ರಾಜಕೀಯ ಸ್ಥಿರತೆ ಮೂಡಲಿ

ಕಳೆದ ಕೆಲವು ತಿಂಗಳುಗಳಿಂದ ನಡೆದ ಬೆಳವಣಿಗೆಗಳನ್ನು  ಘನಿ ಹಾಗೂ ಅಬ್ದುಲ್ಲಾ ಕಡೆಯವರು ಅಷ್ಟು ಸುಲಭವಾಗಿ ಮರೆಯುತ್ತಾರೆಂದು ನಿರೀಕ್ಷಿ­ಸುವುದು ತಪ್ಪಾಗುತ್ತದೆ. ಹೀಗಾಗಿ ಈಗಲೇ ಸಮಾಧಾನದ ನಿಟ್ಟುಸಿರು ಬಿಡ­ಲಾಗದು. ನಿಜ ಹೇಳಬೇಕೆಂದರೆ  ಆಫ್ಘಾನಿಸ್ತಾನಕ್ಕೆ ಈಗ ಕ್ಲಿಷ್ಟಕರವಾದಂತಹ ಸಂಕ್ರಮಣ ಕಾಲ. ಬರಲಿರುವ ತಿಂಗಳುಗಳಲ್ಲಿ  ಆಫ್ಘಾನಿಸ್ತಾನದ ಹೊಸ  ಅಧ್ಯಕ್ಷ ಹಾಗೂ ಒಕ್ಕೂಟ ಸರ್ಕಾರ ಅನೇಕ ಸವಾಲುಗಳನ್ನು ಎದುರು­ಗೊಳ್ಳ­ಬೇಕಿದೆ.  ಇದರಲ್ಲಿ ಬಹಳ ಮುಖ್ಯವಾದದ್ದು  2014ರ ಆಚೆಗೂ  ಆಫ್ಘಾನಿ­ಸ್ತಾ­ನದಲ್ಲಿ ವಿದೇಶಿ ಸೇನಾ ಪಡೆಗಳು ಇರುವುದಕ್ಕೆ ಅವಕಾಶ ಮಾಡಿ­ಕೊಡಲು  ಅಮೆರಿಕದ ಜತೆ ಭದ್ರತಾ ಒಡಂಬಡಿಕೆಗೆ ಸಹಿ ಹಾಕಬೇಕಾಗಿದೆ. 

ಈ ಒಪ್ಪಂದಕ್ಕೆ ಸಹಿ ಹಾಕಲು ನಿರ್ಗಮಿಸುತ್ತಿರುವ ಅಧ್ಯಕ್ಷ ಹಮೀದ್ ಕರ್ಜೈ ವಿರೋಧಿಸುತ್ತಿದ್ದಾರೆ.  ಆದರೆ ಘನಿ ಹಾಗೂ ಅಬ್ದುಲ್ಲಾ,  ಒಡಂಬಡಿಕೆಯ ಪರ­ವಾಗಿದ್ದಾರೆ.  ಈ ಬಗೆಗಿನ ನಿರ್ಧಾರವನ್ನು ತಕ್ಷಣವೇ ಮಾಡಬೇಕಾದ ಜರೂರಿದೆ.  ತಾಲಿಬಾನ್ ಜತೆಗೂ ಮಾತುಕತೆ ಪುನರಾರಂಭಿಸಬೇಕಾಗಿದೆ.  ಆಫ್ಘನ್ ಆರ್ಥಿಕತೆಯಂತೂ ತೀವ್ರ ಬಿಕ್ಕಟ್ಟಿನಲ್ಲಿದೆ. ಇದರ ಪರಿಹಾರಕ್ಕೆ  ರಾಜ­ಕೀಯ ಸ್ಥಿರತೆ ತರುವುದು ಹೊಸ ನಾಯಕತ್ವದ ಮುಂದಿರುವ ಅಗ್ನಿಪರೀಕ್ಷೆ. ಬರೀ ಬಾಯಿ ಮಾತಿನ ಭರವಸೆಗಳು ಸಾಲದು, ರಾಷ್ಟ್ರವನ್ನು ಮುನ್ನಡೆ­ಸಲು ಘನಿ ಹಾಗೂ ಅಬ್ದುಲ್ಲಾ ಸಹಭಾಗಿಗಳಾಗಬೇಕು.

ಈ ಮೈತ್ರಿ ಅಲ್ಪಾವಧಿ­ಯದಾಗಬಾರದು. ಆ ಮೂಲಕ ಮತದಾರರ ನಿರೀಕ್ಷೆಗಳನ್ನು ಈಡೇರಿಸು­ವಂತಾ­ಗಬೇಕು. ಏಕೆಂದರೆ ಕೆಟ್ಟ ಹವಾಮಾನ ಹಾಗೂ ತಾಲಿಬಾನ್ ಪ್ರಾಯೋ­­­ಜಿತ ಹಿಂಸಾಚಾರಗಳ ಮಧ್ಯೆಯೂ ಜನ ದೊಡ್ಡ ಸಂಖ್ಯೆಯಲ್ಲಿ ಹೊರ­ಬಂದು ಮತ ಹಾಕಿದ್ದಾರೆ ಎಂಬುದನ್ನು ಈ ನಾಯಕರು ಮರೆಯ­ಬಾರದು.