ಬೆಂಗಳೂರು: ‘ಸ್ಟಾರ್ ಅಲಯನ್ಸ್ನಲ್ಲಿರುವ ವಿಮಾನಯಾನ ಸಂಸ್ಥೆಗಳೊಂದಿಗೆ ಉತ್ತಮ ಸಂಬಂಧ ಮತ್ತು ಸಹಕಾರ ಸಾಧಿಸುವ ಪ್ರಯತ್ನ ಜಾರಿಯಲ್ಲಿದೆ. ಮಾರ್ಚ್ ಅಂತ್ಯದೊಳಗೆ ಸ್ಟಾರ್ ಅಲಯನ್ಸ್ನ ಎಲ್ಲಾ ವಿಮಾನಯಾನ ಸಂಸ್ಥೆಗಳ ಜತೆ ಕೋಡ್ ಷೇರ್ (ವಿಮಾನ ವೇಳಾಪಟ್ಟಿ ವಿನಿಮಯ ಮತ್ತು ಟಿಕೆಟ್ ಮಾರಾಟ ಅವಕಾಶ) ಒಪ್ಪಂದ ಮಾಡಿಕೊಳ್ಳಲಾಗುವುದು ಎಂದು ‘ಏರ್ ಇಂಡಿಯಾ’ ಅಧ್ಯಕ್ಷ ರೋಹಿತ್ ನಂದನ್ ಹೇಳಿದ್ದಾರೆ.
ಜಾಗತಿಕ ವಿಮಾನಯಾನ ಒಕ್ಕೂಟ ‘ಸ್ಟಾರ್ ಅಲಯನ್ಸ್’ನ ಭಾರತದಲ್ಲಿನ ಮೊದಲ ಮುಖ್ಯ ಕಾರ್ಯನಿರ್ವಾಹಕ ಮಂಡಳಿ (ಸಿಇಬಿ) ಸಭೆಯನ್ನು ‘ಏರ್ ಇಂಡಿಯಾ’ ಸಂಸ್ಥೆ ದೆಹಲಿಯಲ್ಲಿ ಬುಧವಾರ ಆಯೋಜಿಸಿತ್ತು. ನಂತರ ಸುದ್ದಿಗಾರರ ಜತೆ ಮಾತನಾಡಿದ ಸಂಸ್ಥೆ ಅಧ್ಯಕ್ಷ ರೋಹಿತ್, ‘ಈಗಾಗಲೇ ಏರ್ ಕೆನಡಾದೊಂದಿಗೆ ಕೋಡ್ ಷೇರ್ ಒಪ್ಪಂದಕ್ಕೆ ಸಹಿ ಮಾಡಿದ್ದೇವೆ’ ಎಂದಿದ್ದಾರೆ.
‘ಜಾಗತಿಕ ವಿಮಾನಯಾನ ಕ್ಷೇತ್ರದಲ್ಲಿ ಪ್ರತಿಷ್ಠಿತ ಒಕ್ಕೂಟವಾದ ಸ್ಟಾರ್ ಅಲಯನ್ಸ್ ಸದಸ್ಯತ್ಯ ಪಡೆಯುವ ಮೂಲಕ ಸಂಸ್ಥೆಯು ತನ್ನ ಸೇವೆಗಳ ಗುಣಮಟ್ಟ ವೃದ್ಧಿಗೆ ಹಲವು ಬದಲಾವಣೆಗಳನ್ನು ಮಾಡಿಕೊಳ್ಳುತ್ತಿದೆ’ ಎಂದು ಹೇಳಿದ್ದಾರೆ.
ಒಪ್ಪಂದದ ಬಳಿಕ ಏರ್ ಇಂಡಿಯಾ ಮತ್ತು ಸ್ಟಾರ್ ಅಲಯನ್ಸ್ನಲ್ಲಿರುವ ವಿಮಾನಯಾನ ಸಂಸ್ಥೆಗಳ ನಡುವೆ ಪ್ರಯಾಣಿಸುವ ಪ್ರಯಾಣಿಕರ ಸಂಖ್ಯೆ ಶೇ 33ರಷ್ಟು ಹೆಚ್ಚಿದೆ. ಮುಖ್ಯವಾಗಿ ದೆಹಲಿ ಅಥವಾ ಮುಂಬೈ ಮೂಲಕ ಪ್ರಯಾಣಿಸುವವರ ಸಂಖ್ಯೆಯಲ್ಲಿ ಏರಿಕೆ ಆಗಿದೆ ಎಂದು ಮಾಹಿತಿ ನೀಡಿದ್ದಾರೆ.
ಜಾಗತಿಕ ಮಟ್ಟದಲ್ಲಿ ಭಾರತವು ಸ್ವದೇಶಿ ವಿಮಾನಯಾನ ಸೇವೆ ಒದಗಿಸುವ ಐದನೇ ಅತಿದೊಡ್ಡ ಮಾರುಕಟ್ಟೆಯಾಗಿದೆ. ಹೀಗಾಗಿ ಸ್ವದೇಶ ಮತ್ತು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಏರ್ ಇಂಡಿಯಾ ಸಂಸ್ಥೆಯನ್ನು ಬೆಳೆಸಲಾಗುವುದು ಎಂದು ಸ್ಟಾರ್ ಅಲಯನ್ಸ್ನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಮಾರ್ಕ್ ಸ್ವಾಬ್ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.