ಸದಾ ರಾಜ್ಯೋತ್ಸವ

ಇಲ್ಲಿ ಕನ್ನಡದ ಅಭಿಮಾನ ನಿರಂತರ. ಬೇರೆ ಭಾಷೆಗಳ ಪ್ರಭಾವವಿದ್ದರೂ ಇಲ್ಲಿ ಕನ್ನಡದ ಡಿಂಡಿಮ ಸದಾ ಮೊಳಗುತ್ತಿರುತ್ತದೆ. ಇದು, ಚಿನ್ನದ ಬೀಡು ಎಂದೇ  ಖ್ಯಾತವಾಗಿರುವ ಕೋಲಾರ ಜಿಲ್ಲೆಯ ಬಂಗಾರಪೇಟೆಯಲ್ಲಿ ಕಂಡುಬರುವ ದೃಶ್ಯ. ತಮಿಳುನಾಡು ಮತ್ತು ಆಂಧ್ರಪ್ರದೇಶ ರಾಜ್ಯಗಳ ಜತೆ ಗಡಿ ಹಂಚಿಕೊಂಡಿದೆ ಬಂಗಾರಪೇಟೆ.

ಕನ್ನಡ ರಾಜ್ಯೋತ್ಸವ ಆಚರಣೆ ಒಂದು ದಿನ ಅಥವಾ ಒಂದು ತಿಂಗಳಿಗೆ ಮಾತ್ರ ಸೀಮಿತವಾಗಬಾರದು, ಅದು ನಿರಂತರವಾಗಿರಬೇಕು ಎನ್ನುವುದು ಬಂಗಾರಪೇಟೆ ಕನ್ನಡ ಸಂಘದ ಆಶಯ. ಹೀಗಾಗಿಯೇ ಈ ಸಂಘ ಪ್ರತಿ ತಿಂಗಳ ಒಂದನೇ ತಾರೀಕಿನಂದು ಇಲ್ಲಿ ಕನ್ನಡಕ್ಕೆ ಉತ್ಸವ ನಡೆಸುತ್ತದೆ. ಇದು 65 ತಿಂಗಳಿನಿಂದ ನಿರಂತರವಾಗಿ ನಡೆದುಕೊಂಡು ಬರುತ್ತಿದೆ.

ಬಂಗಾರಪೇಟೆ ವಾಣಿಜ್ಯ ಚಟುವಟಿಕೆಗಳಿಗೆ ಹೆಸರುವಾಸಿಯಾದಂತೆ, ಕಲೆ, ಸಾಹಿತ್ಯದ ವಿಚಾರದಲ್ಲೂ ಶ್ರೀಮಂತ ಪರಂಪರೆ ಹೊಂದಿದೆ. ಈ ನೆಲದಲ್ಲಿ ಕಳೆದ ಐದು ದಶಕಗಳಿಂದ ನೆಲ, ಜಲ, ಕನ್ನಡಪರ ಹೋರಾಟಗಳು ಮತ್ತು ಸಾಹಿತ್ಯ ಚಳವಳಿಗಳ ಜತೆ ‘ಬಂಗಾರಪೇಟೆ ಕನ್ನಡ ಸಂಘ’ ಗುರುತಿಸಿಕೊಂಡಿದೆ.

ಸಂಘದ ಹಿನ್ನೆಲೆ
ಬಂಗಾರಪೇಟೆ ಕನ್ನಡ ಸಂಘ ಜನ್ಮ ತಾಳಿದ್ದು 1968ರಲ್ಲಿ. ಹಿರಿಯ ವಕೀಲರಾದ ಕುಸುಮ ಮುನಿರಾಜು ಇದರ ಸಂಸ್ಥಾಪಕರು. ಅಂದು ವರನಟ ಡಾ.ರಾಜ್‌ಕುಮಾರ್‌ ಈ ಸಂಘವನ್ನು ಉದ್ಘಾಟಿಸಿದ್ದರು ಎನ್ನುವುದು ವಿಶೇಷ. ಗೋಕಾಕ್‌ ಚಳವಳಿಯಲ್ಲೂ ಕನ್ನಡ ಸಂಘ ಸಕ್ರಿಯವಾಗಿ ಭಾಗವಹಿಸಿತ್ತು. ಆಗಿನಿಂದ ನಿರಂತರವಾಗಿ ಕವಿ ಗೋಷ್ಠಿಗಳು, ಸಮ್ಮೇಳನಗಳನ್ನು ನಡೆಸಿಕೊಂಡು ಬರುತ್ತಿದೆ.

ಒಂದು ಸಣ್ಣ ಕಟ್ಟಡದಲ್ಲಿ ಸಂಘ ಕಾರ್ಯನಿರ್ವಹಿಸುತ್ತಿದೆ. ಸಂಘದಲ್ಲಿ ಸಾವಿರಕ್ಕೂ ಹೆಚ್ಚು ಜನರು ಶಾಶ್ವತ ಸದಸ್ಯತ್ವ ಪಡೆದಿದ್ದಾರೆ. ಸರ್ಕಾರಿ ನೌಕರರು, ಶಿಕ್ಷಕರು, ಉಪನ್ಯಾಸಕರು, ಎಂಜಿನಿಯರ್‌ಗಳು, ವೈದ್ಯರು, ಕೆಎಎಸ್‌ ಮತ್ತು ಐಎಎಸ್‌ ಅಧಿಕಾರಿಗಳು, ವಕೀಲರು, ನಿವೃತ್ತ ನೌಕರರು, ವ್ಯಾಪಾರಸ್ಥರು, ಉದ್ಯಮಿಗಳು, ರೈತರು, ಯುವಕರು, ವಿದ್ಯಾರ್ಥಿಗಳು ಹೀಗೆ ಹಲವು ರಂಗದ ಜನರು ಕನ್ನಡದ ಏಳಿಗೆಗೆ ತಮ್ಮನ್ನು ತೊಡಗಿಸಿ­ಕೊಂಡಿದ್ದಾರೆ.

ಇಲ್ಲಿ ತಿಂಗಳ ಮೊದಲ ದಿನ ಕನ್ನಡದ ಕಹಳೆ ಮೊಳಗುವ ಜೊತೆಗೇ ಸಾಹಿತ್ಯ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆಯು­ತ್ತವೆ. ತಿಂಗಳ ಕಾರ್ಯಕ್ರಮದಲ್ಲಿ ಜನಪದ ಹಾಡು, ಗೀತಗಾಯನ, ವಿಚಾರ ಸಂಕಿರಣ, ನೃತ್ಯ, ನಾಟಕ, ನಗೆಕೂಟಗಳಿಗೂ ಸ್ಥಾನ ಇದೆ. ಸಮಾರಂಭಕ್ಕೆ ಹಿರಿಯ ಸಾಹಿತಿಗಳು, ಕಲಾವಿದರು, ಚಿತ್ರನಟರು, ಚಿಂತಕರು, ಸಮಾಜ ಸೇವಕರು, ನ್ಯಾಯಾಧೀಶರು ಪ್ರಗತಿಪರ ರಾಜಕಾರಣಿಗಳು  ಮುಖ್ಯ ಅತಿಥಿಗಳಾಗಿರುತ್ತಾರೆ.

ಕರ್ನಾಟಕ ಏಕೀಕರಣಕ್ಕೆ 50 ವರ್ಷಗಳು ತುಂಬಿದ ಸಂದರ್ಭದಲ್ಲಿ ಸಂಘದ ವತಿಯಿಂದ ಏಳು ದಿನ ನಿರಂತರವಾಗಿ ವಿಶೇಷ ಕನ್ನಡ ಕಾರ್ಯಕ್ರಮ ನಡೆಸಿದ್ದು ಮಹತ್ವದ ಅಂಶ. ಮೊದಲ ದಿನ ಹೆಲಿಕಾಫ್ಟರ್‌ ಮೂಲಕ ನಾಡ ದೇವಿಗೆ ಪುಷ್ಪ ನಮನ ಸಲ್ಲಿಸಲಾಯಿತು. ನಂತರ ಆನೆಯ ಮೇಲೆ ಮೆರವಣಿಗೆ ಮಾಡಲಾಯಿತು. ಈ ಸ್ಮರಣೀಯ ಕಾರ್ಯಕ್ರಮದಲ್ಲಿ ಸಾಹಿತಿ ಚಂದ್ರಶೇಖರ ಕಂಬಾರ ಸೇರಿದಂತೆ ಹಿರಿಯ ಸಾಹಿತಿಗಳು ಭಾಗವಹಿಸಿದ್ದರು.

ಪ್ರತಿ ವರ್ಷ ನವೆಂಬರ್‌ ಒಂದರಂದು ಬಂಗಾರಪೇಟೆಯಲ್ಲಿ ಮಿನಿ ದಸರಾ ನಡೆದಂತೆ ಇರುತ್ತದೆ. ರಾಜ್ಯದ ನಾನಾ ಭಾಗಗಳಿಂದ ಬರುವ ವೀರಗಾಸೆ,  ಚಂಡಮದ್ದಳೆ, ಕರಡಿಮೇಳ, ಡೊಳ್ಳುಕುಣಿತ, ತಮಟೆ ವಾದನ, ಯಕ್ಷಗಾನ ಹೀಗೆ ಹತ್ತಾರು ಜಾನಪದ ಕಲಾ ತಂಡಗಳು ನೃತ್ಯ ಪ್ರದರ್ಶನ ನೀಡುತ್ತವೆ. ಜಿಲ್ಲೆ ಹಾಗೂ ತಾಲ್ಲೂಕನ್ನು ಪ್ರತಿನಿಧಿಸುವ ಸ್ತಬ್ಧ ಚಿತ್ರಗಳ ಮೆರವಣಿಗೆಯೂ ನಡೆಯುತ್ತದೆ. ಅತ್ಯುತ್ತಮ ಪ್ರದರ್ಶನ ನೀಡಿದ ಕಲಾ ತಂಡಗಳಿಗೆ ಹಾಗೂ ಉತ್ತಮ ಸ್ತಬ್ಧ ಚಿತ್ರಗಳಿಗೆ ನಗದು ಬಹುಮಾನ ನೀಡಲಾಗುತ್ತದೆ.

ಸಮಾಜಮುಖಿ ಕಾರ್ಯಗಳು...
ಇಲ್ಲಿನ ಕನ್ನಡ ಸಂಘ ಸಾಹಿತ್ಯ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳಿಗೆ ಮಾತ್ರ ಸೀಮಿತವಾಗಿಲ್ಲ. ಬದಲಾಗಿ ಸಮಾಜಮುಖಿ ಕಾರ್ಯಗಳನ್ನು ಮಾಡುವ ಮೂಲಕ ಗಮನ ಸೆಳೆದಿದೆ. ಪ್ರತಿವರ್ಷ ಪ್ರತಿಭಾವಂತ ಬಡ ವಿದ್ಯಾರ್ಥಿಗಳಿಗೆ ಪ್ರೋತ್ಸಾಹ ಧನ, ಸಮವಸ್ತ್ರ, ಪಠ್ಯಪುಸ್ತಕಗಳನ್ನು ನೀಡಲಾಗುತ್ತದೆ. ಸ್ಥಳೀಯ ಲಯನ್ಸ್‌ ಕ್ಲಬ್‌ ನೆರವಿನೊಂದಿಗೆ ಆರೋಗ್ಯ ತಪಾಸಣಾ ಶಿಬಿರವನ್ನು ಆಯೋಜಿಸಿ ಬಡ ರೋಗಿಗಳಿಗೆ ಉಚಿತ ಚಿಕಿತ್ಸೆ ನೀಡಲಾಗುತ್ತದೆ. ರಾಷ್ಟ್ರಮಟ್ಟದ ವಾಲಿಬಾಲ್‌, ಥ್ರೋಬಾಲ್‌, ಕ್ರಿಕೆಟ್‌, ಫುಟ್‌ಬಾಲ್‌ ಕ್ರೀಡಾಕೂಟಗಳನ್ನು ಆಯೋಜಿಸಲಾಗುತ್ತದೆ. ಸಂಘದ ವತಿಯಿಂದ ವಾಲಿಬಾಲ್‌ ತರಬೇತಿಯನ್ನು ನೀಡಲಾಗುತ್ತಿದೆ.  ಕನ್ನಡ ಸಂಘ ನಡೆಸಿ ಕೊಡುವ ಎಲ್ಲಾ ಕಾರ್ಯಕ್ರಮ ಗಳಿಗೂ ಜನ ಜಾತ್ರೆಯಂತೆ ಸೇರುತ್ತಾರೆ. ಸದಾ ತೆಲುಗು ಮತ್ತು ತಮಿಳು ಭಾಷೆಯಲ್ಲೇ ವ್ಯವಹರಿಸುವ ಬಂಗಾರಪೇಟೆ ಜನ ಪ್ರತಿ ತಿಂಗಳು ಒಂದರಂದು ಕನ್ನಡ ಕಸ್ತೂರಿಯಲ್ಲಿ ಮಿಂದೇಳುತ್ತಾರೆ.
-ಪೃಥ್ವಿರಾಜ್ ಎಂ.ಎಚ್

ಕನ್ನಡ ನುಡಿಗೆ ಬಸ್‌ ಸೇವೆ
ಪ್ರಯಾಣದ ವೇಳೆ ಪತ್ರಿಕೆಯೋ, ಪುಸ್ತಕವೋ ಇದ್ದರೆ ಪ್ರಯಾಣ ಪ್ರಯಾಸವಾಗಲಾರದು. ಆದರೆ ಪ್ರಯಾಣ ಮಾಡುವಾಗ ಇವನ್ನೆಲ್ಲ ಹೊತ್ತುಕೊಂಡು ಸಾಗುವುದು ಹಲವರಿಗೆ ತಲೆನೋವಿನ ಕೆಲಸ.