ಯಶಸ್ಸಿನ ಹಾದಿಯಲ್ಲಿ ಹೊಸ ಪ್ರಯೋಗ

ಆಳ್ವಾಸ್‌ನಂಥ ಕ್ರೀಡಾ ಪ್ರಿಯ ಶಿಕ್ಷಣ ಸಂಸ್ಥೆಗಳಲ್ಲಿ ತರಬೇತಿ ಪಡೆಯುತ್ತಿರುವ ಕರಾವಳಿ ತಂಡಗಳು, ಭಾರತೀಯ ಕ್ರೀಡಾ ಪ್ರಾಧಿಕಾರ, ಕ್ರೀಡಾ ವಸತಿ ನಿಲಯಗಳಲ್ಲಿ ಕಬಡ್ಡಿ ಕಲಿಯುತ್ತಿರುವ ಬೆಂಗಳೂರು, ಧಾರವಾಡ, ಕೋಲಾರ ಮತ್ತಿತರ ಜಿಲ್ಲೆಗಳ ತಂಡಗಳ ಆಟಗಾರರು ಈ ಬಾರಿಯ ಟೂರ್ನಿಯಲ್ಲಿ ಅಪ್ರತಿಮ ಪ್ರದರ್ಶನ ನೀಡಿ ಹೊಸ ತಲೆಮಾರಿನ ಮೂಲಕ ಕಬಡ್ಡಿ ಮರುಹುಟ್ಟು ಪಡೆಯುತ್ತದೆ ಎಂಬ ಆಸೆಯ ಬೀಜ ಬಿತ್ತಿದ್ದಾರೆ. ಕೋಲಾರ ಜಿಲ್ಲಾ ತಂಡದ ವಿರುದ್ಧ ನಡೆದ ಸೆಮಿಫೈನಲ್‌ನ ಗೋಲ್ಡನ್ ರೈಡ್ ಸಂದರ್ಭದಲ್ಲಿ ಉಡುಪಿ ತಂಡದವರು ತೋರಿದ ಧೈರ್ಯ ಮತ್ತು ತಕ್ಷಣದಲ್ಲಿ ಯೋಜನೆ ರೂಪಿಸಿ ಪಂದ್ಯ ಗೆದ್ದ ವಿಧಾನ ಮಣ್ಣಿನ ಮಕ್ಕಳ ಆಟದ ವೈಭವವನ್ನು ಎತ್ತಿ ಹಿಡಿದಿತ್ತು.

ಹೆಚ್ಚಿದ ಉತ್ಸಾಹ, ಜವಾಬ್ದಾರಿ
1972ರಲ್ಲಿ ರಾಷ್ಟ್ರೀಯ ಕಬಡ್ಡಿ ಫೆಡರೇಷನ್ ಭಾರತೀಯ ಅಮೆಚೂರ್ ಕಬಡ್ಡಿ ಫೆಡರೇಷನ್ ಆಗಿ ಮಾರ್ಪಾಟಾಯಿತು. ರಾಜ್ಯದಲ್ಲೂ ಅಮೆಚೂರ್ ಕಬಡ್ಡಿ ಸಂಸ್ಥೆ ಅಸ್ತಿತ್ವಕ್ಕೆ ಬಂತು. ಆರಂಭದ ವರ್ಷಗಳಲ್ಲಿ ಕೇವಲ 14 ಜಿಲ್ಲೆಗಳು ಮಾತ್ರ ಇದರಲ್ಲಿ ಸದಸ್ಯತ್ವ ಹೊಂದಿದ್ದವು. ಆದರೆ ರಾಜ್ಯ ಮಟ್ಟದಲ್ಲಿ ಟೂರ್ನಿಗಳು ಆರಂಭಗೊಂಡ ನಂತರ ಇನ್ನಷ್ಟು ಜಿಲ್ಲೆಗಳಲ್ಲಿ ಅಮೆಚೂರ್ ಕಬಡ್ಡಿ ಸಂಸ್ಥೆಗಳು ಹುಟ್ಟಿಕೊಂಡವು. ರಾಜ್ಯ ಸಂಸ್ಥೆಯ ಪದಾಧಿಕಾರಿಗಳ ಆಯ್ಕೆಗೆ ಈ ಹಿಂದೆ ರಾಜ್ಯದ 85 ಕ್ಲಬ್‌ಗಳು ಮತ ಹಾಕುತ್ತಿದ್ದವು. ಈಗ ಪ್ರತಿ ಜಿಲ್ಲೆಯಲ್ಲಿ ಎರಡು ಮತಗಳಿವೆ. ಹೀಗಾಗಿ ಹೆಚ್ಚು ಹೆಚ್ಚು ಜಿಲ್ಲೆಗಳನ್ನು ಸಂಸ್ಥೆಯ ವ್ಯಾಪ್ತಿಗೆ ತರುವ ಪ್ರಯತ್ನವೂ ನಡೆಯುತ್ತಿದೆ. ಕಳೆದ ಬಾರಿ ಕೊಡಗು, ರಾಮನಗರ, ಚಿಕ್ಕಬಳ್ಳಾಪುರ, ಶಿವಮೊಗ್ಗ ಮತ್ತು ಚಿಕ್ಕಮಗಳೂರು ಜಿಲ್ಲೆಗಳು ಸೇರ್ಪಡೆಯಾಗುವುದರೊಂದಿಗೆ ಈಗ ಸಂಸ್ಥೆಯಲ್ಲಿ ಒಟ್ಟು 23 ಜಿಲ್ಲೆಗಳು ಇವೆ. ಸದಸ್ಯತ್ವ ಹೆಚ್ಚಿದಷ್ಟು ಹೋರಾಟದ ಕಳೆ ಹೆಚ್ಚುತ್ತದೆ ಎಂದೇ ಅರ್ಥ. ರಾಜ್ಯ ತಂಡಕ್ಕೆ  ಅತ್ಯುತ್ತಮ ಆಟಗಾರರನ್ನು ಆಯ್ಕೆ ಮಾಡಲು ಇದು ಪರೋಕ್ಷವಾಗಿ ನೆರವಾಗುತ್ತದೆ. ತಂಡವನ್ನು ಸಜ್ಜುಗೊಳಿಸಿ ರಾಜ್ಯ ಮಟ್ಟಕ್ಕೆ ಕರೆದುಕೊಂಡು ಹೋಗಬೇಕಾದ, ಜಯ ಗಳಿಸಲು ಸೂಕ್ತ ತರಬೇತಿ ನೀಡಬೇಕಾದ ಜವಾಬ್ದಾರಿ ಜಿಲ್ಲಾ ಸಂಸ್ಥೆಗಳ ಕಾರ್ಯದರ್ಶಿಗಳದ್ದು. ಹೀಗಾಗಿ ಅವರು ಚುರುಕಿನಿಂದ ಕಾರ್ಯನಿರ್ವಹಿಸಬೇಕಾಗುತ್ತದೆ. ಇದು ಕೂಡ ಕಬಡ್ಡಿಯ ಬೆಳವಣಿಗೆಗೆ ನೆರವಾಗುತ್ತದೆ. ಹುಬ್ಬಳ್ಳಿ ಟೂರ್ನಿ ಮುಗಿದ ಕೂಡಲೇ ಧಾರವಾಡ ಜಿಲ್ಲೆಯ ಶಾಲಾ ಕಾಲೇಜುಗಳಲ್ಲಿ ಕಬಡ್ಡಿ ತರಬೇತಿ ನೀಡಲು ಜಿಲ್ಲಾ ಸಂಸ್ಥೆ ಯೋಜನೆ ಹಾಕಿಕೊಂಡಿರುವುದು ಇಂಥ ಬೆಳವಣಿಗೆಯ ಒಂದು ಭಾಗ.

ರಾಜ್ಯ ಟೂರ್ನಿ ಆರಂಭಗೊಂಡ ನಂತರ ಜೂನಿಯರ್ ವಿಭಾಗದ ಬಾಲಕಿಯರ ವಿಭಾಗದಲ್ಲಿ ಪ್ರಶಸ್ತಿಯನ್ನು ಯಾರಿಗೂ ಬಿಟ್ಟುಕೊಡದ ದಕ್ಷಿಣ ಕನ್ನಡ ಜಿಲ್ಲಾ ತಂಡಕ್ಕೆ ಹಂಸವತಿ ಕೋಚ್. ‘ಹೊಸ ವಿಧಾನದ ಆಯ್ಕೆ ಪ್ರಕ್ರಿಯೆಯಿಂದಾಗಿ ರಾಜ್ಯದ ಕಬಡ್ಡಿಗೆ ಹೊಸ ಕಳೆ ಬಂದಿದೆ. ಪ್ರತಿಭೆಗಳು ಹೊರಹೊಮ್ಮಲು ಟೂರ್ನಿಗಳು ನೆರವಾಗುತ್ತಿವೆ. ಜಿಲ್ಲೆಯ ಗೆಲುವಿಗಾಗಿ ಆಡುವುದರಿಂದ ಆಟಗಾರರ ಛಲ ಹೆಚ್ಚಿದೆ. ಪ್ರತಿ ತಂಡ ಕನಿಷ್ಠ ಎರಡು ಪಂದ್ಯ ಆಡುವುದರಿಂದ ಪ್ರತಿಭೆಗಳನ್ನು ಗುರುತಿಸಲು ಟೂರ್ನಿ ಸಹಕಾರಿ’ ಎನ್ನುತ್ತಾರೆ ಹಂಸವತಿ.

‘ಜಿಲ್ಲಾ ಸಂಸ್ಥೆಗಳನ್ನು ಜಾಗೃತಗೊಳಿಸಿದ್ದು ಹಾಗೂ ಕಾರ್ಯದರ್ಶಿಗಳಲ್ಲಿ ಚುರುಕು ಮೂಡಿಸಿದ್ದು ರಾಜ್ಯ ಟೂರ್ನಿಗಳ ಮಹತ್ವದ ಸಾಧನೆ. ಪ್ರತಿಭೆಗಳಿದ್ದೂ ರಾಜ್ಯ ಮಟ್ಟದಲ್ಲಿ ಆಡಲು ಅವಕಾಶವಿಲ್ಲದವರಿಗೆ ಈ ಟೂರ್ನಿಗಳು ಆಶಾಕಿರಣವಾಗಿವೆ. ಗ್ರಾಮೀಣ ಪ್ರತಿಭೆಗಳಿಗೆ ರಾಜ್ಯ ಮಟ್ಟದಲ್ಲಾದರೂ ಆಡಲು ಸಾಧ್ಯವಾಗುತ್ತಿದೆ ಎಂಬುದು ಮಹತ್ವದ ಬೆಳವಣಿಗೆಯೇ ಸರಿ’ ಎಂಬುದು ಬಾಲಕರ ವಿಭಾಗದ ಚೊಚ್ಚಲ ಪ್ರಶಸ್ತಿ ಗೆದ್ದ ಉಡುಪಿ ತಂಡದ ಕೋಚ್ ಸತೀಶ ನಾಯಕ ಅವರ ಅಭಿಪ್ರಾಯ.