ಪಣಜಿ (ಪಿಟಿಐ): ರಷ್ಯಾದ ಪ್ರವಾಸಿ ಮಹಿಳೆ ಮೇಲೆ ಸರ್ಕಾರಿ ವೈದ್ಯರು ಎಸಗಿದ್ದಾರೆ ಎನ್ನಲಾದ ಲೈಂಗಿಕ ದೌರ್ಜನ್ಯಕ್ಕೆ ಮಹಿಳಾ ದುಭಾಷಿಯೊಬ್ಬರು ಮುಖ್ಯ ಸಾಕ್ಷಿಯಾಗಿದ್ದಾರೆ ಎಂದು ರಷ್ಯಾ ಕಾನ್ಸುಲೇಟ್ ಪರ ವಕೀಲ ವಿಕ್ರಮ್ ವರ್ಮಾ ತಿಳಿಸಿದ್ದಾರೆ.
ಗೋವಾದ ಬಾಗಾ ಬೀಚ್ನಲ್ಲಿ ಗುಂಪೊಂದರಿಂದ ಲೈಂಗಿಕ ದೌರ್ಜನ್ಯ ಮತ್ತು ಹಲ್ಲೆಗೆ ಒಳಗಾಗಿದ್ದ ರಷ್ಯಾದ ಮಹಿಳೆಯನ್ನು ತಪಾಸಣೆಗಾಗಿ ಗೋವಾ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆಗೆ (ಜಿಎಂಸಿಎಚ್) ಕಳುಹಿಸಲಾಗಿತ್ತು. ಆಕೆಗೆ ನೆರವಾಗಲು ರಷ್ಯಾದವರೇ ಆದ ಮಹಿಳಾ ದುಭಾಷಿಯೊಬ್ಬರೂ ಜತೆಗಿದ್ದರು.
ಆಸ್ಪತ್ರೆಯಲ್ಲಿ ತಪಾಸಣೆ ವೇಳೆ ಪುರುಷ ವೈದ್ಯರೊಬ್ಬರು ಪ್ರವಾಸಿ ಮಹಿಳೆ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ್ದರು. ಅದಕ್ಕೆ ಮಹಿಳಾ ದುಭಾಷಿ ಮುಖ್ಯ ಸಾಕ್ಷಿಯಾಗಿದ್ದಾರೆ ಎಂದು ಅವರು ಹೇಳಿದ್ದಾರೆ. ಮಹಿಳೆಯ ಕತ್ತಿನ ಬಳಿ ಗಾಯಗಳಾಗಿದ್ದರಿಂದ ಅವರನ್ನು ವೈದ್ಯಕೀಯ ಪರೀಕ್ಷೆಗೆ ಒಳಪಡಿಸಬೇಕಾಯಿತು ಎಂದು ಜಿಎಂಸಿಎಚ್ನ ಹಿರಿಯ ಅಧಿಕಾರಿಗಳು ಹೇಳಿದ್ದಾರೆ. ಆದರೆ, ಮಹಿಳೆ ಅತ್ಯಾಚಾರದ ದೂರು ನೀಡಿರದಿದ್ದರೂ ಆಕೆಯ ಗುಪ್ತಾಂಗದ ತಪಾಸಣೆ ನಡೆಸಬೇಕು ಎಂದು ವೈದ್ಯರು ಒತ್ತಾಯ ಮಾಡಿದ್ದರು ಎಂದು ವರ್ಮಾ ಹೇಳಿದರು.