ಮಹತ್ವದ ಒಪ್ಪಂದ

ಕಳೆದ ವಾರ ಭಾರತ ಮತ್ತು ಆಸ್ಟ್ರೇಲಿಯಾದ ಪ್ರಧಾನ ಮಂತ್ರಿಗಳು ನಾಗರಿಕ ಪರಮಾಣು ಒಪ್ಪಂದಕ್ಕೆ ಸಹಿ ಹಾಕುವುದರೊಂದಿಗೆ ಉಭಯ ದೇಶಗಳ ಸಂಬಂಧಕ್ಕೆ ಮತ್ತಷ್ಟು ಬಲ ಬಂದಿದೆ.  ಇದರಿಂದ ಪರಮಾಣು ವಿದ್ಯುತ್‌ ಸ್ಥಾವರಗಳನ್ನು ನಿರ್ವಹಿಸಲು ಭಾರತಕ್ಕೆ ಹೆಚ್ಚು ಅನುಕೂಲವಾಗ­ಲಿದೆ. ನಮ್ಮ ಪರಮಾಣು ವಿದ್ಯುತ್‌ ಸ್ಥಾವರಗಳಿಗೆ ಬೇಕಾದ ಯುರೇನಿಯಂ ಇಂಧನಕ್ಕಾಗಿ  ಕೆಲಮಟ್ಟಿಗೆ ವಿದೇಶಗಳನ್ನೆ ಅವಲಂಬಿಸಿರುವ ಸಂದರ್ಭದಲ್ಲಿ ಇದು ಮಹತ್ವದ್ದು . ಈ ಒಪ್ಪಂದದ ಪ್ರಕಾರ, ಯುರೇನಿಯಂ ಅನ್ನು  ಭಾರತಕ್ಕೆ ಆಸ್ಟ್ರೇಲಿಯಾ ಮಾರಾಟ ಮಾಡಲಿದೆ. 

ಜಲ, ಕಲ್ಲಿದ್ದಲು ಮುಂತಾದ ಸಾಂಪ್ರದಾಯಿಕ ಮೂಲಗಳಿಂದ ವಿದ್ಯುತ್‌ ಉತ್ಪಾದಿಸುವ ನಮ್ಮ ಈಗಿನ ವ್ಯವಸ್ಥೆ ಹೆಚ್ಚು ಒತ್ತಡ ಎದುರಿಸುತ್ತಿದೆ. ದೀರ್ಘಾವಧಿಯಲ್ಲಿ ಪರಮಾಣು ಇಂಧನ ಆಧಾರಿತ ವಿದ್ಯುತ್‌ ಮೇಲೆ ಹೆಚ್ಚು ಹೆಚ್ಚು ಅವಲಂಬನೆ ಅನಿವಾರ್ಯ. ಅದಕ್ಕಾಗಿ ಯುರೇನಿಯಂ ಪೂರೈಕೆ ನಿರಂತರವಾಗಿ ನಡೆಯ­ಬೇಕಾಗುತ್ತದೆ. ಭಾರತದ ಪರಮಾಣು ಸ್ಥಾವರಗಳು ಸುಮಾರು 4,680 ಮೆಗಾ­ವಾಟ್. ವಿದ್ಯುತ್‌ ಉತ್ಪಾದಿಸುತ್ತಿವೆ. ಈ ಪೈಕಿ 2,840 ಮೆ.ವಾ. ಉತ್ಪಾದನೆಗೆ ದೇಶಿ ಯುರೇನಿಯಂ ಬಳಕೆಯಾಗುತ್ತಿದೆ. ಉಳಿದ 1,840 ಮೆ.ವಾ. ವಿದ್ಯುತ್ ಉತ್ಪಾದನೆಗೆ ಆಮದು ಇಂಧನ ಅವಲಂಬಿಸಿದ್ದೇವೆ. 

ಸದ್ಯಕ್ಕೆ ಭಾರತ ಕಝಕಿಸ್ತಾನ ಹಾಗೂ ರಷ್ಯಾದಿಂದ ಯುರೇನಿಯಂ ಅನ್ನು ಆಮದು ಮಾಡಿಕೊಳ್ಳುತ್ತಿದೆ. ಉಜ್ಬೆಕಿಸ್ತಾನದಿಂದಲೂ ಯುರೇನಿಯಂ ಆಮದು ಮಾಡಿಕೊಳ್ಳಲು ಭಾರತ ಒಪ್ಪಂದ ಮಾಡಿಕೊಂಡಿದೆ. ಈ ಆಮದು ವ್ಯವಹಾರ   2015ರಿಂದ  ಆರಂಭವಾಗಲಿದೆ.    ಇಂತಹ ಸಂದರ್ಭದಲ್ಲಿ   ಆಸ್ಟ್ರೇಲಿಯಾ ಜೊತೆಗಿನ ಒಪ್ಪಂದ, ಗಮನಾರ್ಹ ಬೆಳವಣಿಗೆ.