ಸಾಮಾಜಿಕ ಸಮಸ್ಯೆ; ಸುಸ್ಥಿರ ಪರಿಹಾರ ಒದಗಿಸಿ: ಹರೀಶ ಹಂದೆ

ಬೆಳಗಾವಿ: ‘ಸಾಮಾಜಿಕ ಸಮಸ್ಯೆಗಳಿಗೆ ಸುಸ್ಥಿರ ಪರಿಹಾರ ಒದಗಿಸುವ ದೃಷ್ಟಿಯಿಂದ ಎಂಜಿನಿಯರಿಂಗ್ ಸ್ನಾತಕೋತ್ತರ ಪದವೀಧರರು ಮತ್ತು ಸಂಶೋಧಕರು ಕ್ರಿಯಾಶೀಲವಾಗಿ ಕಾರ್ಯನಿರ್ವಹಿಸಬೇಕು’ ಎಂದು ಸೆಲ್ಕೋ ಫೌಂಡೇಷನ್‌ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಹರೀಶ ಹಂದೆ ಕರೆ ನೀಡಿದರು.

ಇಲ್ಲಿನ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯದಲ್ಲಿ ಗುರುವಾರ ನಡೆದ 23ನೇ ವಾರ್ಷಿಕ ಘಟಿಕೋತ್ಸವ–2ರಲ್ಲಿ ಅವರು ಘಟಿಕೋತ್ಸವ ಭಾಷಣ ಮಾಡಿದರು.

‘ಸಮಾಜ ಎದುರಿಸುತ್ತಿರುವ ಸಮಸ್ಯೆಗಳಿಗೆ ಸುಸ್ಥಿರ ಪರಿಹಾರ ಒದಗಿಸುವಲ್ಲಿ ಮತ್ತು ಹೊಸ ಆವಿಷ್ಕಾರಗಳನ್ನು ಮಾಡುವಲ್ಲಿ ಭಾರತ ವಿಶ್ವದಲ್ಲೇ ಅಗ್ರಸ್ಥಾನಕ್ಕೆ ಏರಬೇಕು. ತನ್ನ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಲು ಇಡೀ ವಿಶ್ವವೇ ಭಾರತದತ್ತ ನೋಡುವಂತಾಗಬೇಕು. ಸಂಶೋಧಕರು ಈ ನಿಟ್ಟಿನಲ್ಲಿ ಪ್ರಯತ್ನ ಮುಂದುವರಿಸಬೇಕು. ಸಂಶೋಧನೆಗಳು ಬಡವರು ಮತ್ತು ಮಧ್ಯಮ ವರ್ಗದವರ ಅಭಿವೃದ್ಧಿಗೆ ಪೂರಕವಾಗಿರಬೇಕು’ ಎಂದರು.

‘ನೀವು ದೊಡ್ಡ ಕಂಪನಿಗಳ ವ್ಯವಹಾರ ಮಾದರಿಗಳನ್ನು ಅಧ್ಯಯನ ಮಾಡಬೇಡಿ. ಬದಲಿಗೆ, ಭಾರತದಲ್ಲಿ ರೈತರಿಂದ ತರಕಾರಿ ಮಾರುವವರ ಹಂತದವರೆಗಿನ ವ್ಯವಹಾರ ಮಾದರಿ ಅಭ್ಯಸಿಸಿ. ಮುಂದಿನ ಹತ್ತು ವರ್ಷ ಗಮನದಲ್ಲಿ ಇಟ್ಟುಕೊಂಡು ಯೋಜನೆ ಸಿದ್ಧಪಡಿಸಿ’ ಎಂದರು.

‘ವಿವಿಧ ಕಂಪನಿಗಳ ಆಡಳಿತ ಮಂಡಳಿಗಳಲ್ಲಿ ಹೆಚ್ಚಿನ ಮಹಿಳೆಯರು ಸದಸ್ಯೆಯರು, ನವೋದ್ಯಮಿಗಳು ಮತ್ತು ಸಾಮಾಜಿಕ ಅಗತ್ಯಗಳಿಗೆ ಪರಿಹಾರ ಕಂಡುಕೊಳ್ಳಲು ನೀತಿ–ನಿರೂಪಕರಾಗಬೇಕಾದ ಅಗತ್ಯವಿದೆ. ಇಂದು ಮಹಿಳೆಯರಿಗೆ ಕೋಟಾ ವ್ಯವಸ್ಥೆ ಅಗತ್ಯವಿಲ್ಲ. ಬದಲಿಗೆ, ಸಮಾಜಕ್ಕೆ ತಮ್ಮದೇಯಾದ ಕೊಡುಗೆ ನೀಡಲು ಪಾಲಕರು ಅವರಿಗೆ ಮುಕ್ತವಾಗಿ ಅವಕಾಶ ನೀಡಬೇಕಿದೆ’ ಎಂದರು.

ಕುಲಪತಿ ಎಸ್‌.ವಿದ್ಯಾಶಂಕರ, ‘ಚಿಕ್ಕಬಳ್ಳಾಪುರ ಜಿಲ್ಲೆಯ ಚಿಂತಾಮಣಿಯಲ್ಲಿ 2024–25ನೇ ಸಾಲಿನಿಂದ ಹೊಸ ಸರ್ಕಾರಿ ಎಂಜಿನಿಯರಿಂಗ್‌ ಕಾಲೇಜು ಕಾರ್ಯಾರಂಭ ಮಾಡಲಿದೆ. ಇದಕ್ಕೆ ಸಚಿವ ಸುಧಾಕರ್‌ 10 ಎಕರೆ ಜಾಗ ಒದಗಿಸಿದ್ದಾರೆ’ ಎಂದರು.

‘ಆಧುನಿಕತೆಗೆ ತಕ್ಕಂತೆ ವಿಟಿಯು ಶಿಕ್ಷಣ ಒದಗಿಸುತ್ತಿದೆ. ಲಿಖಿತ ಪರೀಕ್ಷೆ ಮುಗಿದ ಒಂದು ವಾರದೊಳಗೆ ಫಲಿತಾಂಶ ಪ್ರಕಟಿಸುತ್ತಿದೆ. ಆನ್‌ಲೈನ್‌ ಎಜುಕೇಷನ್‌ ಕೋರ್ಸ್‌ಗಳಿಗೆ ವಿಶ್ವದೆಲ್ಲೆಡೆ ಇರುವ ವಿದ್ಯಾರ್ಥಿಗಳಿಂದ ಸ್ಪಂದನೆ ವ್ಯಕ್ತವಾಗಿದೆ’ ಎಂದರು.

ಕುಲಸಚಿವ ಬಿ.ಈ.ರಂಗಸ್ವಾಮಿ, ಮೌಲ್ಯಮಾಪನ ಕುಲಸಚಿವ ಟಿ.ಎನ್‌.ಶ್ರೀನಿವಾಸ ಇದ್ದರು.