ಹೊದ್ಲು ಅರಳುವ ಪರಿ

ಉರಿ ಇಳಿದರೆ ನೆಲ್ಲು
ಉರಿ ಏರಿದರೆ ಕತ್ತು ಕರಗಮ್ಮು
ಏರಿಳಿಯದ ಬಿಸಿಯಲ್ಲಿ
ಬುರುಬುರನೆ ಒದಗುವ ಹೊದ್ಲು

ಇದು ಭತ್ತದ ಸ್ಥಿತಿ
ಒಲೆಯ ಮೇಲಿಟ್ಟ ಬಾಂಡಿಯಲ್ಲಿ
ನಿರಂತರ ಹೊಯ್ದಾಟ
ಉಳಿದರೆ ಬೇಯುವ ಪರಿ
ಜಿಗಿದರೊ ಸುಡುವ ಉರಿ
ಇದು ಹೊದ್ಲು ಅರಳುವ ಪರಿ

ಅಲ್ಲೊಂದು ಇಲ್ಲೊಂದು
ಪಟಪಟನೆ ಸಿಡಿದರೂ
ಕೆಂಪು ಕೆನ್ನಾಲಿಗೆಯ ಬಿಗಿಹಿಡಿತ
ಸಿಡಿಯಗೊಡದನಲನ ಹಿಕ್ಮತ್ತು
ಸುಟ್ಟು ಬೂದಿಯಾಗುವುದಕ್ಕಿಂತ
ಕಾದು ಅರಳಾಗುವುದೇ ಲೇಸು

ಬಯಲ ಬಾಂಡಲಿ ಹೊಕ್ಕು
ಹುಟ್ಟಿನ ಹೊಟ್ಟಿಂದ ಹೊರಬಂದು
ಕಾದಷ್ಟು ಮೈ ಹಿಗ್ಗಿ
ಬಿಳಿಯ ಅರಳಾಗುವುದು ಅಷ್ಟು ಸುಲಭವೆ?

ಮೆಲ್ಲುವವರಿಗೆಷ್ಟು ಗೊತ್ತು
ಭತ್ತವ ಹೊದ್ಲಾಗಿಸಿದ
ಬೆಂಕಿಯ ಹದ!
(ಹೊದ್ಲು=ಭತ್ತದ ಅರಳು)