀರು ದೊಡ್ಡ ಬಂಡೆಗಳ ನಡುವಿನಿಂದ ಧುಮ್ಮಿಕ್ಕುವ ಈ ಜಲಪಾತದ ಚೆಂದ, ಈ ಮೊದಲು ನೋಡಿದ ವಿಭೂತಿ ಫಾಲ್ಸ್‌ನ ಆರ್ಭಟಕ್ಕಿಂತ ಭಿನ್ನವಾದದ್ದು. ದೈವಭಕ್ತರಿಗೆ ಶಿವಲಿಂಗ, ಗಣೇಶ, ಷಣ್ಮುಖ ಮೂರ್ತಿಗಳ ದರ್ಶನವೂ ಇಲ್ಲಿ ಸಿಗುತ್ತವೆ.

ಮಳೆಗಾಲದಲ್ಲಿ ಪರ್ವತ ಏರುವ ಮಜವೇ ಬೇರೆ. ಆ ಮಜ ಅನುಭವಿಸುವ ಆಸೆ ನಿಮಗಿದ್ದರೆ ಶಿರಸಿಯಿಂದ ಮೂವತ್ತು ಕಿ.ಮೀ. ದೂರದಲ್ಲಿರುವ ಭೀಮನ ಏರಿ ಗುಡ್ಡ ನಿಮಗಾಗಿ ಕಾಯುತ್ತ ನಿಂತಿದೆ. ಎತ್ತರದ ಪರ್ವತದ ನೆತ್ತಿಯಲ್ಲಿ ನಿಂತು ಸುತ್ತಲಿನ ಹಸಿರು ಜಗತ್ತನ್ನು ನೋಡುವ ಆಹ್ಲಾದ ಅನುಭವಿಸಬಹುದು. ಶಿರಸಿಯಿಂದ ಅಮ್ಮಿನಹಳ್ಳಿ ಹೆಗ್ಗರಣಿ ರಸ್ತೆ ಹಿಡಿದು ಹೋಗಿ ಭೀಮನ ಏರಿಯನ್ನು ಏರಿ ಸಂಜೆಯವರೆಗೂ ಕಾದರೆ ಆಕಾಶ ಮೋಡಗಳನ್ನು ಕೊಡವಿಕೊಂಡು ಅದೃಷ್ಟವನ್ನು ದಯಪಾಲಿಸಿದರೆ ಒಂದು ಸುಂದರ ಸೂರ್ಯಾಸ್ತ ನೋಡುವ ಅವಕಾಶವೂ ಸಿಗಬಹುದು.

ಎರಡು ಜಲಪಾತದಲ್ಲಿ ನೆನೆದು, ಒಂದು ಪರ್ವತ ಆರೋಹಣ ಮಾಡಿ ಇನ್ನೂ ಸುತ್ತುವ ಚೈತನ್ಯ ಮತ್ತು ಸಮಯ ಉಳಿದಿದೆಯೆಂದಾದರೆ ಮರಳಿ ಶಿರಸಿಗೆ ಬಂದು ಉತ್ತರ ಕನ್ನಡ ಮತ್ತು ಶಿವಮೊಗ್ಗ ಜಿಲ್ಲೆಯ ಗಡಿಯಲ್ಲಿರುವ ಜೋಗದ ಮಳೆಗಾಲದ ಸೊಬಗನ್ನೂ ನೋಡಿಕೊಂಡು ಬರಬಹುದು. ಇಲ್ಲವಾದರೆ ಮರಳಿ ಶಿರಸಿಗೆ ಬಂದು ಯಲ್ಲಾಪುರದ ದಾರಿ ಹಿಡಿಯಬಹುದು. ಶಿರಸಿಯಿಂದ ಯಲ್ಲಾಪುರ 50 ಕಿ.ಮೀ. ಒಂದು ಗಂಟೆಯಲ್ಲಿ ಕ್ರಮಿಸಬಹುದು.
ಇಲ್ಲಿಗೆ ನಿಮ್ಮ ಒಂದು ದಿನದ ಪ್ರವಾಸ ಮುಗಿದಂತಾಯ್ತು.

ಮೊದಲ ದಿನದ ತುಸು ಹೆಚ್ಚೇ ಅನಿಸುವಷ್ಟು ಸುತ್ತಾಡಿದ್ದರಿಂದ ಮರುದಿನ ಬೆಳಿಗ್ಗೆ ಬೇಗ ಏಳುವ ಮನಸ್ಥಿತಿಯಲ್ಲಿ ನೀವು ಇರುವುದಿಲ್ಲ. ತುಂಬಾ ಬೇಗ ಏಳಬೇಕಾಗಿಯೂ ಇಲ್ಲ ಬಿಡಿ. ಯಾಕೆಂದರೆ ಈ ದಿನ ನೀವು ಭೇಟಿ ನೀಡಲಿರುವ ಸ್ಥಳಗಳು ಅಷ್ಟೊಂದು ಹೆಚ್ಚು ದೂರದ ಪ್ರಯಾಣವನ್ನು ಬೇಡುವುದಿಲ್ಲ.

ಎರಡನೇ ದಿನ ನೀವು ನೋಡಬೇಕಾಗಿರುವುದು ಎರಡು ಜಲಪಾತಗಳು ಮತ್ತು ಒಂದು ವ್ಯೂ ಪಾಯಿಂಟ್‌. ಸಾತೊಡ್ಡಿ ಜಲಪಾತ, ಮಾಗೋಡು ಜಲಪಾತ ಮತ್ತು ಜೇನುಕಲ್ಲು ಗುಡ್ಡ. ಯಾವುದನ್ನು ಬೇಕಾದರೂ ಮೊದಲು ಆರಿಸಿಕೊಳ್ಳಬಹುದು. ಜೇನುಕಲ್ಲು ಗುಡ್ಡ ಮತ್ತು ಮಾಗೋಡು ಜಲಪಾತ ಒಂದೇ ದಿಕ್ಕಿನಲ್ಲಿವೆ ಮತ್ತು ಪರಸ್ಪರ ಐದು ಕಿ.ಮೀ ಅಂತರದಲ್ಲಿವೆ.

ಯಲ್ಲಾಪುರದಿಂದ ಜೇನುಕಲ್ಲು ಗುಡ್ಡಕ್ಕೆ ಹದಿನಾರು ಕಿ.ಮೀ ದೂರ. ಅಂದರೆ ಗರಿಷ್ಠ ಅರ್ಧ ಗಂಟೆಯ ಪ್ರಯಾಣವಷ್ಟೇ. ಅಲ್ಲಿ ಗುಡ್ಡದ ಮೇಲೆ ನಿಂತು ಸಾಲು ಸಾಲು ಪರ್ವತಶ್ರೇಣಿಗಳು, ನಡುವೆ ತೆಳ್ಳಗೆ ಬಳುಕುತ್ತ ಹರಿಯುತ್ತಿರುವ ಗಂಗಾವಳಿಯ ಮನೋಹರ ದೃಶ್ಯವನ್ನು ಕಣ್ತುಂಬಿಕೊಳ್ಳಬಹುದು. ನಂತರ ಅಲ್ಲಿಂದ ಮಾಗೋಡು ಜಲಪಾತದತ್ತ ಹೊರಡಬಹುದು.

ಬೆಟ್ಟದ ತುತ್ತ ತುದಿಯಿಂದ ನೆಗೆದು ಮಧ್ಯದಲ್ಲೊಮ್ಮೆ ಅರೆಮರೆಯಾಗಿ ನಂತರ ಒಮ್ಮೆಲೇ ಗರಿಬಿಚ್ಚಿಕೊಂಡು ಧುಮುಕುವ ಮಾಗೋಡು ಜಲಪಾತದ ಕೆನ್ನೀರಿನ ಆರ್ಭಟವನ್ನು ಮಳೆಗಾಲದಲ್ಲಿ ಸವಿಯುತ್ತ ಮೈಮರೆಯದೇ ಇರಲಾಗುವುದಿಲ್ಲ.