‘ಆ’ ಶಾಲೆಗಳನ್ನು ಇಂಗ್ಲಿಷ್ ಮಾಧ್ಯಮ ಶಾಲೆಗಳೆಂದೇ ಗುರುತಿಸಿ
ಕನ್ನಡ ಮಾಧ್ಯಮದಲ್ಲಿ ಶಾಲೆ ನಡೆಸುತ್ತೇವೆಂದು ಛಾಪಾ ಕಾಗದದಲ್ಲಿ ಬರೆದುಕೊಟ್ಟು ಇಂಗ್ಲಿಷ್‌ನಲ್ಲಿ ಪಾಠ ಮಾಡುತ್ತಿರುವ ಶಾಲೆಗಳನ್ನು ಆದಷ್ಟು ಬೇಗನೇ ಎಡಬಿಡಂಗಿತನದಿಂದ ತಪ್ಪಿಸುವುದು ಉಚಿತ. ನ್ಯಾಯಾಲಯವೂ ಅದನ್ನೇ ಹೇಳಿದೆ. ಅದು ಇನ್ನೂ ಒಂದು ಹೆಜ್ಜೆ ಮುಂದಿಟ್ಟು ಸರ್ಕಾರದ ನೀತಿಯನ್ನೇ ಪ್ರಶ್ನಿಸಿದೆ. ಎಂತಹ ಪ್ರಶ್ನೆ ಅಂದರೆ ನಮಗೀಗ ಗೊಂದಲ.
ಪ್ರಜೆಗಳಿಂದ ಆಯ್ಕೆಯಾದ ಸರ್ಕಾರಕ್ಕೆ ನಾಡಿಗೆ ಯಾವುದು ಸೂಕ್ತವೋ ಅದನ್ನು ಮಾಡುವ ಹಕ್ಕೂ ಇಲ್ಲ! ಕರ್ನಾಟಕದಲ್ಲಿ ಕನ್ನಡ ಮಾಧ್ಯಮದ ಶಾಲೆಗಳನ್ನೇ ತೆರೆಯಬೇಕೆಂಬ ಕಾನೂನನ್ನೂ ಮಾಡುವಂತಿಲ್ಲವೆಂದಾದರೆ ಇದಕ್ಕೆ ಏನರ್ಥ? ನೆಲ–ಜಲದ, ಭಾಷೆ-–ಸಂಸೃತಿಯ ಬಗ್ಗೆ ಕಾನೂನು ಮಾಡುವ ಹೊಣೆ ಮತ್ತು ಹಕ್ಕು ಸರ್ಕಾರಕ್ಕಿಲ್ಲವೇ? ಇದು ನ್ಯಾಯಾಲಯದ ಕ್ರಿಯಾಶೀಲತೆಯೇ? ಅಥವಾ ವಿಶಾಲ ಸಾಂಸ್ಕೃತಿಕ ದೃಷ್ಟಿಕೋನದ ಅವಜ್ಞೆಯೇ?
ಪ್ರಸ್ತುತ ಇಂಗ್ಲಿಷ್‌ನಲ್ಲಿ ಪಾಠ ಮಾಡುತ್ತಿರುವ ಶಾಲೆಗಳನ್ನು ಆಂಗ್ಲಮಾಧ್ಯಮದ ಶಾಲೆಗಳೆಂದೇ ಗುರುತಿಸಿ ಮಾನ್ಯತೆ ನೀಡುವುದರಿಂದ ಕೆಲವೊಂದು ಉಪಯೋಗಗಳಿವೆ. ಮುಖ್ಯವಾಗಿ ಅವುಗಳಲ್ಲಿ ಕಲಿಯುವ ಮಕ್ಕಳಿಗೆ ಶಾಲೆ ಬದಲಾಯಿಸುವಾಗ ‘ಕನ್ನಡದಲ್ಲಿ ಕಲಿತದ್ದು’ ಎಂದು ಸುಳ್ಳು ವರ್ಗಾವಣೆ ಪತ್ರ ನೀಡಬೇಕಾಗಿಲ್ಲ. ಉದ್ಯೋಗ ನಿಮಿತ್ತ ಊರಿಂದ ಊರಿಗೆ ವರ್ಗಾವಣೆ ಪಡೆಯುವ ಹೆತ್ತವರಿಗೆ ಇದರಿಂದಾಗಿ ಆತಂಕ ಕಡಿಮೆಯಾಗುತ್ತದೆ.
ಇನ್ನು ಮಕ್ಕಳು ಎರಡೆರಡು ಮಾಧ್ಯಮಗಳ ಪುಸ್ತಕಗಳನ್ನು ಹೊರಬೇಕಾಗಿಲ್ಲ. ‘ನಾವು ಇಂಗ್ಲಿಷ್ ಮಾಧ್ಯಮದವರೇ’ ಎಂಬುದಾಗಿ ನಿರ್ಭೀತಿಯಿಂದ ಹೇಳಬಹುದು. ಶಿಕ್ಷಕರು ಸಾಚಾ ಮತ್ತು ಖೊಟ್ಟಿ ಅಂಕಪಟ್ಟಿಗಳನ್ನು ಇಟ್ಟುಕೊಳ್ಳಬೇಕಾಗಿಲ್ಲ. ಶಾಲಾ ತಪಾಸಣಾಧಿಕಾರಿಗಳು ಯಾವ ಹೊತ್ತಿನಲ್ಲಿ ಬಂದರೂ ಹೆದರಬೇಕಾಗಿಲ್ಲ. ಆಂಗ್ಲ ಮಾಧ್ಯಮ ಶಾಲೆಯೆಂದು ಹಣೆಪಟ್ಟಿ ಸಿಕ್ಕಿದ ಬಳಿಕ ವಿದ್ಯಾರ್ಥಿಗಳ ಕಲಿಕಾ ಗುಣಮಟ್ಟದ ಪರಿಶೀಲನೆಗೆಂದು ಯಾರೂ ಬರುವುದಿಲ್ಲ.
ಹಾಗಾಗಿ ಶಿಕ್ಷಕರ ಗುಣಮಟ್ಟ ಹಾಗೂ ಸಾಮರ್ಥ್ಯ ವೃದ್ಧಿಯ ಕುರಿತಾಗಿ ಯಾವುದೇ ಚಿಂತೆಯ ಅಗತ್ಯವಿಲ್ಲ. ಪ್ರಾಥಮಿಕ ಹಂತದಲ್ಲಿ ಹೇಗೂ ವಿದ್ಯಾರ್ಥಿಗಳ ಪರೀಕ್ಷೆಯ ಉತ್ತರಪತ್ರಗಳನ್ನು ಶಾಲೆಗಳಲ್ಲೇ ಮೌಲ್ಯಮಾಪನ ಮಾಡುವುದರಿಂದ ದೇಣಿಗೆ ಪಡೆದದ್ದಕ್ಕೆ ತೃಪ್ತಿಯಾಗುವಂತೆ ಅಂಕಗಳನ್ನು ನೀಡಿ ಮಗುವಿನ ಸಾಮರ್ಥ್ಯವನ್ನು ಹೊಗಳುತ್ತ ಏಳನೇ ತರಗತಿ ದಾಟಿಸಿಬಿಟ್ಟ ಬಳಿಕ ಆ ಶಾಲೆ ಮತ್ತೆ ಯಾವುದಕ್ಕೂ ಹೊಣೆಯಲ್ಲ.
ಶಾಲೆಗೆ ಆಕರ್ಷಕ ಹೆಸರಿಟ್ಟು ಆ ಮೂಲಕ ಮಂಕುಬೂದಿ ಹಾಕುತ್ತಾರೆ. ಈ ವಿಷಯವನ್ನು ನ್ಯಾಯಾಲಯದ ಗಮನಕ್ಕೆ ತರುವುದಕ್ಕೆ ಯಾರು ಮುಂದೆ ಬರುತ್ತಾರೆ? ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಹಾಕಿದರೂ ಸಾಕ್ಷ್ಯ ಎಲ್ಲಿಂದ ತರುವುದು? ಶಿಕ್ಷಣ ಇಲಾಖೆಯಂತೂ ಈ ವಿಚಾರದಲ್ಲಿ ಸ್ಪಂದನಶೂನ್ಯ ಸಂಸ್ಥೆಯಾಗಿದೆ. ಅದೆಲ್ಲಿಯಾದರೂ ಕರುಣೆಯಿಂದ ಸ್ಪಂದಿಸಿದರೆ ಅದು ಇಂಗ್ಲಿಷ್‌ನ ಕಡೆಗೆ ಹೊರತು ಕನ್ನಡದ ಕಡೆಗಲ್ಲ. ಏಕೆಂದರೆ ಶಿಕ್ಷಣ ಇಲಾಖೆಗೆ ನಿರ್ದಿಷ್ಟ ಪ್ರಯೋಜನಗಳಿವೆ.
ಇಂತಹ ಶಾಲೆಗಳಿಗೆ ಪ್ರತಿವರ್ಷ ಮಾನ್ಯತೆಯ ನವೀಕರಣ ಮಾಡುವ ಸಂಪ್ರದಾಯವನ್ನು ಹಾಕಿಕೊಂಡರೆ ಕಾಯಂ ಆದಾಯದ ವ್ಯವಸ್ಥೆಯಾಗುತ್ತದೆ. ಆಂಗ್ಲ ಮಾಧ್ಯಮವಾದುದರಿಂದ ಹೆಚ್ಚು ಶುಲ್ಕ ವಸೂಲಾತಿಯ ಸಾಧ್ಯತೆಗಳಿರುವುದರಿಂದ ಶಿಕ್ಷಕರಿಗೆ ನೀಡುವ ವೇತನವನ್ನು ಹೆಚ್ಚಿಸಬೇಕೆಂಬ ನಿಯಮಾವಳಿಯನ್ನು ರೂಪಿಸಬಹುದು. ಅದು ಬಹುತೇಕ ಜಾರಿಗೆ ತರಲಾಗದ ಸ್ಥಿತಿ ಇದ್ದಾಗ ಮಾನ್ಯತೆಯ ಸಂಕೋಲೆಯನ್ನು ಒಂದಿಷ್ಟು ಬಿಗಿಯಬಹುದು. ಇದಲ್ಲದೆ ಪಠ್ಯ ಪುಸ್ತಕಗಳನ್ನು ತಮಗೆ ತಾವೇ ಆಯ್ಕೆ ಮಾಡಲು ಬಿಡದೆ ಪುಸ್ತಕ ಮಾರಾಟದ ಲಾಬಿಯನ್ನು ಪುಷ್ಟಿಗೊಳಿಸಬಹುದು.
ಇನ್ನು, ಗುರುತಿಸಲಾದ ಆಂಗ್ಲ ಮಾಧ್ಯಮದ ಶಾಲೆಗಳನ್ನು ಕಳೆದು ಉಳಿದವುಗಳಷ್ಟೇ ನಿಜವಾದ ಕನ್ನಡ ಮಾಧ್ಯಮದ ಶಾಲೆಗಳೆಂದು ಮಾನ್ಯತೆನೀಡಬಹುದು. ಅವುಗಳ ಸಂಖ್ಯೆ ಕಡಿಮೆ ಇರುವುದರಿಂದ ಈ ತನಕ ಅನುದಾನ ಸಿಗದಿರುವ ಕನ್ನಡ ಶಾಲೆಗಳಿಗೆ ತಕ್ಷಣದಿಂದಲೇ ಅನುದಾನ ನೀಡಬಹುದು. ಈವರೆಗೆ ಅನುದಾನದ ಬೇಡಿಕೆ ಇಟ್ಟಾಗ ಆಂಗ್ಲಮಾಧ್ಯಮದ ಶಾಲೆಗಳೂ ‘ನಮ್ಮದು ಕನ್ನಡ ಮಾಧ್ಯಮದ ಅನುಮತಿ’ ಎನ್ನುತ್ತ ಅನುದಾನಕ್ಕೆ ಅಡ್ಡ ಬರುತ್ತಿದ್ದುವು.
ಒಮ್ಮೆ ಅವುಗಳನ್ನು ಆಂಗ್ಲ ಮಾಧ್ಯಮದವುಗಳೆಂದೇ ಗುರುತಿಸಿ ಪಕ್ಕಕ್ಕಿಟ್ಟ ಬಳಿಕ ಅನುದಾನದ ಪ್ರಕ್ರಿಯೆ ಸುಲಭವಾಗಬಹುದು. ಹತ್ತು ವರ್ಷಗಳಲ್ಲಿ ಆಂಗ್ಲ ಮಾಧ್ಯಮದ ಹುಚ್ಚು ಇಳಿದಾಗ ಕನ್ನಡ ಮಾಧ್ಯಮದ ಶಾಲೆಗಳು ಬಲಗೊಳ್ಳಬಹುದು. ಬಹುಶಃ ಈ ಆಶಾಭಾವನೆಯನ್ನು ಈಗ ಯಾರೂ ಒಪ್ಪಲಾರರು. ಆದರೆ ನನಗೆ ಅಂತಹ ದಿನಗಳು ಬರಬಹುದೆಂಬ ಒಂದು ಆಸೆ ಇದೆ. ಏಕೆಂದರೆ ಇತಿಹಾಸ ಮರುಕಳಿಸುವ ಅಗತ್ಯ ಬೀಳಲಿದೆ.
ಇಂದು ಶ್ರೀಮಂತ ಹಾಗೂ ಮಧ್ಯಮ ವರ್ಗದವರಷ್ಟೇ ಅಲ್ಲ, ಕೂಲಿಕಾರರೂ ತಮ್ಮ ಮಕ್ಕಳನ್ನು ಆಂಗ್ಲ ಮಾಧ್ಯಮದ ಶಾಲೆಗಳಿಗೇ ಕಳಿಸುತ್ತಾರೆ. ‘ನಾವು ಇಂಗ್ಲಿಷ್ ಕಲಿಯುವ ಯೋಗ ಇಲ್ಲದೆ ಹಿಂದುಳಿದಿದ್ದೇವೆ. ನಮ್ಮ ಮಕ್ಕಳಿಗೂ ಹಾಗಾಗುವುದು ಬೇಡ’. - ಇದು ಅವರ ಧೋರಣೆ. ಅದಕ್ಕಾಗಿ ಬೇಕಾದ ಸಂಪನ್ಮೂಲವನ್ನು ಹೇಗಾದರೂ ಸಂಗ್ರಹಿಸುತ್ತಾರೆ. ಆದರೆ ಅವರಿಗೆ ತಾವು ತಮ್ಮ ಮಗುವಿಗಾಗಿ ಆಯ್ಕೆ ಮಾಡಿರುವುದು ಇಂಗ್ಲಿಷ್ ಶಾಲೆ ಎಂದಷ್ಟೇ ಗೊತ್ತು.
ಅದರ ಗುಣಮಟ್ಟವಾಗಲೀ, ಶಿಕ್ಷಕರ ಕಲಿಸುವ ಕೌಶಲದ ಬಗೆಗಾಗಲೀ, ಅದರ ಮಾನ್ಯತೆಯ ಕುರಿತಾಗಲೀ ವಿಚಾರಿಸಿಕೊಳ್ಳುವುದಕ್ಕಿದೆಯೆಂದೇ ಅವರಿಗೆ ಗೊತ್ತಿರುವುದಿಲ್ಲ. ಇಂಗ್ಲಿಷ್‌ನಿಂದ ಮಗು ಉದ್ಧಾರವಾಗುತ್ತದೆ ಎಂಬ ಒಂದೇ ಗುರಿ ಅವರಿಗೆ. ಮಗುವಿಗೂ ಕಲಿಕೆಯೆಂಬುದರ ಸ್ಪಷ್ಟ ಕಲ್ಪನೆ ಇರುವುದಿಲ್ಲ. ಕಲಿಸಿದ್ದನ್ನು ಉರು ಹೊಡೆಯುವುದೇ ಕಲಿಕೆ ಎಂಬ ಸರಳ ತಿಳಿವಳಿಕೆಗೆ ಅದು ಬರುತ್ತದೆ.
ಜ್ಞಾನ ಮತ್ತು ಮಾಹಿತಿಯ ವ್ಯತ್ಯಾಸ ಅದಕ್ಕೆ ಹೇಗೆ ತಿಳಿಯಲು ಸಾಧ್ಯ? ಅದು ಶಿಕ್ಷಕರಿಗೆ ಗೊತ್ತಿದ್ದರೆ ಭಾಗ್ಯ! ಇಂತಹ ಶಿಕ್ಷಣದಲ್ಲಿ ಹೆಣಗಾಡಿದ ಮಗು ಬೆಳೆದು ಅಪೇಕ್ಷಿತ ನೆಲೆಯನ್ನು ಕಾಣದಿದ್ದಾಗ ಮುಂದೆ ತನ್ನ ಮಕ್ಕಳಿಗೆ ತನ್ನ ಪಾಡು ಬರದಿರಲಿ, ಅರ್ಥವಾಗುವ ಮಾಧ್ಯಮದಲ್ಲೇ ಕಲಿಯಲಿ ಎಂಬ ತೀರ್ಮಾನಕ್ಕೆ ಬರುವ ಸಾಧ್ಯತೆ ಇದೆ. ಅಷ್ಟರವರೆಗೆ ಕನ್ನಡ ಶಾಲೆಗಳನ್ನು ಚೆನ್ನಾಗಿ ಬೆಳೆಸಿ ಉಳಿಸಿಕೊಳ್ಳಬೇಕು. ಅವುಗಳಲ್ಲಿ ನಿಜವಾದ ಶಿಕ್ಷಣದ ಪ್ರಕ್ರಿಯೆ ಜರಗುತ್ತಿರುವಂತೆ ನೋಡಿಕೊಳ್ಳಬೇಕು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.