ಕಾಬೂಲ್ (ಪಿಟಿಐ,ಎಎಫ್ಪಿ): ಕುಂಡುಜ್ ನಗರದ ಆಸ್ಪತ್ರೆಯಲ್ಲಿ ಅಡಗಿದ್ದ 15 ಮಂದಿ ತಾಲಿಬಾನ್ ಉಗ್ರರನ್ನು ಶನಿವಾರ ಹತ್ಯೆಮಾಡಲಾಗಿದೆ.
ಆಸ್ಪತ್ರೆಯಲ್ಲಿ ಅಡಗಿದ್ದ ತಾಲಿಬಾನ್ ಉಗ್ರರ ಮೇಲೆ ವೈಮಾನಿಕ ದಾಳಿ ನಡೆಸಿ ಹತ್ಯೆಮಾಡಲಾಗಿದೆ ಎಂದು ಪೊಲೀಸ್ ವಕ್ತಾರ ಸೈಯದ್ ಸರ್ವರ್ ಹುಸೈನಿ ತಿಳಿಸಿದರು. ಆಸ್ಪತ್ರೆಯ 3 ವೈದ್ಯರು ಮೃತಪಟ್ಟಿದ್ದಾರೆ ಎಂಬ ವರದಿಯನ್ನು ತಿರಸ್ಕರಿಸಿದ ಅವರು, ದಾಳಿ ವೇಳೆ ವೈದ್ಯರು, ರೋಗಿಗಳಿಗೆ ಯಾವುದೇ ತೊಂದರೆಯಾಗಿಲ್ಲ ಎಂದರು. ಆದರೆ, ವೈಮಾನಿಕ ದಾಳಿಯಿಂದ 3 ಸಿಬ್ಬಂದಿ ಮೃತಪಟ್ಟಿದ್ದಾರೆ ಎಂದು ಆಸ್ಪತ್ರೆಯ ಮೂಲಗಳು ತಿಳಿಸಿವೆ.
ಅಬುಜಾದಲ್ಲಿ ಸ್ಫೋಟ: ನೈಜೀರಿಯಾದ ರಾಜಧಾನಿ ಅಬುಜಾ ಹೊರವಲಯದಲ್ಲಿ ನಡೆದ 2 ಸ್ಫೋಟ ಪ್ರಕರಣಗಳಲ್ಲಿ ಕನಿಷ್ಠ 15 ಮಂದಿ ಮೃತಪಟ್ಟಿದ್ದು, 41 ಮಂದಿ ಗಾಯಗೊಂಡಿದ್ದಾರೆ. ರಕ್ಷಣಾ ಕಾರ್ಯ ಮುಂದುವರಿದಿದ್ದು, ಗಾಯಾಳುಗಳನ್ನು ಆಸ್ಪತ್ರೆಗೆ ಸೇರಿಸಲಾಗಿದೆ ಎಂದು ರಾಷ್ಟ್ರೀಯ ತುರ್ತು ನಿರ್ವಹಣಾ ಘಟಕ ತಿಳಿಸಿದೆ.