ಶುದ್ಧ ಕುಡಿಯುವ ನೀರಿನ ಹೆಸರಲ್ಲಿ ಗುಣಮಟ್ಟವಿಲ್ಲದ ನೀರನ್ನು ಮಾರುವ ದಂಧೆ ಎಲ್ಲೆಡೆ ಭರ್ಜರಿಯಾಗಿಯೇ ನಡೆಯುತ್ತಿದೆ. ಬಾಟಲಿ ನೀರಿನ ವ್ಯಾಮೋಹಕ್ಕೆ ಸಿಕ್ಕ ಜನರನ್ನು ನಯವಾಗಿ ವಂಚಿಸಲಾಗುತ್ತಿದೆ. ಇದು ಈಗಲಾದರೂ ‘ಭಾರತೀಯ ಗುಣಮಟ್ಟ ಮಾನಕ ಸಂಸ್ಥೆ’ (ಬಿಐಎಸ್) ಗಮನಕ್ಕೆ ಬಂತಲ್ಲ ಎನ್ನುವುದಕ್ಕೆ ಖುಷಿಪಡಬೇಕು.
ಜೀವಾಧಾರವಾದ ಕುಡಿವ ನೀರು ಸೇರಿದಂತೆ ಪೊಟ್ಟಣಗಳಲ್ಲಿ ಮಾರುವ ಎಲ್ಲ ಬಗೆಯ ಆಹಾರ ಪದಾರ್ಥಗಳು, ವಿವಿಧ ಸಾಮಗ್ರಿಗಳ ಗುಣಮಟ್ಟವನ್ನು ಖಾತರಿಪಡಿಸಿ ಐಎಸ್ಐ ಪ್ರಮಾಣಪತ್ರ ನೀಡಿ ಬಳಕೆದಾರರ ಹಿತ ರಕ್ಷಿಸುವುದು ಬಿಐಎಸ್ ಜವಾಬ್ದಾರಿ. ಇಡೀ ದೇಶದಲ್ಲಿಯೇ ಬಾಟಲಿ ನೀರಿನ ತಯಾರಿಕಾ ಘಟಕಗಳ ಸಂಖ್ಯೆ ಹೆಚ್ಚಿರುವ ರಾಜ್ಯ ಕರ್ನಾಟಕ. ನಮ್ಮಲ್ಲಿ 4 ಸಾವಿರಕ್ಕೂ ಅಧಿಕ ಪ್ಯಾಕೇಜ್ಡ್ ನೀರು ತಯಾರಿಕಾ ಘಟಕಗಳಿದ್ದರೂ ಪರವಾನಗಿ ಪಡೆದ ಘಟಕಗಳು ಬರೀ 415.
ಇನ್ನುಳಿದವು ಅನಧಿಕೃತವಾಗಿ ಕಾರ್ಯ ನಿರ್ವಹಿಸುತ್ತಿವೆ. ಇವು ಇಷ್ಟು ದಿನ ಕಾನೂನಿನ ಬಲೆಯಿಂದ ತಪ್ಪಿಸಿಕೊಳ್ಳಲು ಬಾಟಲಿಗೆ ಮೊಹರು ಹಾಕದೆ ‘ಪ್ಯಾಕೇಜ್ಡ್ ಕುಡಿಯುವ ನೀರಲ್ಲ’ ಎಂಬ ಮೊಂಡು ವಾದ ಮಾಡುತ್ತ ಬಂದಿದ್ದವು. ಈಗ ಇವಕ್ಕೆಲ್ಲ ಅಂಕುಶ ಹಾಕಲು ಆಹಾರ ಕಲಬೆರಕೆ ನಿಯಂತ್ರಣ ಕಾಯ್ದೆ ತಿದ್ದುಪಡಿಯ ಅಸ್ತ್ರ ಬಿಐಎಸ್ಗೆ ಸಿಕ್ಕಿದೆ. ಆ ಅಸ್ತ್ರವನ್ನು ಅದು ಸರಿಯಾಗಿ ಪ್ರಯೋಗಿಸಬೇಕು.
ಶುದ್ಧ ನೀರು ಮನುಷ್ಯರಿಗಷ್ಟೇ ಅಲ್ಲ, ಎಲ್ಲ ಜೀವರಾಶಿಗಳಿಗೂ ಅಗತ್ಯ. ಶುದ್ಧ ನೀರು ಪಡೆಯುವುದು ವ್ಯಕ್ತಿಯ ಹಕ್ಕು. ಅದನ್ನು ಒದಗಿಸಿಕೊಡುವುದು ಸಮುದಾಯದ, ಸರ್ಕಾರದ ಹೊಣೆ. ಆದರೆ ಆ ಕರ್ತವ್ಯ ನಿಭಾಯಿಸುವಲ್ಲಿ ಸರ್ಕಾರ ಕೆಲಮಟ್ಟಿಗೆ ಸೋತಿದ್ದರಿಂದಲೇ ಬಾಟಲಿ ನೀರಿಗೆ ಬೇಡಿಕೆ ಬಂದದ್ದು. 80,- 90ರ ದಶಕದಲ್ಲಿ ಕೊಳವೆ ಬಾವಿ ನೀರು ಪರಿಶುದ್ಧ ಎಂದು ಹೇಳಲಾಗುತ್ತಿತ್ತು. ಆದರೆ ಆ ನೀರೂ ನಮ್ಮ ದುರಾಸೆಯಿಂದ ಕಲುಷಿತಗೊಂಡಿದೆ.
ಅಶುದ್ಧ ನೀರು ನಾನಾ ಬಗೆಯ ಕಾಯಿಲೆಗಳನ್ನು ತರುತ್ತದೆ ಎಂಬುದರ ಅರಿವು ಪಸರಿಸಿ ಜನ ಜಾಗೃತರಾಗುತ್ತಿದ್ದಾರೆ. ಈ ಎಲ್ಲ ಕಾರಣಗಳಿಂದ ಬಾಟಲಿ ನೀರು ನಗರ ಪ್ರದೇಶಗಳಲ್ಲಿ ಮಾತ್ರವಲ್ಲದೆ ಗ್ರಾಮಾಂತರ ಭಾಗಗಳಲ್ಲೂ ಮನೆಮನೆಗಳನ್ನು ಪ್ರವೇಶಿಸಿದೆ. ಸಾಲದ್ದಕ್ಕೆ ಬಾಟಲಿ ನೀರು ಕುಡಿಯುವುದೇ ಒಂದು ಬಗೆಯ ಪ್ರತಿಷ್ಠೆ ಸಂಗತಿಯಾಗಿದೆ. ಜನರ ಈ ಭಾವನೆ, ಅಸಹಾಯಕತೆಯನ್ನು ಬಾಟಲಿ ನೀರಿನ ಘಟಕಗಳು ದುರ್ಬಳಕೆ ಮಾಡಿಕೊಳ್ಳುತ್ತಿವೆ.
ನೀರು ಮಾರಾಟ ಈಗ ಬಲು ಬೇಡಿಕೆಯ ಗೃಹ ಕೈಗಾರಿಕೆಯಾಗಿದೆ. ಇದನ್ನು ಮುಂದುವರಿಸಲು ಯಾರದೇ ತಕರಾರಿಲ್ಲ. ಆದರೆ ಇವು ಗುಣಮಟ್ಟ ತಪಾಸಣೆಗೆ ಒಳಪಡಬೇಕು. ಸೂಕ್ತ ಪರವಾನಗಿ ಪಡೆಯದೆ ನೀರು ಮಾರುವ ಘಟಕಗಳ ಮೇಲೆ ನಿರ್ದಾಕ್ಷಿಣ್ಯ ಕ್ರಮ ತೆಗೆದುಕೊಳ್ಳಬೇಕು. ‘ಶುದ್ಧ’ ಎಂಬ ನಂಬಿಕೆಯಿಂದ ಗುಣಮಟ್ಟವಿಲ್ಲದ ನೀರು ಕುಡಿಯುವ ಅನಿವಾರ್ಯಕ್ಕೆ ಒಳಗಾದ ಬಡಪಾಯಿ ಗ್ರಾಹಕರ ಹಿತ ಕಾಪಾಡಬೇಕು. ರಾಜ್ಯ ಸರ್ಕಾರದ ಇಲಾಖೆಗಳೂ ಈ ಕೆಲಸದಲ್ಲಿ ಬಿಐಎಸ್ಗೆ ಪೂರ್ಣ ಸಹಕಾರ ಕೊಡಬೇಕು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.