ವಾಷಿಂಗ್ಟನ್ (ಎಎಫ್ಪಿ): ಇಸ್ಲಾಮಿಕ್ ಸ್ಟೇಟ್ (ಐಎಸ್) ಜಗತ್ತಿನ ಅತ್ಯಂತ ಶ್ರೀಮಂತ ಉಗ್ರಗಾಮಿ ಸಂಘಟನೆಯಾಗಿ ರೂಪುಗೊಂಡಿದೆ. ತೈಲ ಕಾಳದಂಧೆ, ಒತ್ತೆ ಹಣ ಮತ್ತು ಸುಲಿಗೆಯ ಮೂಲಕ ಈ ಸಂಘಟನೆ ಕೋಟ್ಯಂತರ ಡಾಲರ್ ಹಣ ಗಳಿಸುತ್ತಿದೆ ಎಂದು ಮೂಲಗಳು ಹೇಳಿವೆ.
ಈ ವರ್ಷದ ಆರಂಭದಲ್ಲಿ ಇರಾಕ್ ಮತ್ತು ಸಿರಿಯಾದಿಂದ ವಶಪಡಿಸಿಕೊಂಡ ಪ್ರದೇಶಗಳಲ್ಲಿರುವ ತೈಲ ನಿಕ್ಷೇಪಗಳಿಂದ ಕಚ್ಚಾ ತೈಲ ಮಾರಾಟ ಮಾಡುವುದರ ಮೂಲಕವೇ ಐಎಸ್ ಪ್ರತಿ ದಿನ ಆರು ಕೋಟಿ ರೂಪಾಯಿಗೂ ಹೆಚ್ಚಿನ ಹಣ ಪಡೆಯುತ್ತಿದೆ ಎಂದು ಅಮೆರಿಕದ ಹಣಕಾಸು ಸಚಿವಾಲಯದ ಅಧೀನ ಕಾರ್ಯದರ್ಶಿ ಡೇವಿಡ್ ಕೋಹೆನ್ ಹೇಳಿದ್ದಾರೆ.
ಇತರ ಭಯೋತ್ಪಾದನಾ ಗುಂಪುಗಳಿಗಿಂತ ಭಿನ್ನವಾಗಿ ಐಎಸ್ ಭಾರಿ ಮೊತ್ತದ ಹಣ ಸಂಗ್ರಹ ಮಾಡಿದೆ. ಈ ಹಣದ ಹರಿವನ್ನು ತಡೆಯುವುದು ಅಮೆರಿಕ ಮತ್ತು ಮಿತ್ರಕೂಟಕ್ಕೆ ದೊಡ್ಡ ಸವಾಲಾಗಿದೆ. ‘ಐಎಸ್ ಖಜಾನೆಯನ್ನು ಒಮ್ಮಿಂದೊಮ್ಮೆಲೆ ಬರಿದುಗೊಳಿಸಲು ನಮ್ಮಲ್ಲಿ ಯಾವುದೇ ರಹಸ್ಯ ಅಸ್ತ್ರ ಇಲ್ಲ. ಇದೊಂದು ನಿರಂತರ ಸಂಘರ್ಷವಾಗಿದ್ದು ನಾವು ಆರಂಭಿಕ ಹಂತದಲ್ಲಿಇದ್ದೇವೆ’ ಎಂದು ಕೋಹೆನ್ ಹೇಳಿದ್ದಾರೆ.
ಐಎಸ್ ವಿರುದ್ಧ ಹೋರಾಟ ನಡೆಸುವ, ಅದಕ್ಕಾಗಿ ಮಿತ್ರ ದೇಶಗಳನ್ನು ಒಟ್ಟು ಸೇರಿಸುವ ಅಮೆರಿಕ ಸರ್ಕಾರದ ತಂಡದಲ್ಲಿ ಕೋಹೆನ್ ಸದಸ್ಯರಾಗಿದ್ದಾರೆ. ‘ಐಎಸ್ ಈಗ ಜಗತ್ತಿನ ಅತ್ಯಂತ ಶ್ರೀಮಂತ ಮತ್ತು ಹಣಕಾಸಿನ ವಿಷಯದಲ್ಲಿ ಸುಸ್ಥಿತಿಯಲ್ಲಿರುವ ಉಗ್ರಗಾಮಿ ಸಂಘಟನೆ’ ಎಂದು ಅಂತರರಾಷ್ಟ್ರೀಯ ಶಾಂತಿಯ ಕಾರ್ನೆಗಿ ದತ್ತಿಯ ಉಪಾಧ್ಯಕ್ಷ ಮಾರ್ವನ್ ಮೌಷರ್ ಹೇಳಿದ್ದಾರೆ.
ಅಲ್ಕೈದಾದಂತಹ ಉಗ್ರಗಾಮಿ ಸಂಘಟನೆಗಳು ಹಣಕ್ಕಾಗಿ ಸಂಘಟನೆಯ ಬಗ್ಗೆ ಸಹಾನುಭೂತಿ ಇರುವ ಶ್ರೀಮಂತರು ಮತ್ತು ಕೆಲವು ರಾಷ್ಟ್ರಗಳಿಂದ ಹಣ ಪಡೆಯುತ್ತವೆ. ಆದರೆ ಐಎಸ್ ಇದಕ್ಕಿಂತ ಭಿನ್ನವಾದ ದಾರಿ ತುಳಿದಿದೆ. ಸ್ವಾಧೀನಪಡಿಸಿಕೊಂಡಿರುವ ತೈಲ ನಿಕ್ಷೇಪಗಳಿಂದ ಐಎಸ್ ಪ್ರತಿ ದಿನ 50 ಸಾವಿರಕ್ಕೂ ಹೆಚ್ಚು ಬ್ಯಾರಲ್ ತೈಲ ಉತ್ಪಾದನೆ ನಡೆಸುತ್ತಿದೆ. ಇದನ್ನು ಟರ್ಕಿ ಸೇರಿ ವಿವಿಧ ದೇಶಗಳ ಮಧ್ಯವರ್ತಿಗಳಿಗೆ ಅತ್ಯಂತ ಕಡಿಮೆ ದರದಲ್ಲಿ ಮಾರಾಟ ಮಾಡುತ್ತಿದೆ.
ತೈಲ ಕಾಳದಂಧೆ ಈ ಪ್ರದೇಶದಲ್ಲಿ ಬಹಳ ಹಿಂದಿನಿಂದಲೂ ಇದೆ. ಇರಾಕ್ನಲ್ಲಿರುವ ಕುರ್ದ್ ಸಮುದಾಯದ ಜನರು ತೈಲ ಖರೀದಿ ಮಾಡುತ್ತಾರೆ. ನಂತರ ಅದನ್ನು ಟರ್ಕಿಯಲ್ಲಿ ಮಾರಾಟ ಮಾಡಲಾಗುತ್ತದೆ. ಹೀಗೆ ಬೇರು ಬಿಟ್ಟಿರುವ ಕಾಳದಂಧೆಯನ್ನು ಐಎಸ್ ತನ್ನ ಉಪಯೋಗಕ್ಕೆ ಬಳಸಿಕೊಳ್ಳುತ್ತಿದೆ.
ಐಎಸ್ ವಿರುದ್ಧ ಹೋರಾಟ ನಡೆಸುತ್ತಿರುವ ಬಷರ್ ಅಲ್ ಅಸದ್ ನೇತೃತ್ವದ ಸಿರಿಯಾ ಸರ್ಕಾರ ಕೂಡ ಈ ಉಗ್ರರಿಂದ ತೈಲ ಖರೀದಿ ಮಾಡುತ್ತಿದೆ. ಹಿಂದೆ ಸಿರಿಯಾ ನಿಯಂತ್ರಣದಲ್ಲಿದ್ದ ನಿಕ್ಷೇಪಗಳು ಮತ್ತು ರಿಫೈನರಿಗಳಿಂದಲೇ ಈ ತೈಲ ಪೂರೈಕೆ ನಡೆಯುತ್ತಿದೆ.
ಈ ವರ್ಷ ಅಪಹರಣದಿಂದ ಪಡೆದ ಒತ್ತೆ ಹಣವೇ ರೂ 120 ಕೋಟಿಗೂ ಹೆಚ್ಚು. ಪತ್ರಕರ್ತರು ಮತ್ತು ಯುರೋಪ್ನ ಜನರನ್ನು ಅಪಹರಿಸಿ ಈ ಹಣವನ್ನು ಪಡೆಯಲಾಗಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.