ಸಮೋಸಾ ರಾಜ

ಅಲ್ಲಿಗೇ ಚಾಟ್ ಸೆಂಟರ್‌ನ ಇಂದ್ರಮಣಿಯ ಕಥೆ ಬಿಚ್ಚಿಕೊಳ್ಳುತ್ತದೆ.
‘ನಮ್ಮೂರು ಗಿರುವಾಡಿ. ಗೊತ್ತಿಲ್ಲವಾ? ಉತ್ತರ ಪ್ರದೇಶದ ಅಲಹಾಬಾದ್‌ನ ಖಾನಾಮೊಂಡಾ ಹತ್ತಿರ ಬರುವ ಊರದು. ಪಾನಿ ಪೂರಿ ನಮ್ಮ ವಂಶದ ಕಸುಬು. ನನ್ನೀ ‘ಚಾಟ್’ ಪ್ರೀತಿ ಅಲ್ಲಿಂದ ಇಲ್ಲಿಗೆ ಬಂದು ಮುಟ್ಟಿದ್ದು ಹೆಂಗೆ ಅಂಬುದನ್ನೂ ಹೇಳ್ತೇನೆ ಇರಿ’ ಎನ್ನುತ್ತಾ ಎದುರು ನಿಂತ ಗಿರಾಕಿಗಳನ್ನು ವಿಚಾರಿಸಿಕೊಳ್ಳುತ್ತಾರೆ ಇಂದ್ರಮಣಿ ಗುಪ್ತಾ.

‘ಎಸ್ಸೆಸೆಲ್ಸಿ ಎರಡು ಸಲ ಫೇಲಾದೆ. ಅತ್ತ ಶಾಲೆನೂ ಇಲ್ಲ, ಇತ್ತ ಕೆಲಸವೂ ಇಲ್ಲ, ಅದೆಂಥ ಮಗನಪ್ಪ ಅಂತ ಊರ ಮಂದಿ ಉಗಿದರು ನನ್ನ. ಬ್ಯಾಸರ ಆತು ಮನಸ್ಸಿಗೆ. ಒಂದಿನ ಬೆಳ್ಳಂಬೆಳಿಗ್ಗೆ ಅಪ್ಪನ ಕಿಸೆಯಿಂದ ದುಡ್ಡು ಕದ್ದು ದೆಹಲಿಯತ್ತ ಓಡಿದೆ. ಅಲ್ಲಿ ಎರಡು ತಿಂಗಳಿದ್ದೆ. ಮತ್ತೆ ಊರು ನೆನಪಾಯ್ತು.  ಮರಳಿದೆ. ಮತ್ತೆ ಶಾಲೆಗೆ ಸೇರಿಸಿದರು. ಹೂಂ ಹೂಂ... ಎಷ್ಟೇ ಆದರೂ ಮನ ಹತ್ತಲಿಲ್ಲ. ಮತ್ತೆ ಊರಿಂದ ಕಾಲ್ಕಿತ್ತಿದೆ. ಆದರೆ ಈ ಬಾರಿ ಚತ್ತಿಸಗಡದ ರೈಲು ಹತ್ತಿದ್ದು ಅಂತ ಆಮೇಲೆ ತಿಳಿತು’ ಹೀಗೆ ಓಡುತ್ತದೆ ಇಂದ್ರಮಣಿಯ ನೆನಪಿನ ಬಂಡಿ.
ಅಲ್ಲಿ ಕೆಲ ತಿಂಗಳು ಪಾನಿಪೂರಿ ವ್ಯಾಪಾರ ಮಾಡಿಕೊಂಡಿದ್ದ ಇಂದ್ರಮಣಿ ಒಂದಿನ ಸಂಬಂಧಿಯೊಬ್ಬರ ಬೆನ್ನು ಹತ್ತಿ ಬೆಂಗಳೂರು ಸುತ್ತೋಕೆ ಬಂದರು. ಯಾಕೊ ಇಲ್ಲಿನ ವಾತಾವರಣ ತುಂಬ ಹಿಡಿಸಿತು. ಬೆಂಗಳೂರಿನ ಮೇಲೆ ಪ್ರೀತಿ ಮೊಳಗಿತು. ಇಂದ್ರಮಣಿ ತಮ್ಮೂರ ದಾರಿಯನ್ನೇ ಮರೆತರು. ಬೆಂಗಳೂರನ್ನೇ ನೆಚ್ಚಿಕೊಂಡರು.

ಪಾನಿಪೂರಿ ವ್ಯಾಪಾರವನ್ನೇ ಮಾಡಿಕೊಂಡಿದ್ದ ಅವರು, ಒಂದಿನ ಚೇಂಜ್ ಇರಲಿ ಅಂತ ಹತ್ತು ಸಮೋಸಾ ಮಾಡಿಟ್ಟರು. ಅರ್ಧ ಗಂಟೆಯಲ್ಲಿ ಖಾಲಿಯಾದವು. ಮಾರನೇ ದಿನ 50 ಮಾಡಿದರೂ ಒಂದೂ ಉಳಿಯಲಿಲ್ಲ. ನಂತರ ಪಾನಿಪೂರಿ ವ್ಯಾಪಾರವನ್ನು ತಮ್ಮನಿಗೆ ಬಿಟ್ಟುಕೊಟ್ಟು ತಾವು ಸಮೋಸಾ ಸ್ಪೆಷಲ್ ಇಂದ್ರಮಣಿ ಆದರು.

ನಾನೇ ಆಲ್ ರೌಂಡರ್
ಎಷ್ಟು ಜನ ಇದ್ದೀರಿ? ಎಂದರೆ ಇಂದ್ರಮಣಿಯ ಮುಖದ ಮೇಲೆ ಸಣ್ಣದೊಂದು ನಗು ಹಾಯ್ದು ಹೋಗುತ್ತದೆ.

‘ಇಲ್ಲಿ ಶೆಫ್ ಅಂದ್ರೂ ನಾನೇ, ವೇಟರ್ ಅಂದ್ರೂ, ಕ್ಲೀನರ್ ಅಂದ್ರೂ ನಾನೇ, ಮತ್ತೆ ಮಾಲೀಕನೂ...’ ಮನೆಯಲ್ಲಿ ಹೆಂಡತಿ ಸಹಾಯ ಮಾಡುತ್ತಾಳೆ. ಹಸಿ ಸಮೋಸಾ ಮನೆಯಲ್ಲಿಯೇ ಇಬ್ಬರೂ ಸೇರಿ ತಯಾರು ಮಾಡುತ್ತೇವೆ. ಇಲ್ಲಿ ಬಂದು ಕರಿದಿಡುತ್ತೇನೆ. ಮತ್ತೆ ಬೇಕಾದಾಗ ಬೇಕಾದಷ್ಟನ್ನು ಇಲ್ಲಿಯೇ ತಯಾರಿಸಿಕೊಳ್ಳುತ್ತೇನೆ. ಬರ್ತ್ ಡೇ, ಕಿಟ್ಟಿ ಪಾರ್ಟಿಯಂತಹ ಸಣ್ಣ ಪುಟ್ಟ ಸಂತಸದ ಗಳಿಗೆಯಲ್ಲಿ ಜನ ನನ್ನ ನೆನೆಸಿಕೊಳ್ಳುತ್ತಾರೆ. ಒಂದಿನ ಮೊದಲು ಹೇಳಿದರೆ ಸಾಕು. ಸಮಯಕ್ಕೆ ಸರಿಯಾಗಿ ಅವರ ಮನೆಗೆ ಮುಟ್ಟುತ್ತದೆ ಬಿಸಿ ಬಿಸಿ ಸಮೋಸಾ/ಕಚೋರಿ’

ದಿನಕ್ಕೆ 200 ಮೇಲ್ಪಟ್ಟು ಸಮೋಸಾ ಮಾರಾಟ ಆಗುತ್ತವೆ. ದಿನಕ್ಕೆ ಎರಡ್ಮೂರು ಸಾವಿರ ವಹಿವಾಟು ನಡೆಯುತ್ತದೆ. ಊರಿಗೆ 15ರಿಂದ 20 ಸಾವಿರ ರೂಪಾಯಿ ಕಳಿಸುತ್ತೇನೆ. ಇಬ್ಬರು ಮಕ್ಕಳು ಶಾಲೆ ಕಲಿಯುತ್ತಿದ್ದಾರೆ. ಖರ್ಚು ಎಲ್ಲಾ ತೆಗೆದರೂ ಸಾವಿರಾರು ರೂಪಾಯಿ ಬ್ಯಾಲನ್ಸ್ ಉಳಿಯುತ್ತದೆ ಎನ್ನುತ್ತಾರೆ.

‘ಎಂಥವರು, ಎಲ್ಲಿಂದ ಬಂದರೂ ಬೆಂಗ್ಳೂರು ಬದುಕು ಕಟ್ಟಿಕೊಡುತ್ತೆ. ರಟ್ಟೆ ಗಟ್ಟಿ ಇರಬೇಕಷ್ಟೇ’ ಎನ್ನುವ ಇಂದ್ರಮಣಿ, ದಿನಕ್ಕೆ 12ರಿಂದ 15 ತಾಸು ದುಡಿಯುತ್ತಾರೆ.