‘ವ್ಯಾಪಂ’ ಕುರಿತು ಸಿಬಿಐ ತನಿಖೆ ಏಕಿಲ್ಲ?

ಇನ್ನೊಂದು ವರ್ಷ ಕಾಯುವುದೆಂದರೆ ತನಿಖೆ ಎಷ್ಟೊಂದು ವಿಳಂಬವಾಗಬಹುದು? ರಾಂನರೇಶ್‌ ‌ ತಮ್ಮ ಮೇಲೆ ಆರೋಪ ಬಂದ ತಕ್ಷಣ ರಾಜ್ಯಪಾಲರ ಹುದ್ದೆ ತ್ಯಜಿಸಬೇಕಿತ್ತು. ಹಾಗೆ ಮಾಡಿದ್ದರೆ ಸತ್ಸಂಪ್ರದಾಯ ಪಾಲನೆ ಮಾಡಿದಂತೆ ಆಗುತ್ತಿತ್ತು. ಸದ್ಯದ ಪರಿಸ್ಥಿತಿ ನೋಡಿದರೆ ಅವರು ರಾಜಭವನ ತ್ಯಜಿಸುವ ಲಕ್ಷಣವಿಲ್ಲ. ಹಿಂದೆ ‘ಕಾಮನ್ವೆಲ್ತ್ ಕ್ರೀಡಾ ಕೂಟ’ದ ಹಗರಣದಲ್ಲಿ ಮಾಜಿ ಮುಖ್ಯಮಂತ್ರಿ ಶೀಲಾ ದೀಕ್ಷಿತ್‌ ಅವರನ್ನು ವಿಚಾರಣೆಗೆ ಒಳಪಡಿಸಲಾಗುತ್ತದೆ ಎಂಬ ಸುಳಿವು ಸಿಕ್ಕ ಬಳಿಕ ಯುಪಿಎ ಅವರನ್ನು ರಾಜ್ಯಪಾಲರಾಗಿ ನೇಮಕ ಮಾಡಿತು ಎನ್ನುವ ಟೀಕೆಗಳೂ ಇವೆ. ರಾಜಭವನ ಹೇಗೆ ಬಳಕೆಯಾಗುತ್ತದೆ ಎನ್ನುವುದಕ್ಕೆ ಈ ನಿದರ್ಶನಗಳು ಸಾಕು.  ವ್ಯಾಪಂ ಹಗರಣ ಮುಖ್ಯಮಂತ್ರಿ ಶಿವರಾಜ್‌ ಸಿಂಗ್‌ ಚೌಹಾಣ್‌ ಅವರ ಕೊರಳಿಗೂ ಸುತ್ತಿಕೊಳ್ಳುವ ಸಾಧ್ಯತೆ ಇದೆ. ಮಾಜಿ ಮುಖ್ಯಮಂತ್ರಿ, ಹಿರಿಯ ಕಾಂಗ್ರೆಸ್‌ ನಾಯಕ ದಿಗ್ವಿಜಯ್‌ ಸಿಂಗ್‌, ‘ಹಗರಣದಲ್ಲಿ ಚೌಹಾಣ್‌ ಕುಟುಂಬ ಸದಸ್ಯರ ಪಾತ್ರವಿದೆ’ ಎಂದು ಆರೋಪಿಸಿದ್ದಾರೆ. ಮುಖ್ಯಮಂತ್ರಿ ಅವರ ಪತ್ನಿ ಸಾಧನಾ ಸಿಂಗ್‌ ಅವರ ಮೊಬೈಲ್‌ನಿಂದ ಹೋಗಿರುವ ಎಸ್‌ಎಂಎಸ್‌ ಸಂದೇಶವನ್ನು ಮಾಧ್ಯಮಗಳಿಗೆ ಬಿಡುಗಡೆ ಮಾಡಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಅವರನ್ನು ದಿಗ್ವಿಜಯ್‌ ನಿಯೋಗದಲ್ಲಿ ಕಂಡು, ಮುಖ್ಯಮಂತ್ರಿ ವಿರುದ್ಧದ ದಾಖಲೆಗಳನ್ನು ನೀಡಿದ್ದಾರೆ.

ಇದು ದೇಶದ ಅತ್ಯಂತ ಗಂಭೀರವಾದ ಹಗರಣ. ಇದರಲ್ಲಿ ಬರೀ ಹಣದ ಪಾತ್ರವಿಲ್ಲ. ಅನೇಕರ ಜೀವಗಳೂ ಹೋಗಿವೆ. ಹಗರಣದಲ್ಲಿ ಭಾಗಿಯಾದ ಆರೋಪ ಹೊತ್ತವರು ಜೈಲಿನೊಳಗೆ ಹಾಗೂ ಹೊರಗೆ ನಿಗೂಢವಾಗಿ ಸಾಯುತ್ತಿರುವುದು ನಿಜಕ್ಕೂ ಆತಂಕಕಾರಿ ಬೆಳವಣಿಗೆ. ಇದನ್ನು ಗಂಭೀರವಾಗಿ ಪರಿಗಣಿಸದಿದ್ದರೆ ಸಾವಿನ ಸರಣಿ ಮುಂದುವರಿಯುವ ಅಪಾಯವಿದೆ. ವ್ಯಾಪಂ ತನಿಖೆ ನಡೆಸುತ್ತಿರುವ ತನಿಖಾ ತಂಡ ನೇರವಾಗಿ ಮುಖ್ಯಮಂತ್ರಿ ಅಧೀನಕ್ಕೊಳಪಡುವುದರಿಂದ ನಿಷ್ಪಕ್ಷಪಾತ ತನಿಖೆ ಕುರಿತು ಶಂಕೆ ವ್ಯಕ್ತವಾಗಿದೆ. ರಾಜಭವನ, ಹಿರಿಯ ಅಧಿಕಾರಿಗಳು, ಮಾಜಿ ಮಂತ್ರಿಗಳು ಹಗರಣದಲ್ಲಿ ಭಾಗಿಯಾಗಿರುವುದರಿಂದ ನಿಷ್ಪಕ್ಷಪಾತ ತನಿಖೆ ನಡೆಯುವ ಕುರಿತು ಸಂಶಯ ತಲೆದೋರಿದೆ. ಈ ಹಗರಣ ಮಧ್ಯಪ್ರದೇಶದಲ್ಲಿ ಅಷ್ಟೇ ಅಲ್ಲ, ನೆರೆಹೊರೆಯ ರಾಜ್ಯಗಳಿಗೂ ಹರಡಿಕೊಂಡಿದೆ. ಕೆಲ ವಿದ್ಯಾರ್ಥಿಗಳ ಬದಲಿಗೆ ಪರೀಕ್ಷೆ ಬರೆಯಲು ಬಂದವರು ನೆರೆಹೊರೆಯ ರಾಜ್ಯಗಳವರು. ಇದರಿಂದಾಗಿ ಕೇಂದ್ರ ತನಿಖಾ ದಳ ಅಥವಾ ಸ್ವತಂತ್ರ ತನಿಖಾ ತಂಡದಿಂದ ತನಿಖೆ ನಡೆಯುವ ಅಗತ್ಯವಿದೆ.

ಸಿಬಿಐ, ಎರಡನೇ ತಲೆಮಾರಿನ ತರಂಗಾಂತರ, ಕಲ್ಲಿದ್ದಲು ಹಾಗೂ ಕಾಮನ್ವೆಲ್ತ್ ಕ್ರೀಡಾಕೂಟ ಒಳಗೊಂಡಂತೆ ಪ್ರಮುಖ ಹಗರಣಗಳ ತನಿಖೆ ನಡೆಸುತ್ತಿದೆ. ಬೇರೆ ಬೇರೆ ರಾಜ್ಯಗಳಿಂದ ಹಸ್ತಾಂತರ ಆಗಿರುವ  ಪ್ರಕರಣಗಳ ಹೊರೆ ಬಿದ್ದಿರುವುದರಿಂದ ಅದರ ಮೇಲಿನ ಒತ್ತಡ ಹೆಚ್ಚಿದೆ. ಅಲ್ಲದೆ, ಬಹುತೇಕರಿಗೆ ಸಿಬಿಐ ವಿಶ್ವಾಸಾರ್ಹತೆ ಬಗ್ಗೆ ಅಪನಂಬಿಕೆ. ಅಕಸ್ಮಾತ್‌ ಈ ಹಗರಣವನ್ನು ಸಿಬಿಐಗೆ ಕೊಟ್ಟರೂ, ಸುಪ್ರೀಂ ಕೋರ್ಟ್‌ ಸಮಕ್ಷಮದಲ್ಲಿ ತನಿಖೆ ನಡೆಯಬೇಕೆಂದು ಒತ್ತಾಯ ಮಾಡುತ್ತಿರುವುದು ಅದೇ ಕಾರಣಕ್ಕೆ. ಸುಪ್ರೀಂ ಕೋರ್ಟ್‌ ಮೇಲುಸ್ತುವಾರಿಯಲ್ಲಿ ತನಿಖೆ ನಡೆಯದಿದ್ದರೆ, ಸರ್ಕಾರ ತನಿಖಾ ದಳದ ಮೇಲೆ ಪ್ರಭಾವ ಬೀರಬಹುದು ಎಂಬ ಕಳವಳ ಕಾಂಗ್ರೆಸ್‌ ಪಕ್ಷಕ್ಕಿದೆ. ಆ ಪಕ್ಷ ಅಧಿಕಾರದಲ್ಲಿದ್ದಾಗಲೂ ಮಾಡಿದ್ದು ಅದನ್ನೇ.  ಸಿಬಿಐ ಅನ್ನು ತನಗೆ ಬೇಕಾದಂತೆ ಬಳಸಿಕೊಂಡಿದ್ದು ಸುಳ್ಳೇನಲ್ಲ. ಈ  ಪ್ರಕರಣವನ್ನು ಸಿಬಿಐಗಾದರೂ ಕೊಡಲಿ ಅಥವಾ ಸ್ವತಂತ್ರವಾದ ತನಿಖೆಯಾದರೂ ನಡೆಸಲಿ, ಮೊದಲು ಅದನ್ನು ರಾಜ್ಯದಿಂದ ವಾಪಸ್‌ ಪಡೆಯಬೇಕು. ಹೊರಗಿನ ತನಿಖೆ ನಡೆಯಬೇಕು ಎನ್ನುವುದು ನ್ಯಾಯಸಮ್ಮತ ಬೇಡಿಕೆ.

ಬಿಹಾರದ ಮಾಜಿ ಮುಖ್ಯಮಂತ್ರಿ ಲಾಲುಪ್ರಸಾದ್‌ ಅವರ ರಾಜಕೀಯ ಅಜ್ಞಾತವಾಸಕ್ಕೆ ಕಾರಣವಾದ ಮೇವು ಹಗರಣ ಮತ್ತು ಹರಿಯಾಣ ಮಾಜಿ ಮುಖ್ಯಮಂತ್ರಿ ಓಂಪ್ರಕಾಶ್‌ ಚೌತಾಲಾ, ಅವರ ಪುತ್ರ ಅಜಯ್‌ ಚೌತಾಲ ಅವರ ಶಿಕ್ಷಕರ ನೇಮಕಾತಿ ಹಗರಣ ವ್ಯಾಪಂಗೆ ಹೋಲಿಸಿದರೆ  ದೊಡ್ಡದೇನೂ ಅಲ್ಲ. ಮೇವು ಹಗರಣ 950 ಕೋಟಿ ರೂಪಾಯಿ ವ್ಯವಹಾರ. ಈ ವ್ಯವಹಾರದಲ್ಲೂ ಸರ್ಕಾರದ ಹಿರಿಯ ಅಧಿಕಾರಿಗಳು, ಪಶು ಸಂಗೋಪನಾ ಇಲಾಖೆಗೆ ಮೇವು, ಔಷಧ ಪೂರೈಸಿರುವ ಗುತ್ತಿಗೆದಾರರು ಭಾಗಿಯಾಗಿದ್ದಾರೆ. ಆರೋಪಿಗಳನ್ನು ರಕ್ಷಣೆ ಮಾಡಿದ ಆರೋಪ ಲಾಲುಪ್ರಸಾದ್‌ ಅವರ ಮೇಲಿದೆ. ಮೇವು ಹಗರಣದ ತನಿಖೆ ನಡೆಸಿದ್ದು ಕೇಂದ್ರ ತನಿಖಾ ದಳ. ಸುಪ್ರೀಂ ಕೋರ್ಟ್‌ ಮೇಲುಸ್ತುವಾರಿಯಲ್ಲಿ ತನಿಖೆ ನಡೆಯಿತು. ಸಿಎಜಿ ವರದಿಯಿಂದ ಹಗರಣ ಬಯಲಿಗೆ ಬಂದಿತ್ತು. ಬಿಹಾರದ ಮಾಜಿ ಮುಖ್ಯಮಂತ್ರಿ ಅದರಿಂದ ಹೊರಬರಲು ಇನ್ನೂ ಒದ್ದಾಡುತ್ತಿದ್ದಾರೆ.

ಹರಿಯಾಣ ಶಿಕ್ಷಕರ ನೇಮಕಾತಿ ಹಗರಣದಲ್ಲಿ ಚೌತಾಲಾ, ಅವರ ಪುತ್ರ ಅಜಯ್‌ ಚೌತಾಲಾ ಜೈಲು ಸೇರಿದ್ದಾರೆ. ನಕಲಿ  ದಾಖಲೆಗಳನ್ನು ಬಳಸಿಕೊಂಡು 3200ಕ್ಕೂ ಹೆಚ್ಚು ಶಿಕ್ಷಕರನ್ನು 1999 –2000ನೇ ಸಾಲಿನಲ್ಲಿ ನೇಮಿಸಿದ ಪ್ರಕರಣ ಇದು. ಅರ್ಹ ಶಿಕ್ಷಕರನ್ನು ಮೊದಲಿಗೆ ಆಯ್ಕೆ ಮಾಡಲಾಗಿತ್ತು. ಶಿಕ್ಷಣ ಸಚಿವರೂ ಆಗಿದ್ದ ಚೌತಾಲಾ, ಮತ್ತೊಂದು ಪಟ್ಟಿ ಕೊಟ್ಟು ಮೊದಲ ಪಟ್ಟಿ ಬದಲಾವಣೆ ಮಾಡಲು ಹಿರಿಯ ಅಧಿಕಾರಿಗಳಿಗೆ ಸೂಚಿಸಿದ್ದರು. ಪ್ರಕರಣದ ತನಿಖೆ ಕೈಗೆತ್ತಿಕೊಂಡಿದ್ದ ಸಿ.ಬಿ.ಐ. ಆರೋಪ ಪಟ್ಟಿ ಸಲ್ಲಿಸಿತ್ತು. ಚೌತಾಲಾ ಪ್ರತಿಯೊಬ್ಬರಿಂದ ಮೂರರಿಂದ ನಾಲ್ಕು ಲಕ್ಷ ರೂಪಾಯಿ ಲಂಚ ಪಡೆದಿದ್ದಾರೆ ಎಂದು ಆರೋಪಿಸಲಾಗಿತ್ತು. ಶಿಕ್ಷಕ ನೇಮಕಾತಿ ಹಗರಣದಲ್ಲಿ  52 ಮಂದಿ ಜೈಲು ಶಿಕ್ಷೆಗೊಳಗಾಗಿದ್ದಾರೆ. ಮಧ್ಯಪ್ರದೇಶ ಹಗರಣದಲ್ಲಿ ಕಾಂಗ್ರೆಸ್‌ ಪಕ್ಷದ ಅನೇಕ ನಾಯಕರೂ ಪಾಲು ಪಡೆದಿದ್ದಾರೆ ಎಂಬ ದೂರುಗಳಿವೆ. ಅವರೂ ಕೆಲವರು ಬಂಧನದಲ್ಲಿದ್ದಾರೆ.  ಈ ಸಂಗತಿಯನ್ನು ಪ್ರಸ್ತಾಪಿಸದಿದ್ದರೆ ಅಪಚಾರ ಆಗಬಹುದು. ಹಗರಣ ಕುರಿತು ದಿಗ್ವಿಜಯ್‌ ಸಿಂಗ್‌ ಮಾತ್ರ ದನಿ ಎತ್ತಿದ್ದಾರೆ. ಉಳಿದ ಬಹುತೇಕರು ಮೌನ ವಹಿಸಿದ್ದಾರೆ.

ಮೇವು ಹಗರಣ, ಹರಿಯಾಣ ಶಿಕ್ಷಕರ ನೇಮಕ ಸದ್ದು ಮಾಡಿದಷ್ಟು, ದೊಡ್ಡ ದೊಡ್ಡ ಕುಳಗಳು ಭಾಗಿಯಾಗಿರುವ ವ್ಯಾಪಂ ಹಗರಣ ಯಾಕೆ ಮಾಡಲಿಲ್ಲ  ಎಂಬ ಸಂಗತಿ ಅಚ್ಚರಿಹುಟ್ಟಿಸಿದೆ. ಲಾಲು, ಚೌತಾಲಾ ಅವರ ಹಗರಣಗಳನ್ನು ಸಿಬಿಐ ತನಿಖೆ ನಡೆಸಿದ ಬಳಿಕ, ಅತ್ಯಂತ ಗಂಭೀರವಾದ ವ್ಯಾಪಂ ಹಗರಣ ಕುರಿತು ಸಿಬಿಐ ಅಥವಾ ಸ್ವತಂತ್ರ  ತನಿಖೆ ಏಕಿಲ್ಲ. ಈ ಬಗ್ಗೆ ಮಧ್ಯಪ್ರದೇಶ ಮತ್ತು ನರೇಂದ್ರ ಮೋದಿ ಸರ್ಕಾರ ಚಿಂತನೆ ನಡೆಸಬೇಕು. ದೊಡ್ಡ ಮಟ್ಟದ ತನಿಖೆ ನಡೆಯದಿದ್ದರೆ ಹಗರಣ ಮುಚ್ಚಿ ಹೋಗಬಹುದು.
editpagefeedback@prajavani.co.in