ಏಸುಸ್ ಝೆನ್‌ಫೋನ್ ಮ್ಯಾಕ್ಸ್ ಬ್ಯಾಟರಿ ಇದರ ಪ್ಲಸ್ ಪಾಯಿಂಟ್

ಏಸುಸ್ ಕಂಪೆನಿ ಅತಿ ಕಡಿಮೆ ಬೆಲೆಯಿಂದ ಹಿಡಿದು ಸ್ವಲ್ಪ ದುಬಾರಿ ಎನ್ನಬಹುದಾದ ಬೆಲೆಯ ತನಕ ಎಲ್ಲ ಮಾದರಿಯ ಸ್ಮಾರ್ಟ್‌ಫೋನ್‌ಗಳನ್ನು ತಯಾರಿಸುತ್ತಿದೆ. ಭಾರತದ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯ ಗಣನೀಯ ಭಾಗ ಅದರದ್ದಾಗಿದೆ. ಈ ಹಿಂದೆ ಇದೇ ಅಂಕಣದಲ್ಲಿ ಹಲವು ಮಾದರಿಯ ಏಸುಸ್ ಫೋನ್‌ಗಳ ವಿಮರ್ಶೆ ಪ್ರಕಟವಾಗಿತ್ತು. ಎಲ್ಲ ಸ್ಯಾಮ್‌ಸಂಗ್ ಸ್ಮಾರ್ಟ್‌ಫೋನ್‌ಗಳು ಗ್ಯಾಲಕ್ಸಿ ಎಂಬ ಹೆಸರಿನಿಂದ ಪ್ರಾರಂಭವಾಗುವ ಮಾದರಿಯಲ್ಲಿ ಏಸುಸ್‌ನವರ ಬಹುತೇಕ ಸ್ಮಾರ್ಟ್‌ಫೋನ್‌ಗಳು ಝೆನ್‌ಫೋನ್ ಹೆಸರಿನಲ್ಲಿ ಮಾರುಕಟ್ಟೆಯನ್ನು ಪ್ರವೇಶಿಸುತ್ತಿವೆ. ಈ ಸಲ ನಮ್ಮ ವಿಮರ್ಶಾನೋಟ ಏಸುಸ್ ಝೆನ್‌ಪೋನ್ ಮ್ಯಾಕ್ಸ್ (Asus Zenfone Max) ಕಡೆ.

ಗುಣವೈಶಿಷ್ಟ್ಯಗಳು : 1.2 ಗಿಗಾಹರ್ಟ್ಸ್ ವೇಗದ ನಾಲ್ಕು ಹೃದಯಗಳ ಪ್ರೊಸೆಸರ್ (Snapdragon 410), 2+16 ಗಿಗಾಬೈಟ್ ಮೆಮೊರಿ, ಅಧಿಕ ಮೆಮೊರಿಗೆ ಮೈಕ್ರೊಎಸ್‌ಡಿ ಸೌಲಭ್ಯ, 720x1080 ಪಿಕ್ಸೆಲ್ ರೆಸೊಲೂಶನ್‌ನ 5.5 ಇಂಚು ಗಾತ್ರದ ಐಪಿಎಸ್ ಸ್ಪರ್ಶಸಂವೇದಿ ಪರದೆ, ಗೊರಿಲ್ಲ-4 ಗಾಜು, 13 ಮೆಗಾಪಿಕ್ಸೆಲ್‌ನ ಪ್ರಾಥಮಿಕ ಮತ್ತು 5 ಮೆಗಾಪಿಕ್ಸೆಲ್‌ನ ಸ್ವಂತೀ ಕ್ಯಾಮೆರಾ, ಪ್ರಾಥಮಿಕ ಕ್ಯಾಮೆರಾಕ್ಕೆ ಎಲ್‌ಇಡಿ ಫ್ಲಾಶ್‌, 3ಜಿ ಮತ್ತು 2ಜಿ/3ಜಿ/4ಜಿ ಎರಡು ಮೈಕ್ರೋಸಿಮ್, ಯುಎಸ್‌ಬಿ ಓಟಿಜಿ, 77.5 x 156 x 10.55 ಮಿ.ಮೀ. ಗಾತ್ರ, 202 ಗ್ರಾಂ ತೂಕ, ವೈಫೈ, ಬ್ಲೂಟೂತ್, ಜಿಪಿಎಸ್, ಎಫ್‌ಎಂ ರೇಡಿಯೊ, ಎನ್‌ಎಫ್‌ಸಿ, 5000 mAh ಶಕ್ತಿಯ ತೆಗೆಯಲಸಾಧ್ಯವಾದ ಬ್ಯಾಟರಿ, ಆಂಡ್ರಾಯ್ಡ್‌ 5.0.2, ಝೆನ್‌ಯುಐ, ಇತ್ಯಾದಿ. ನಿಗದಿತ ಬೆಲೆ ₹10 ಸಾವಿರ.

ಇದರ ರಚನೆ ಮತ್ತು ವಿನ್ಯಾಸ ಬಹುಮಟ್ಟಿಗೆ ಇತರೆ ಝೆನ್‌ಫೋನ್-2 ಫೋನ್‌ಗಳಂತೆಯೇ ಇದೆ. ಹಿಂಭಾಗ ಬದಿಗಳಲ್ಲಿ ತೆಳ್ಳಗಿದ್ದು ಮಧ್ಯದಲ್ಲಿ ದಪ್ಪಗಿದೆ. ಅಂದರೆ ಬಹುಮಟ್ಟಿಗೆ ತಲೆದಿಂಬಿನಂತೆ ಎನ್ನಬಹುದು. ಹಿಂಭಾಗದ ಪ್ಲಾಸ್ಟಿಕ್ ಕವಚ ತೆಗೆಯಬಹುದು. ಆಗ ಮೈಕ್ರೊಸಿಮ್ ಮತ್ತು ಮೈಕ್ರೊಎಸ್‌ಡಿ ಕಾರ್ಡ್‌ಗಳನ್ನು ಹಾಕುವ ಜಾಗ ಕಂಡುಬರುತ್ತದೆ. ಆದರೂ ಬ್ಯಾಟರಿ ಮಾತ್ರ ತೆಗೆಯಲು ಸಾಧ್ಯವಿಲ್ಲ. ಹಿಂದಿನ ಕವಚ ಸ್ವಲ್ಪ ಚರ್ಮದ ಮಾದರಿಯಲ್ಲಿದೆ. ಅಂದರೆ ದೊರಗಾಗಿದೆ. ಇದರಿಂದಾಗಿ ಇದರ ಗಾತ್ರ ದೊಡ್ಡದಿದ್ದರೂ ಕೈಯಿಂದ ಜಾರಿ ಬೀಳುವ ಭಯವಿಲ್ಲ.

ಬಲಭಾಗದಲ್ಲಿ ವಾಲ್ಯೂಮ್ ಮತ್ತು ಆನ್/ಆಫ್ ಬಟನ್‌ಗಳಿವೆ. ಮೇಲುಗಡೆ 3.5 ಮಿ.ಮೀ ಇಯರ್‌ಫೋನ್ ಕಿಂಡಿ ಇದೆ. ಕೆಳಭಾಗದಲ್ಲಿ ಮೈಕ್ರೊಯುಎಸ್‌ಬಿ ಕಿಂಡಿಯಿದೆ. ಫೋನನ್ನು ನಿದ್ದೆಯಿಂದ ಎಬ್ಬಿಸಲು ಪರದೆಯ ಮೇಲೆ ಎರಡು ಸಲ ಕುಟ್ಟಿದರೆ ಸಾಕು. ಅಂದರೆ ಇದರ ಆನ್/ಆಫ್ ಬಟನ್‌ನ ಬಳಕೆ ಕಡಿಮೆ ಎಂದು ಹೇಳಬಹುದು. ಈ ಎಲ್ಲ ಝೆನ್‌ಫೋನ್‌ಗಳ ಒಂದು ಪ್ರಮುಖ ದೋಷವೆಂದರೆ ದೇಹದ ಗಾತ್ರಕ್ಕೂ ಪರದೆಯ ಗಾತ್ರಕ್ಕೂ ಇರುವ ಅನುಪಾತ.

ಫೋನಿನ ಮುಂಭಾಗದಲ್ಲಿ ಮೇಲೆ ಮತ್ತು ಕೆಳಗೆ ಒಟ್ಟು ಸೇರಿ ಸುಮಾರು 35 ಮಿ.ಮೀ.ಯಷ್ಟು ಜಾಗ ಪರದೆಗಿಂತ ಹೆಚ್ಚಿಗೆ ಇದೆ. ಇದನ್ನು ಸುಮಾರು 20 ಮಿ.ಮೀ.ಗೆ ಇಳಿಸಬಹುದು ಎಂಬುದು ನನ್ನ ಅಭಿಪ್ರಾಯ. ಹಾಗೆ ಮಾಡಿದರೆ ಫೋನಿನ ಗಾತ್ರ ಗಣನೀಯವಾಗಿ ಕಡಿಮೆಯಾಗುತ್ತದೆ. ಇದು ಮಧ್ಯಮ ಕಡಿಮೆ ಬೆಲೆಯ ಫೋನ್. ಅಂತಹ ಅದ್ಭುತ ಫೋನು ಅಲ್ಲ. ನಾವು ನೀಡುವ 10 ಸಾವಿರ ರೂಪಾಯಿಗೆ ಇದು ತಕ್ಕುದಾಗಿದೆಯೇ ಎಂಬುದನ್ನಷ್ಟೇ ನಾವು ಪರಿಶೀಲಿಸಬೇಕು.

ಕೆಲಸದ ವೇಗ ಮತ್ತು ಗುಣಮಟ್ಟ ಅಷ್ಟಕ್ಕಷ್ಟೇ. ಅತಿ ವೇಗದ ಆಟ, ಮೂರು ಆಯಾಮಗಳ ಆಟ ಮತ್ತು ಕಿರುತಂತ್ರಾಂಶಗಳ ಬಳಕೆಯ ಅನುಭವ ಪರವಾಗಿಲ್ಲ. ಅದ್ಭುತ ಎನ್ನುವಂತಿಲ್ಲ. ಸಾಮಾನ್ಯ ಮತ್ತು ಹೈಡೆಫಿನಿಶನ್ ವಿಡಿಯೊಗಳು ಸರಿಯಾಗಿ ಪ್ಲೇ ಆಗುತ್ತವೆ. 4k ವಿಡಿಯೊ ಪ್ಲೇ ಆಗುವುದಿಲ್ಲ. ಹಲವು ಕಿರುತಂತ್ರಾಂಶಗಳನ್ನು ಏಕಕಾಲಕ್ಕೆ ತೆರೆದರೆ ಇದು ಕೆಲವೊಮ್ಮ ಸರಿಯಾಗಿ ಕೆಲಸ ಮಾಡಲು ಕಷ್ಟಪಡುತ್ತದೆ.

ಕ್ಯಾಮೆರಾ ಪರವಾಗಿಲ್ಲ. ಇತರೆ ಕೆಲವು ಏಸುಸ್ ಝೆನ್‌ಫೋನ್‌ಗಳಲ್ಲಿ ಇದೇ ಕ್ಯಾಮೆರಾ ಇದೆ. ಕ್ಯಾಮೆರಾದ ಕಿರುತಂತ್ರಾಂಶದಲ್ಲಿ ಹಲವು ನಮೂನೆಯ ಆಯ್ಕೆಗಳಿವೆ. ಮ್ಯಾನ್ಯುವಲ್ ವಿಧಾನ ಕೂಡ ಇದೆ.   ಅವುಗಳ ಬಗ್ಗೆ ಇದೇ ಅಂಕಣದಲ್ಲಿ ಬರೆಯಲಾಗಿದೆ. ಸ್ಥಿರ ಚಿತ್ರ, ವಿಡಿಯೊ ಚಿತ್ರೀಕರಣ, ಹಲವು ನಮೂನೆಯಲ್ಲಿ ಫೋಟೊಗ್ರಫಿ ಎಲ್ಲ ನೀಡುವ ಹಣಕ್ಕೆ ತೃಪ್ತಿದಾಯಕವಾಗಿವೆ. ಹಲವು ಫೋಟೊಗಳನ್ನು ಒಂದರ ನಂತರ ಒಂದರಂತೆ ಅತಿ ವೇಗವಾಗಿ ಫೋಟೊ ತೆಗೆಯಬೇಕಿದ್ದರೆ ಈ ಫೋನ್ ನಿಮಗಲ್ಲ. ಅಷ್ಟು ವೇಗವಾಗಿ ಕೆಲಸ ಮಾಡಲು ಇದರಿಂದ ಸಾಧ್ಯವಾಗುವುದಿಲ್ಲ.

ಇದರ ಆಡಿಯೊ ಇಂಜಿನ್ ಪರವಾಗಿಲ್ಲ. ತುಂಬ ಮೇಲ್ಮಟ್ಟದ್ದು ಎಂದು ಹೇಳುವಂತಿಲ್ಲದಿದ್ದರೂ ಒಂದು ಮಟ್ಟಿಗೆ ಚೆನ್ನಾಗಿದ್ದು, ತೃಪ್ತಿದಾಯಕವಾಗಿದೆ ಎನ್ನಬಹುದು. ಎಫ್‌ಎಂ ರೇಡಿಯೊ ಇದೆ. ಫೋನಿನ ಜೊತೆ ಇಯರ್‌ಫೋನ್ ನೀಡಿಲ್ಲ. ನಿಮ್ಮಲ್ಲಿರುವ ಯಾವುದಾದರೂ ಉತ್ತಮ ಇಯರ್‌ಫೋನ್ ಜೋಡಿಸಿದರೆ ತೃಪ್ತಿದಾಯಕ ಸಂಗೀತ ಆಲಿಸುವ ಅನುಭವ ನಿಮ್ಮದಾಗುವುದು.

ಈ ಫೋನಿನ ನಿಜವಾದ ಹೆಚ್ಚುಗಾರಿಕೆ ಇರುವುದು ಇದರ ಶಕ್ತಿಶಾಲಿಯಾದ ಬ್ಯಾಟರಿಯಲ್ಲಿ. ಅದು 5000 mAh ಶಕ್ತಿಯದು. ಆದರೆ ಬೇಸರದ ಸಂಗತಿಯೆಂದರೆ ಈ ಫೋನಿನ ಜೋತೆ ನೀಡಿರುವ ಚಾರ್ಜರ್ ಕೇವಲ 1A ಕರೆಂಟ್ ಮಾತ್ರ ನೀಡಬಲ್ಲುದು. ಅಂದರೆ ಚಾರ್ಜ್ ಮಾಡಲು ತುಂಬ ಸಮಯ ತೆಗೆದುಕೊಳ್ಳುತ್ತದೆ. ನಿಮ್ಮಲ್ಲಿ ಅಧಿಕ ಶಕ್ತಿಯ ಚಾರ್ಜರ್ ಇದ್ದರೆ ಅದನ್ನು ಬಳಸುವುದು ಸೂಕ್ತ.

ಆಂಡ್ರಾಯ್ಡ್‌ 5.0 ಆಧಾರಿತ ಫೋನ್ ಆಗಿರುವುದರಿಂದ ಕನ್ನಡದ ತೋರುವಿಕೆ (ರೆಂಡರಿಂಗ್) ಸರಿಯಾಗಿದೆ. ಅಷ್ಟು ಮಾತ್ರವಲ್ಲ. ಈ ಫೋನಿನಲ್ಲಿ ಕನ್ನಡದ ಸಂಪೂರ್ಣ ಯೂಸರ್ ಇಂಟರ್‌ಫೇಸ್ ಕೂಡ ಇದೆ. ಜೊತೆಗೆ ಅವರದೇ ಕೀಲಿಮಣೆಯೂ ಇದೆ.  

ವಾರದ ಆ್ಯಪ್
ಪಾಸ್‌ಪೋರ್ಟ್‌ ಸೇವೆ : ಇತ್ತೀಚೆಗೆ ಪಾಸ್‌ಪೋರ್ಟ್ ಪಡೆಯುವುದನ್ನು ತುಂಬ ಕ್ರಮಬದ್ಧವಾಗಿಸಿದ್ದು ಯಾವುದೇ ಮಧ್ಯವರ್ತಿಯ ಅಗತ್ಯವಿಲ್ಲದೆ ಬೇಗನೆ ಪಡೆಯಬಹುದಾಗಿದೆ. ಪಾಸ್‌ಪೋರ್ಟ್ ಪಡೆಯುವ ಬಗ್ಗೆ ಎಲ್ಲ ವಿವರಗಳು, ಅರ್ಜಿಗಳು, ಆನ್‌ಲೈನ್‌ನಲ್ಲೇ ಅರ್ಜಿ ಹಾಕುವುದು, ನಿಮ್ಮ ಅರ್ಜಿಯ ಈಗಿನ ಸ್ಥಿತಿ, ಎಲ್ಲವನ್ನು ಅವರ ಜಾಲತಾಣದ (passportindia.gov.in) ಮೂಲಕ ಮಾಡಬಹುದು. ಈ ಜಾಲತಾಣಕ್ಕೆ ಒಂದು ಕಿರುತಂತ್ರಾಂಶವೂ ಇದೆ. ಅದು ಬೇಕಿದ್ದರೆ ನೀವು ಗೂಗಲ್‌ ಪ್ಲೇ ಸ್ಟೋರಿನಲ್ಲಿ mPassport Seva ಎಂದು ಹುಡುಕಬೇಕು.