ಬೆಂಗಳೂರು: ಮೇಯರ್ ಬಿ.ಎಸ್. ಸತ್ಯನಾರಾಯಣ ಹಾಗೂ ಉಪ ಮೇಯರ್ ಇಂದಿರಾ ಅವರ ಆಡಳಿತಾವಧಿ ಇನ್ನು 15 ದಿನಗಳಲ್ಲಿ (ಸೆ. 4ರಂದು) ಕೊನೆಗೊಳ್ಳಲಿದ್ದು, ಆ ಹುದ್ದೆಗಳಿಗೆ ಏರಲು ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ)ಯ ಬಿಜೆಪಿ ಸದಸ್ಯರ ಮಧ್ಯೆ ತೀವ್ರ ಸ್ಪರ್ಧೆ ಏರ್ಪಟ್ಟಿದೆ.
ಪ್ರಸಕ್ತ ಕೌನ್ಸಿಲ್ನ ಕೊನೆಯ ಅವಧಿ ಇದಾಗಿದ್ದು, 2015ರ ಏಪ್ರಿಲ್ನಲ್ಲಿ ಮತ್ತೆ ಚುನಾವಣೆ ನಡೆಯಲಿದೆ. ಹೀಗಾಗಿ ಸೆಪ್ಟೆಂಬರ್ನಲ್ಲಿ ಆಯ್ಕೆಯಾಗಲಿರುವ ನೂತನ ಮೇಯರ್–ಉಪಮೇಯರ್ ಅವರಿಗೆ ಕೇವಲ ಆರು ತಿಂಗಳ ಆಡಳಿತಾವಧಿ ಸಿಗಲಿದೆ. ಎರಡೂ ಹುದ್ದೆಗಳನ್ನು ಸಾಮಾನ್ಯ ವರ್ಗಕ್ಕೆ ಮೀಸಲು ಇಟ್ಟಿರುವುದರಿಂದ ಎಲ್ಲ ಬಿಜೆಪಿ ಸದಸ್ಯರೂ ತಮ್ಮ ಸಾಮರ್ಥ್ಯಕ್ಕೆ ತಕ್ಕಂತೆ ಪ್ರಯತ್ನ ನಡೆಸಿದ್ದಾರೆ.
ತಮಗೊಂದು ಅವಕಾಶ ನೀಡುವಂತೆ ಹಿರಿಯ ಸದಸ್ಯರು ನಾಯಕರ ಮನೆಗೆ ಎಡತಾಕುತ್ತಿದ್ದಾರೆ. ತಮ್ಮ ಪರ ಲಾಬಿಗೆ ಎಲ್ಲ ಪ್ರಭಾವವನ್ನೂ ಬಳಸುತ್ತಿದ್ದಾರೆ. ಪಕ್ಷದಲ್ಲಿ ಪ್ರಭಾವಿ ನಾಯಕ ಎನಿಸಿರುವ ಆರ್. ಅಶೋಕ ಅವರ ಸಮ್ಮತಿ ಪಡೆಯಲು ಆಕಾಂಕ್ಷಿಗಳೆಲ್ಲ ಪ್ರಯತ್ನದಲ್ಲಿ ತೊಡಗಿದ್ದಾರೆ ಎಂದು ಬಿಜೆಪಿ ಮೂಲಗಳು ಹೇಳುತ್ತವೆ.
ಕಳೆದ ಅವಧಿಯಲ್ಲೇ ತಮಗೆ ಅವಕಾಶ ನೀಡಬೇಕೆಂದು ಪಟ್ಟು ಹಿಡಿದಿದ್ದ ಮೂಡಲಪಾಳ್ಯ ವಾರ್ಡ್ನ ಸದಸ್ಯೆ ಶಾಂತಕುಮಾರಿ ಅವರ ಹೆಸರು, ಈ ಸಲ ಮೇಯರ್ ಹುದ್ದೆಗೆ ಪ್ರಬಲವಾಗಿ ಕೇಳಿ ಬರುತ್ತಿದೆ. ವಿಧಾನ ಪರಿಷತ್ ಸದಸ್ಯ ವಿ.ಸೋಮಣ್ಣ ಅವರ ಬೆಂಬಲವೂ ಅವರಿಗಿದೆ. ವಿಜ್ಞಾನನಗರ ವಾರ್ಡ್ನ ಗೀತಾ ವಿವೇಕಾನಂದ ಸಹ ಅವಕಾಶಕ್ಕಾಗಿ ಬೇಡಿಕೆ ಇಟ್ಟಿದ್ದಾರೆ.
ಗಂಗಬೈರಯ್ಯ (ಡಾ.ರಾಜಕುಮಾರ್ ವಾರ್ಡ್), ಬಿ.ಆರ್. ನಂಜುಂಡಪ್ಪ (ಜೆ.ಪಿ. ಪಾರ್ಕ್), ಎ.ಎಚ್. ಬಸವರಾಜು (ಬನಶಂಕರಿ ದೇವಸ್ಥಾನ) ಹಾಗೂ ಪಿ.ಎನ್. ಸದಾಶಿವ (ಸುಂಕೇನಹಳ್ಳಿ) ಸಹ ಮೇಯರ್ ಗೌನು ತೊಡಲು ಪ್ರಯತ್ನ ನಡೆಸಿದ್ದಾರೆ. ಎಚ್.ರವೀಂದ್ರ (ವಿಜಯನಗರ), ಸಿ.ಕೆ. ರಾಮಮೂರ್ತಿ (ಪಟ್ಟಾಭಿರಾಮನಗರ) ಅವರ ಹೆಸರುಗಳು ಸಹ ಕೇಳಿಬರುತ್ತಿವೆ.
‘ಪ್ರತಿ ಸಲವೂ ದಕ್ಷಿಣ ವಲಯದ ಸದಸ್ಯರಿಗೆ ಆದ್ಯತೆ ನೀಡಲಾಗುತ್ತಿದೆ’ ಎಂದು ಆಕ್ರೋಶ ವ್ಯಕ್ತಪಡಿಸುವ ಬಿಬಿಎಂಪಿ ಹಿರಿಯ ಸದಸ್ಯರೊಬ್ಬರು, ‘ಬೇರೆ ವಲಯಗಳ ಕಡೆಗೂ ಗಮನ ಹರಿಸುವಂತೆ ಪಕ್ಷದ ನಾಯಕರನ್ನು ಒತ್ತಾಯಿಸುತ್ತೇವೆ’ ಎಂದು ಹೇಳುತ್ತಾರೆ. ‘ಒಕ್ಕಲಿಗ ಮತ್ತು ಕುರುಬ ಸದಸ್ಯರ ಮಧ್ಯೆ ತೀವ್ರ ಪೈಪೋಟಿ ಇದೆ. ಅಂತಿಮವಾಗಿ ಪಕ್ಷದ ನಾಯಕತ್ವ ಯಾರ ಪರ ನಿಲ್ಲುವುದೋ ಕಾಯ್ದು ನೋಡಬೇಕು’ ಎಂದು ವಿವರಿಸುತ್ತಾರೆ.
ಕಳೆದ ಸಲ ಉಪ ಮೇಯರ್ ಹುದ್ದೆಯನ್ನು ಪರಿಶಿಷ್ಟ ಪಂಗಡ (ಮಹಿಳೆ) ಸಮುದಾಯಕ್ಕೆ ಮೀಸಲು ಇಡಲಾಗಿತ್ತು. ಬಿಜೆಪಿಯಲ್ಲಿ ಈ ಸಮುದಾಯಕ್ಕೆ ಸೇರಿದ ಒಬ್ಬ ಸದಸ್ಯರೂ ಇರದ ಕಾರಣ, ಆ ಹುದ್ದೆ ಕಾಂಗ್ರೆಸ್ ಪಾಲಾಗಿತ್ತು. ಈ ಬಾರಿ ಆ ಹುದ್ದೆಯೂ ಸಾಮಾನ್ಯ ವರ್ಗಕ್ಕೆ ಮೀಸಲು ಇಟ್ಟಿರುವುದರಿಂದ ಮೇಯರ್ ಗೌನು ಕೈತಪ್ಪಿದರೆ, ಉಪ ಮೇಯರ್ ಹುದ್ದೆಯಾದರೂ ದಕ್ಕೀತು ಎಂಬ ದೂರದ ಆಲೋಚನೆ ಸ್ಪರ್ಧಿಗಳಲ್ಲಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.