ವೈದ್ಯರು ನೆಚ್ಚಿದ `ತೇಜಸ್ವಿ ಮದ್ದು'

ಶಿರವಾರದಲ್ಲಿ ವಾಸವಾಗಿದ್ದುಕೊಂಡು ವೈದ್ಯಕೀಯ ಸೇವೆ ಸಲ್ಲಿಸುತ್ತಿದ್ದ ಅವರು ಒಮ್ಮಿಂದೊಮ್ಮೆಲೆ ನಾರಬಂಡಿಯಂಥ ಕುಗ್ರಾಮಕ್ಕೆ ಸ್ಥಳಾಂತರಗೊಂಡಿದ್ದು ಕಥೆಯೊಂದಕ್ಕೆ ಗ್ರಾಸ ಆಗುವಂತಹದ್ದು. ಹತ್ತು ವರ್ಷಗಳ ಕೆಳಗೆ ತೇಜಸ್ವಿಯಂತೆ ಎಲ್ಲಿಯಾದರೂ ಕಾಡಿನಲ್ಲಿ ಜೀವನ ಸಾಗಿಸಬೇಕೆಂದು ಅವರು ಕನಸು ಕಂಡರು. ಆದರೆ ಈ ವೈದ್ಯರಿಗೆ ಬಯಲು ಸೀಮೆಯಲ್ಲಿ ಕಾಡು ಎಲ್ಲಿ ಸಿಗಬೇಕು? ಅದಕ್ಕೆ ಅವರು ಕಂಡುಕೊಂಡ ವಿಧಾನ ನಾರಬಂಡಿಯಿಂದ ಅನತಿ ದೂರದಲ್ಲಿರುವ ಬಯಲು ಭೂಮಿ.

ಅಲ್ಲಿ `ವಿವೇಕಾನಂದ ಫಾರ್ಮ್' ಅಭಿವೃದ್ಧಿಪಡಿಸಿ ಸಪೋಟ, ಮೂಸಂಬಿ, ಮಾವಿನ ಗಿಡ ಬೆಳೆಸಿದರು. ಕಾಡು ಬೆಳೆಗಳನ್ನೂ ಬೆಳೆಸಿದರು. ಸಮೀಪದಲ್ಲೇ ಕೆರೆಯೊಂದಿತ್ತು. ಆ ಕೆರೆಗೆ ವೈದ್ಯರಿಂದ ನಾಮಕರಣವೂ ಆಯಿತು- ಪೂರ್ಣಚಂದ್ರ ತೇಜಸ್ವಿ ಜಲಾಶಯ!

ತೇಜಸ್ವಿ ಕೆರೆಯಿಂದ ನೀರುಣ್ಣುತ್ತ ಪ್ರಸ್ತುತ ವೈದ್ಯರ ಕಾಡು ಮೂವತ್ತು ಎಕರೆಗಳಲ್ಲಿ ಹಬ್ಬಿಕೊಂಡಿದೆ. ಪೂರ್ಣಚಂದ್ರ ತೇಜಸ್ವಿ ಜಲಾಶಯದ ದಂಡೆಗೆ ಈ ತೋಟ ನಳನಳಿಸುತ್ತ ಅರಳಿ ನಿಂತಿದೆ.

ವೈದ್ಯರು ತೋಟದ ಮನೆಯಲ್ಲೇ ವಾಸವಾಗಿದ್ದಾರೆ. ಶಿರವಾರದಲ್ಲಿ ಮುಂಜಾನೆಯಿಂದ ಸಂಜೆಯವರೆಗೆ ಡಾಕ್ಟರಿಕೆ ಮಾಡಿಕೊಂಡು ಸಂಜೆ ತಮ್ಮ ಫಾರ್ಮ್‌ಗೆ ಬರುತ್ತಾರೆ. ಅವರ ಮನೆಗೆ ಹೋದರೆ ತೇಜಸ್ವಿಯವರ ಚಿತ್ರಪಟ ನೋಡುಗರ ಗಮನ ಸೆಳೆಯುತ್ತದೆ. ಅವರ ಪಾಲಿಗೆ, ತೇಜಸ್ವಿಯನ್ನು ಮರೆತು ದೈನಿಕ ಸಾಧ್ಯವೇ ಇಲ್ಲ.

ವಿರುಪಾಕ್ಷಪ್ಪನವರು ಒಮ್ಮೆ ಯಾವುದೋ ಒಂದು ಕಾರ್ಯಕ್ರಮಕ್ಕೆ ತೇಜಸ್ವಿಯವರನ್ನು ಆಹ್ವಾನಿಸಿದ್ದರಂತೆ. ಆಗವರು, `ಡಾಕ್ಟ್ರೆ, 500 ಕಿ.ಮೀ. ದೂರಕ್ಕೆ ನಾನು ಬಂದು, ನಾಲ್ಕು ಮಾತಾಡುವದರಿಂದ ಏನೂ ಬದಲಾವಣೆ ಆಗುವುದಿಲ್ಲ. ಬದಲಾಗಿ ನನ್ನ ದೇಹದಲ್ಲಿ ಬದಲಾವಣೆ ಆಗಬಹುದು'. ಈ ಮಾತನ್ನು ಈಗಲೂ ನೆನಪಿಸಿಕೊಂಡು ಡಾಕ್ಟರ್ ನಗುತ್ತಾರೆ.

`ವಿಜ್ಞಾನವನ್ನು ತೇಜಸ್ವಿಯವರು ಹೇಳಿದಂತೆ, ಅವರು ಪರಿಸರವನ್ನು ಪ್ರೀತಿಸಿದಂತೆ ಇನ್ನೊಂದು ಉದಾಹರಣೆ ಸಿಗುವುದು ಕಷ್ಟ. ಅವರಂತೆ ವಿಶಿಷ್ಟ ಕಥೆ ಕಾದಂಬರಿಗಳನ್ನು ಸೃಷ್ಟಿಸಿದವರು ಕನ್ನಡ ಸಾಹಿತ್ಯಚರಿತ್ರೆಯಲ್ಲಿ ಮತ್ತೊಬ್ಬರಿಲ್ಲ' ಎನ್ನುವ ವೈದ್ಯರ ಮನೆಯಲ್ಲಿ ಎಲ್ಲೆಂದರಲ್ಲಿ ಸಿಗುವುದು ತೇಜಸ್ವಿಯವರ ಸಾಹಿತ್ಯ ಮಾತ್ರ.

ಡಾಕ್ಟರ್ ಮನಸ್ಸು ಮಾಡಿದರೆ ಹಣವಂತರಾಗಬಹುದಿತ್ತು. ದೊಡ್ಡದೊಡ್ಡ ಕಟ್ಟಡಗಳ, ಆಸ್ಪತ್ರೆಯ ಒಡೆಯರಾಗಬಹುದಿತ್ತು. ಆದರೆ ಈ ಡಾಕ್ಟ್ರು ಎಲ್ಲರಂತಲ್ಲ. ಮಾನವೀಯ ಮೌಲ್ಯಗಳನ್ನು ಮದ್ದಿನ ಮೂಲಕ ಜನರಿಗೆ ಉಣಬಡಿಸುವ ಪ್ರಯತ್ನ ಅವರದು. ರೈತರ ಬಗ್ಗೆಯಂತೂ ಅವರಿಗೆ ಅಪಾರ ಪ್ರೀತಿ. ಈ ಭಾಗದಲ್ಲಿ ಸಾಲ ಗೀಲ ಮಾಡಿ ಅಥವಾ ವೈಯಕ್ತಿಕ ಕಾರಣದಿಂದ ವಿಷ ಕುಡಿಯಲು ಪ್ರಯತ್ನಿಸುವ ರೈತರಿಗೆ ವೈದ್ಯರಿಂದ ಮದ್ದಿನ ಜೊತೆಗೆ ಶಿಕ್ಷೆಯೂ ಲಭ್ಯ! ದುಸ್ಸಾಹಕ್ಕೆ ಕೈಹಾಕುವ ರೈತರ ಕಪಾಳಕ್ಕೆ ಒಂದು ಏಟು ಕೊಟ್ಟೇ ಅವರು ಮಾತನಾಡುವುದು. `ನಾಚಿಕೆ ಆಗಲ್ವ ಸಾಯಾಕ ಹೋಗಿದ್ಯಲ್ಲ' ಎನ್ನುವ ಅವರ ಮಾತಿನಲ್ಲಿ ರೈತರ ಬಗೆಗಿನ ಕಾಳಜಿಯೂ ಜೀವನಪ್ರೇಮವೂ ಧ್ವನಿಸುತ್ತದೆ.

ವೈದ್ಯರ ಕಾಡಿಗೆ ನೀರುಣಿಸುವ ತೇಜಸ್ವಿ ಜಲಾಶಯಕ್ಕೆ ಕೃಷ್ಣಾ ಬಲದಂಡೆಯ ಒಂದು ಕಾಲುವೆಯನ್ನು ಜೋಡಿಸುವ ಯೋಜನೆ ಜೀವ ಪಡೆದುಕೊಂಡಿದೆ. ಮುಂದೊಂದು ದಿನ ಈ ಜಲಾಶಯದಲ್ಲಿ ದೊಡ್ಡ ಪ್ರಮಾಣದಲ್ಲಿ ನೀರು ಹರಿಯಲಿದೆ. ಹಾಗಾಗಿ ಸುತ್ತಮುತ್ತಲಿನ ಪರಿಸರದ ಹಸಿರೂ ಹೆಚ್ಚಲಿದೆ.
ವೈದ್ಯರ ಮೂಲಕ, ಅವರ ಮನೆ-ತೋಟದ ಮೂಲಕ ನಾರಬಂಡಿಯಲ್ಲಿ ತೇಜಸ್ವಿ ಜೀವಂತವಾಗಿದ್ದಾರೆ ಎನಿಸುತ್ತದೆ.