ಇಲ್ಲಿದ್ದಾನೆ ನೋಡಿ ದುಬಾರಿ ಗಣಪ

ಹಲವು ದಿನಗಳಿಂದ ಹತ್ತಾರು  ಕಲಾವಿದರು  ಹಗಲು–ರಾತ್ರಿ   ದುಡಿದು  ಗುಹಾಂತರ ದೇವಸ್ಥಾನಕ್ಕೆ ಜೀವ ತುಂಬಿದ್ದಾರೆ. ಇದಕ್ಕಾಗಿ ಲಕ್ಷಾಂತರ ರೂಪಾಯಿ ಖರ್ಚಾಗಿದೆ.ಗಣಪನ ಸುತ್ತಲೂ ಬೆಳಗುವ ಸಾವಿರಾರು ಬಣ್ಣದ ದೀಪಗಳ ಮೆರಗನ್ನು ಕಣ್ತುಂಬಿಕೊಳ್ಳುವುದೇ ಒಂದು ಸೊಗಸು. 

ಒಟ್ಟಾರೆ 32 ವರ್ಷಗಳಿಂದ  ಸ್ವಸ್ತಿಕ್‌ ಯುವಕರ ಸಂಘದ ಆಚರಿಸಿಕೊಂಡು ಬರುತ್ತಿರುವ ಈ ಗಣೇಶ ಉತ್ಸವ ಮುಂಬೈ, ಪುಣೆ ಹಾಗೂ ಬೆಳಗಾವಿ, ಹುಬ್ಬಳ್ಳಿ–ಧಾರವಾಡದ ಗಣೇಶೋತ್ಸವದ ವೈಭವವನ್ನು ನೆನಪಿಗೆ ತರುತ್ತದೆ. ಚಿತ್ರ ನಿರ್ಮಾಪಕ ಡಿ. ಸುರೇಶ್ ಗೌಡ  ನೇತೃತ್ವದಲ್ಲಿ 1984ರಲ್ಲಿ ಆರಂಭವಾದ ಸ್ವಸ್ತಿಕ್ ಯುವಕರ ಸಂಘ ಬೆಳ್ಳಿಹಬ್ಬ  ಪೂರೈಸಿದೆ.

ಗಣೇಶ ಉತ್ಸವ ಕೇವಲ ಅದ್ದೂರಿ ಉತ್ಸವವಾಗಿರದೆ  ಸದಭಿರುಚಿಯ ಸಂಕೇತವಾಗಿದೆ. ಮಲ್ಲೇಶ್ವರ, ರಾಜಾಜಿನಗರ, ಯಶವಂತಪುರ ಸುತ್ತಮುತ್ತಲಿನ ಜನರ ಪಾಲಿಗೆ ಸಾಂಸ್ಕೃತಿಕ ಹಬ್ಬವಾಗಿದೆ. ವಿಶೇಷ ಸಿಡಿಮದ್ದು ಪ್ರದರ್ಶನ   ಗಣೇಶ ವಿಸರ್ಜನೆಯ ಆಕರ್ಷಣೆಯ ಕೇಂದ್ರ ಬಿಂದು. ಈ ಸಂದರ್ಭ ₹ 1 ಲಕ್ಷಕ್ಕೂ ಹೆಚ್ಚು ಮೊತ್ತದ ಮದ್ದು ಸುಡಲಾಗುತ್ತದೆ.

ಮಂಟಪಕ್ಕೆ ತಾಗಿಕೊಂಡಿರುವ ಮಿಲ್ಕ್ ಕಾಲೊನಿಯ ಆಟದ ಮೈದಾನದಲ್ಲಿ  ಐದು ದಿನ ಸಂಜೆ ಜರುಗುವ ವೈವಿಧ್ಯಮಯ ಸಾಂಸ್ಕೃತಿಕ ಕಾರ್ಯಕ್ರಮಗಳು ಜನರನ್ನು ಸೆಳೆಯುತ್ತವೆ. ಜನಪ್ರಿಯ ಕಲಾವಿದರಿಂದ ಸಾಂಸ್ಕೃತಿಕ ಕಾರ್ಯಕ್ರಮ, ಸಂಗೀತ ಸುಧೆ ಹರಿಯಲಿದೆ. ರಾಜ್ಯದ ಮೂಲೆ, ಮೂಲೆಯ ಹಿರಿ, ಕಿರಿಯ ಪ್ರತಿಭೆಗಳನ್ನು ಗುರುತಿಸಿ  ಗೌರವಿಸಿ ಅವರಿಗೊಂದು ವೇದಿಕೆ ಒದಗಿಸಿರುವ ಹೆಗ್ಗಳಿಕೆ ಸ್ವಸ್ತಿಕ್‌ ಸಂಘದ್ದು. ಸ್ವಸ್ತಿಕ್ ಯುವಕರ ಸಂಘ ಈ ಐದು ದಿನ ಬಡಾವಣೆಯ ಸಂಪೂರ್ಣ ಚಿತ್ರಣವನ್ನೇ ಬದಲಾಯಿಸಿಬಿಡುತ್ತದೆ.