ಬೆಳಕು ತಂದವರ ಕತ್ತಲ ಬದುಕು

ಇವರು ನಾಡಿಗೆ ಬೆಳಕು ನೀಡಿದವರು.  ಇದಕ್ಕಾಗಿ ತಮ್ಮ ಆಸ್ತಿ, ಪಾಸ್ತಿ ಎಲ್ಲವನ್ನೂ ಕಳೆದುಕೊಂಡವರು. ಆದರೆ ಐದು ದಶಕಗಳಿಂದ ಇವರ ಬದುಕು ಮಾತ್ರ ಬರೀ ಕತ್ತಲು. ಇದೀಗ ನಿಂತ ನೆಲವೇ ಕುಸಿದು ಹೋಗುತ್ತಿರುವ ಅನುಭವ. ‘ದೋಣಿ ದಾಟಿದ ಮೇಲೆ ಪಯಣಿಗನಿಗೆ ಅಂಬಿಗನ ಹಂಗೇಕೆ’ ಎಂಬ ಸರ್ಕಾರದ ಮನೋಧೋರಣೆಯಿಂದ ತಲೆಯ ಮೇಲೊಂದು ಸೂರು ಇಲ್ಲದೆ ಇವರದ್ದೀಗ ಬರೀ ಒದ್ದಾಟ.

ಇದು ಶಿವಮೊಗ್ಗ ಜಿಲ್ಲೆಯ ಸಾಗರ ತಾಲ್ಲೂಕಿನ ಕರೂರು ಬಾರಂಗಿ ಹೋಬಳಿ ಜನರ ಪರಿಸ್ಥಿತಿ. ಶರಾವತಿ ವಿದ್ಯುತ್ ಯೋಜನೆಗಾಗಿ ತಮ್ಮ ಆಸ್ತಿ, ಪಾಸ್ತಿ ಕಳೆದುಕೊಂಡು ಇವರೆಲ್ಲ ಮೂಲ ಸೌಕರ್ಯದಿಂದ ವಂಚಿತರಾಗಿದ್ದಾರೆ. ವಿದ್ಯುತ್ ಯೋಜನೆಗಾಗಿ ಇವರ ಸಾವಿರಾರು ಕೃಷಿಭೂಮಿ ಹಾಗೂ ಅಡಿಕೆ ತೋಟಗಳು ಜಲಾವೃತಗೊಂಡಿವೆ. 

ಮೈಸೂರು ಒಡೆಯರ ಕಾಲದಲ್ಲಿ ವಿದ್ಯುತ್ ಯೋಜನೆಗಾಗಿ ಮಡೆನೂರು ಅಣೆಕಟ್ಟು ಕಟ್ಟಲಾಯಿತು. ಇದರಿಂದಲೂ ಈ ಭಾಗದ ಜನ ತೊಂದರೆ ಅನುಭವಿಸಿದರು. ನಂತರ 1964 ರಲ್ಲಿ ಶರಾವತಿ ವಿದ್ಯುತ್ ಯೋಜನೆಗಾಗಿ ಲಿಂಗನಮಕ್ಕಿ ಅಣೆಕಟ್ಟೆ ನಿರ್ಮಿಸಲಾಯಿತು. ಗಾಯದ ಮೇಲೆ ಬರೆ ಎಳೆದಂತೆ ಇದು ಇನ್ನಷ್ಟು ಜನರು ಸಂತ್ರಸ್ತರಾಗಲು ಕಾರಣವಾಯಿತು. ನಿಂತ ಭೂಮಿಯನ್ನೆಲ್ಲ ನೀರು ಆವರಿಸಿಕೊಂಡಾಗ ಉಳಿದ ಬದುಕಿಗಾಗಿ ಅನಿವಾರ್ಯವಾಗಿ ಊರು ಬಿಡುವ ಪರಿಸ್ಥಿತಿಯನ್ನು ಊಹಿಸಿಕೊಳ್ಳಲೂ ಕಷ್ಟವಾದೀತು. ಅಳಿದುಳಿದ ಆಸ್ತಿ, ಮನೆ ಬಿಟ್ಟು ಹೋಗದೇ ಅಲ್ಲಿಯೇ ಬದುಕು ಸವೆಸುತ್ತಿರುವವ ಇವರ ಬಾಳು ಇನ್ನೂ ಅಸಹನೀಯ.

ಇಷ್ಟು ವರ್ಷಗಳ ಕಾಲ ನದಿ ದಾಟಲು ‘ಲಾಂಚ್’ ಇರಲಿಲ್ಲ. ಇದರಿಂದಾಗಿ ಸಕಾಲದಲ್ಲಿ ಚಿಕಿತ್ಸೆ ಸಿಗದೇ ಎಷ್ಟೋ ಮಂದಿ ಸಾವನ್ನಪ್ಪಿದ್ದಾರೆ. ಹೆರಿಗೆ ನೋವುಂಟಾದ ಮಹಿಳೆಯರು ಇಹಲೋಕವನ್ನೇ ತ್ಯಜಿಸಿದ್ದಾರೆ. ತೀವ್ರವಾದ ಹೋರಾಟದ ಫಲವಾಗಿ  ಇಲ್ಲಿಯವರೆಗೆ ಸಿಕ್ಕಿದ್ದು ‘ಲಾಂಚ್‌’ ಸೌಲಭ್ಯ ಮಾತ್ರ.
ಆದರೆ ಸೇತುವೆ ಬೇಕು ಎಂಬ ಇವರ ಕನಸು ಮಾತ್ರ ಇದುವರೆಗೂ ನನಸಾಗಿಲ್ಲ. ಸೇತುವೆ ನಿರ್ಮಾಣದ ಭರವಸೆ ನೀಡಿ ಅರ್ಧ ಶತಮಾನ ಕಳೆದಿದೆ. ಸೇತುವೆ ನಿರ್ಮಿಸಿಕೊಡುವುದಾಗಿ ಜನರಲ್ಲಿ ಬಿತ್ತಿದ ಕನಸು ಎರಡನೇ ತಲೆಮಾರಿನ ಜನರಿಗೆ ವರ್ಗಾಯಿಸಲಾಗಿದೆ!

ಚಿಗುರಿದ್ದ ಆಸೆ
ಕಳೆದ 50 ವರ್ಷಗಳಲ್ಲಿ ರಾಜ್ಯದಲ್ಲಿ ಅನೇಕ ಸರ್ಕಾರಗಳು ಅಧಿಕಾರಕ್ಕೆ ಬಂದರೂ ತುಮರಿ ಸೇತುವೆ ವಿಚಾರ ಮುಖ್ಯವಾಗಿ ಪರಿಗಣನೆಗೆ ಬರಲೇ ಇಲ್ಲ. ಅಧಿಕಾರದ ಕಣ್ಣಿಗೂ ಇವರು ಕತ್ತಲಲ್ಲಿರುವುದು ಗೋಚರಿಸಲಿಲ್ಲ.

2009ರಲ್ಲಿ ಅಧಿಕಾರಕ್ಕೆ ಬಂದ ಬಿಜೆಪಿ ಸರ್ಕಾರ ಈ ಯೋಜನೆಗೆ ಬಜೆಟ್‌ನಲ್ಲಿ ಹಣ ಮೀಸಲಿಟ್ಟಿತ್ತು. ಶಂಕುಸ್ಥಾಪನೆಯೂ ನೆರವೇರಿತ್ತು. ಆದರೆ ಯೋಜನೆಗೆ ಹಣ ಬಿಡುಗಡೆ ಭಾಗ್ಯ ಕಾಣಲಿಲ್ಲ. ಪರಿಣಾಮ, ಮತ್ತೆ ಸೇತುವೆ ವಿಚಾರ ನೆನೆಗುದಿಗೆ ಬಿತ್ತು.

ಈ ಸೇತುವೆ ನಿರ್ಮಾಣಕ್ಕೆ ಬೇಕಿರುವ ಸುಮಾರು 200 ಕೋಟಿ ರೂಪಾಯಿ ಹಣವನ್ನು ನಬಾರ್ಡ್ ಸಾಲವಾಗಿ ಕೊಡಲು ಮುಂದೆ ಬಂದಿದೆ. ಅದಕ್ಕೆ ರಾಜ್ಯ ಸರ್ಕಾರ ಅನುಮೋದನೆ ನೀಡಬೇಕು. ಆದರೆ ಸರ್ಕಾರ ಹಿಂದೇಟು ಹಾಕುತ್ತಿದೆ!