ಬೆಂಗಳೂರು: ಪ್ಲಾಜಾ ಚಿತ್ರಮಂದಿರ ಇದ್ದ ಜಾಗದಲ್ಲಿ ನಿರ್ಮಾಣಗೊಂಡಿರುವ ‘ನಮ್ಮ ಮೆಟ್ರೊ’ದ ಎಂಜಿ ರಸ್ತೆ ನಿಲ್ದಾಣದ ಎರಡನೇ ಪ್ರವೇಶ/ ನಿರ್ಗಮನ ದ್ವಾರದ ಬ್ಲಾಕ್‌ ಅನ್ನು ಸೋಮವಾರ ಸಂಜೆ ಸಾರ್ವಜನಿಕರ ಬಳಕೆಗೆ ಮುಕ್ತಗೊಳಿಸಲಾಯಿತು.
ಈ ಎರಡನೇ ಬ್ಲಾಕ್‌ನ ಉದ್ಘಾಟನೆಯನ್ನು ಅನೌಪಚಾರಿಕವಾಗಿ ನೆರವೇರಿಸಲಾಯಿತು. ಈಗ ಮೆಟ್ರೊ ಪ್ರಯಾಣಿಕರು ಎಂಜಿ ರಸ್ತೆಯ ಎರಡೂ ಬದಿ ಮಾತ್ರವಲ್ಲದೇ ಚರ್ಚ್‌ ರಸ್ತೆಯಿಂದಲೂ ನಿಲ್ದಾಣ ಪ್ರವೇಶಿಸಬಹುದಾಗಿದೆ.
ಮೂರು ವರ್ಷಗಳ ಹಿಂದೆ ಎಂಜಿ ರಸ್ತೆ ಮತ್ತು ಬೈಯಪ್ಪನಹಳ್ಳಿ ನಡುವೆ ಮೆಟ್ರೊ ಸಂಚಾರ ಉದ್ಘಾಟನೆಗೊಂಡಿತ್ತು. ಎರಡನೇ ಬ್ಲಾಕ್‌ ನಿರ್ಮಾಣ ಕಾರ್ಯವು ಎರಡು ವರ್ಷಗಳ ಹಿಂದೆಯೇ ಪೂರ್ಣಗೊಳ್ಳಬೇಕಿತ್ತು. ಈಗ ವಿಳಂಬವಾಗಿ ಬಳಕೆಗೆ ಲಭ್ಯವಾಗಿದೆ. ನಿಲ್ದಾಣದ ಎರಡೂ ಬ್ಲಾಕ್‌ಗಳಲ್ಲಿ ಸ್ಥಳಾವಕಾಶವನ್ನು ವಾಣಿಜ್ಯ ಚಟುವಟಿಕೆಗಳಿಗೆ ನೀಡಲು ಮೆಟ್ರೊ ರೈಲು ನಿಗಮವು ಈಗಾಗಲೇ ಟೆಂಡರ್‌ ಕರೆದಿದೆ.
