ನವದೆಹಲಿ: ಸರ್ಕಾರ ಹೇಳುತ್ತಿರುವಂತೆ ಹೈ ಸ್ಪೀಡ್‌ ರೈಲುಗಳು, ಜಾಗತಿಕ ಗುಣಮಟ್ಟದ ನಿಲ್ದಾಣಗಳು ಮತ್ತು ಸುರಕ್ಷಿತ ಪ್ರಯಾಣಕ್ಕೆ ಒತ್ತು ನೀಡಿದ್ದೇ ಆದರೆ ರೈಲ್ವೆ ವಲಯದಲ್ಲಿ ದೇಶೀಯ ಮತ್ತು ವಿದೇಶಿ ಖಾಸಗಿ ಪಾಲುದಾರಿಕೆ (ಎಫ್‌ಡಿಐ) ಗಮನಾರ್ಹವಾಗಿ ಆದ್ಯತೆ ಪಡೆಯುವ ಲಕ್ಷಣಗಳಿವೆ. ಈ ಮೂಲಕ ಜುಲೈ 8ರಂದು (ಮಂಗಳವಾರ) ಮಂಡನೆಯಾಗಲಿರುವ ರೈಲ್ವೆ ಬಜೆಟ್‌ನಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ ಛಾಪು ಕಂಡುಬರುವ ಸಾಧ್ಯತೆ ಇದೆ.
ಬಜೆಟ್‌ನಲ್ಲಿ ಪ್ರಸ್ತಾಪಗೊಳ್ಳಬೇಕಾದ ಪ್ರತಿಯೊಂದು ಸಂಗತಿಯ ಬಗ್ಗೆಯೂ ಪ್ರಧಾನಿ ಮೋದಿ ಅವರು ರೈಲ್ವೆ ಸಚಿವ ಸದಾನಂದ ಗೌಡರಿಗೆ ವಿವರವಾಗಿ ಸೂಚನೆಗಳನ್ನು ನೀಡುತ್ತಿದ್ದಾರೆ.
ಆ ಪ್ರಕಾರ, ಸದಾನಂದ ಗೌಡ ಅವರೂ ಎಲ್ಲಾ ವಿಭಾಗಗಳ ಪ್ರಮುಖರ ಜತೆ ಸಭೆ ನಡೆಸಿ, ಭವಿಷ್ಯದಲ್ಲಿ ರೈಲ್ವೆ ಇಲಾಖೆ ಕಾರ್ಯನಿರ್ವಹಣೆ ಬಗ್ಗೆ ಮೋದಿ ಅವರಿಗೆ ಇರುವ ಚಿಂತನೆಗಳೇನು ಎಂಬುದನ್ನು ವಿವರಿಸುತ್ತಿದ್ದಾರೆ ಎಂದು ಸಚಿವಾಲಯದ ಅಧಿಕಾರಿಗಳು ತಿಳಿಸಿದ್ದಾರೆ.
