ಸಿಂಧನೂರು: ಸಿಂಧನೂರಿನ ಖದರಿಯಾ ಕಾಲೊನಿಯಲ್ಲಿ ಒಂದೇ ಸೂರಿನಡಿಯಲ್ಲಿ 120ಜನರು ವಾಸಿಸುವ ಕೂಡು ಕುಟುಂಬವಿದೆ. ಹುಸೇನಬೀ ಅಲಿಸಾಬ ಕುಟುಂಬದ ಸದಸ್ಯರು ಎಲ್ಲರ ಕುಟುಂಬಕ್ಕೆ ಮಾದರಿ ಎನ್ನುವಂತೆ ಕಾಲೊನಿಯಲ್ಲಿ ವಾಸ ಮಾಡುತ್ತಾರೆ. ನಿಜಕ್ಕೂ ಜೇನುಗೂಡಿನಂತೆ ನೂರಾರು ಜನರು ಹಬ್ಬ ಹರಿದಿನಗಳಲ್ಲಿ ಸಂತೋಷವಾಗಿ ಆಚರಣೆ ಮಾಡುತ್ತಾರೆ.
ಮನೆಯಲ್ಲಿ ಯಾವುದೇ ಕಾರ್ಯಕ್ರಮಗಳು ಇದ್ದರೂ ಎಲ್ಲರೂ ಸಹಕಾರ, ಪ್ರೀತಿ, ಭಾವನಾತ್ಮಕ ಸಂಬಂಧಗಳ ಮೇಲೆ ಕೂಡಿಯೇ ಆಚರಿಸುತ್ತಾರೆ. ಇವರ ಎಲ್ಲರ ಕಾರ್ಯ ಚಟುವಟಿಕೆ ಆರಂಭವಾಗುವುದೇ ಸಹಕಾರದಿಂದ. ಹುಸೇನಬೀಗೆ ಬರೊಬ್ಬರಿ 110 ವರ್ಷ ವಯಸ್ಸಾಗಿದೆ. ಸ್ಪಷ್ಟವಾಗಿ ಕಿವಿ ಕೇಳುತ್ತವೆ. ಕಣ್ಣು ಕಾಣುತ್ತವೆ. ಮನೆ ಎಲ್ಲರ ಸದಸ್ಯರನ್ನು ಗುರುತು ಹಿಡಿದು ಕರೆಯುವ ಹುಸೇನಬಿ ಎಲ್ಲರ ಪ್ರೀತಿಗೆ ಪಾತ್ರವಾಗಿದ್ದಾರೆ. ಕಡಕ್ ರೊಟ್ಟಿ ತಿನ್ನುವಷ್ಟು ಹಲ್ಲು ಗಟ್ಟಿಯಾಗಿವೆ. ಸ್ವಾವಲಂಬಿಯಾಗಿ ಓಡಾಡುತ್ತಿದ್ದಾರೆ.
ಹಿತಮಿತವಾದ ಆಹಾರ ಇವರ ಆರೋಗ್ಯದ ಗುಟ್ಟು ಎನ್ನುತ್ತಾರೆ ಡಾ.ಅಲ್ಲಾ ಬಂದೇಸಾಬ್.
ಹುಸೇನಬೀ ಮತ್ತು ಅಲಿಸಾಬ್ ಅವರಿಗೆ 4 ಜನ ಮಕ್ಕಳಿದ್ದು ಅವರ ವಂಶಾವಳಿ ಬೆಳೆಯುತ್ತಾ ಹೋಗಿದ್ದು, ಸದ್ಯ ಮನೆಯಲ್ಲಿ 120 ಸದಸ್ಯರಾ ಗಿದ್ದಾರೆ. ಖದರಿಯಾ ಕಾಲೊನಿಯಲ್ಲಿ ಲಂಬಿ ಹುಸೇನಬಿ ಎಂದರೆ ಚಿಕ್ಕಮಗುವು ಅವರ ಮನೆಗೆ ಕರೆದುಕೊಂಡು ಹೋಗುವಷ್ಟರ ಮಟ್ಟಿಗೆ ಚಿರಪರಿ ಚಿತಾಗಿದ್ದಾರೆ.