ನವದೆಹಲಿ (ಪಿಟಿಐ): ಮುಕ್ತ ಅಂತರ್ಜಾಲದ ಬಗ್ಗೆ ದೇಶದಲ್ಲಿ ಚರ್ಚೆ ನಡೆಯುತ್ತಿರುವ ಸಂದರ್ಭದಲ್ಲೇ ಎಲ್ಲ ಬಗೆಯ ಆನ್‌ಲೈನ್‌ ಅಪ್ಲಿಕೇಷನ್‌ ಡೆವಲಪರ್‌ಗಳಿಗಾಗಿ ಫೇಸ್ಬುಕ್ ಹೊಸ ಆನ್‌ಲೈನ್‌ ವೇದಿಕೆಯನ್ನು ಪರಿಚಯಿಸಿದೆ.
Internet.org ಆನ್‌ಲೈನ್‌ ವೇದಿಕೆಯ ಸೇವೆಯನ್ನು ಫೇಸ್ಬುಕ್ ಭಾರತದಲ್ಲಿ ಸೋಮವಾರ ಮುಕ್ತಗೊಳಿಸಿದೆ. ಸದ್ಯ ಈ ವೇದಿಕೆಯಲ್ಲಿ ರಿಲಯನ್ಸ್‌ ಕಮ್ಯುನಿಕೇಷನ್ಸ್‌ ಮಾತ್ರ ಟೆಲಿಕಾಂ ಸಹಭಾಗಿತ್ವ ಹೊಂದಿರುವ ಭಾರತದ ಏಕೈಕ ಕಂಪೆನಿಯಾಗಿದೆ.
‘ಫೀಚರ್‌ ಫೋನ್‌ ಮತ್ತು ಸ್ಮಾರ್ಟ್‌ಫೋನ್‌ಗಳೆರಡರಲ್ಲೂ ಕಡಿಮೆ ಡೇಟಾ ಬಳಸಿ ಬ್ರೌಸ್‌ ಮಾಡುವಂಥ ಅಪ್ಲಿಕೇಷನ್‌ಗಳನ್ನು ಅಭಿವೃದ್ಧಿ ಪಡಿಸಲು ಮುಂದಾಗುವ ಅಪ್ಲಿಕೇಷನ್‌ ಡೆವಲಪರ್‌ಗಳಿಗಾಗಿ ಈ ವೇದಿಕೆ ತೆರೆಯಲಾಗಿದೆ’ ಎಂದು Internet.orgನ ಉಪಾಧ್ಯಕ್ಷ ಕ್ರಿಸ್‌ ಡೇನಿಯಲ್ಸ್‌ ತಿಳಿಸಿದ್ದಾರೆ.
‘ಎಲ್ಲರಿಗೂ ಮುಕ್ತ ಅಂತರ್ಜಾಲದ ಉಪಯೋಗ ಸಿಗಬೇಕೆಂಬುದು ಹೊಸ ಆನ್‌ಲೈನ್‌ ವೇದಿಕೆಯ ಆಶಯವಾಗಿದೆ. ಈ ನಿಟ್ಟಿನಲ್ಲಿ ಅಪ್ಲಿಕೇಷನ್‌ ಅಭಿವೃದ್ಧಿಪಡಿಸುವ ಡೆವಲಪರ್‌ಗಳಿಗೆ ಇದೊಂದು ಸೂಕ್ತ ವೇದಿಕೆಯಾಗಲಿದೆ’ ಎಂದು ಡೇನಿಯಲ್ಸ್‌ ಅಭಿಪ್ರಾಯಪಟ್ಟಿದ್ದಾರೆ.
