‘ಈದ್‌ ಸಿಹಿ’ ಬೇಡವೆಂದ ಪಾಕ್‌

ಭಾನುವಾರ ಸಂಜೆ ನಡೆದ ಉಭಯ ರಾಷ್ಟ್ರಗಳ ಸೆಕ್ಟರ್‌ ಕಮಾಂಡರ್‌ಗಳ ಸಭೆಯಲ್ಲಿ ಸಿಹಿ ವಿನಿಮಯಕ್ಕೆ ಪಾಕಿಸ್ತಾನ ಸಮ್ಮತಿ ಸೂಚಿಸಿಲ್ಲ ಎಂದು ಉನ್ನತ ಮೂಲಗಳು ತಿಳಿಸಿವೆ.

ಈದ್ ಸಂದರ್ಭದಲ್ಲಿ ವಾಘಾಗಡಿಯಲ್ಲಿ ಉಭಯ ರಾಷ್ಟ್ರಗಳ ಸೇನಾಧಿಕಾರಿಗಳು ಸಿಹಿ ವಿನಿಮಯ ಮಾಡಿಕೊಳ್ಳುವುದು ಹಲವು ವರ್ಷಗಳಿಂದ ನಡೆದು ಬಂದಿದೆ. ಆದರೆ, ಈ ಬಾರಿ ಸಿಹಿ ವಿನಿಮಯಕ್ಕೆ ಪಾಕ್‌ ಸಮ್ಮತಿಸಿಲ್ಲ. ಜಮ್ಮು– ಕಾಶ್ಮೀರದಲ್ಲಿ ನಡೆಯುತ್ತಿರುವ ದಾಳಿ ಕಾರಣದಿಂದ ಪಾಕ್‌ ನಕಾರ ವ್ಯಕ್ತಪಡಿಸಿರಬಹುದು ಎಂದು ಮೂಲಗಳು ತಿಳಿಸಿವೆ.

ಪ್ರತಿ ವರ್ಷ ಸ್ವಾತಂತ್ರ್ಯ ದಿನಾಚರಣೆ, ಈದ್‌, ದೀಪಾವಳಿ ಸಂದರ್ಭದಲ್ಲಿ ವಾಘಾ ಗಡಿಯ ಗಡಿನಿಯಂತ್ರಣ ರೇಖೆಯ ಮುಖ್ಯದ್ವಾರಗಳನ್ನು ತೆರೆದು ಎರಡೂ ರಾಷ್ಟ್ರಗಳ ಗಡಿಯ ಭದ್ರತಾ ಅಧಿಕಾರಿಗಳು ಸಿಹಿ ವಿನಿಮಯ ಮಾಡಿಕೊಳ್ಳುವುದು ಹಾಗೂ ಉಭಯ ಸೇನೆಗಳ ಗೌರವ ವಂದನೆಯು ಸಂಪ್ರದಾಯದಂತೆ ನಡೆದುಬಂದಿದೆ. ಆದರೆ, ಈ ಬಾರಿ ಸಿಹಿ ವಿನಿಮಯಕ್ಕೆ ಪಾಕ್‌ ಅಸಮ್ಮತಿ ಸೂಚಿಸಿದೆ.