ನಿಸರ್ಗದೊಡಲ ಚಿತ್ರಪಟ

ಛಾಯಾಚಿತ್ರಗಳ ವಿವರಣೆ
ಪ್ರತಿಯೊಬ್ಬ ಛಾಯಾಗ್ರಾಹಕನೂ ತನಗೆ ಆಸಕ್ತಿ ಇರುವ ವಸ್ತು ವಿಷಯದ ಆಧಾರದ ಮೇಲೆ ಚಿತ್ರಗಳನ್ನು ಸೆರೆಹಿಡಿದು ವರ್ಚಸ್ಸನ್ನು ರೂಪಿಸಿಕೊಳ್ಳುತ್ತಾರೆ. ಹಾಗೆ ಹಕ್ಸರ್‌ ಕೂಡ ಪ್ರಕೃತಿ ಹಾಗೂ ವಾಸ್ತುಶಿಲ್ಪಕ್ಕೆ ಸಂಬಂಧಿಸಿದಂತೆ ನಾನಾ ರೀತಿಯ ಆ್ಯಂಗಲ್‌ಗಳಲ್ಲಿ ವಿಶಿಷ್ಟವೆನಿಸುವ ಚಿತ್ರಗಳನ್ನು ಕ್ಲಿಕ್ಕಿಸಿ ಗುರುತಿಸಿಕೊಂಡಿದ್ದಾರೆ. 

ಹಕ್ಸರ್ ಅವರ ಕ್ರೊಯೇಷಿಯಾ ಮತ್ತು ಇಟಲಿ ಪ್ರವಾಸದಲ್ಲಿ ಕಂಡುಬಂದ ಸ್ಥಿರ ಛಾಯಾಚಿತ್ರಗಳ ಒಟ್ಟು 37 ಫೋಟೊಗಳು ಈ ಪ್ರದರ್ಶನದಲ್ಲಿವೆ.
ವಾಸ್ತುಶಿಲ್ಪದ ಹಲವು ಆಯಾಮ ಹಾಗೂ ಕೆಲವು ಸೂಕ್ಷ್ಮತೆಯನ್ನು ಸೆರೆಹಿಡಿಯುವಲ್ಲಿ ಹಕ್ಸರ್‌ ಅವರ ಪ್ರತಿಭೆ ನಿರೂಪಿತಗೊಂಡಿದೆ. ವಿವಿಧ ಶೈಲಿಯ ಮನೆಗಳ ವಿನ್ಯಾಸ ಬಣ್ಣ, ಆಕಾರ, ಇವುಗಳು ಸಮಗ್ರವಾಗಿ ಕಾಣುವ ಹಾಗೆ ಕ್ಯಾಮೆರಾ ಕಣ್ಣಲ್ಲಿ ಅಚ್ಚುಕಟ್ಟಾಗಿ ಸೆರೆಹಿಡಿದಿದ್ದಾರೆ.

ಪ್ರಕೃತಿಯಲ್ಲಿನ ಸೌಂದರ್ಯ ಶ್ರೀಮಂತಿಕೆಯನ್ನು ಗುರುತಿಸುವ ಹಕ್ಸರ್‌ ಅವರ ಬಹುತೇಕ ಚಿತ್ರಗಳು ನೋಡುಗರು ಹುಬ್ಬೇರಿಸುವಂತೆ ಮಾಡುತ್ತವೆ. ಇನ್ನು ಕೆಲವು ಚಿತ್ರಗಳು ವಸ್ತು ವಿಷಯಕ್ಕೆ ಹೆಚ್ಚು ಒತ್ತು ನೀಡಿ ಗಾಢ ಬಣ್ಣಗಳೊಂದಿಗೆ ನೆರಳಿನ ಸಂಯೋಜನೆಯಲ್ಲಿ ಬೆರೆತು ವಿಶಿಷ್ಟ ಎನಿಸುತ್ತವೆ.

ವೈಭವದ ಅರಮನೆ, ಬೆಳಕಿನ ಸಂಯೋಜನೆಯಲ್ಲಿ ಬಂಗಾರದಂತೆ ಕಂಗೊಳಿಸುತ್ತದೆ. ಇಟಲಿಯ ಟೆರ್ರಾಕೋಟಾ ಚಾವಣಿಯ ಮನೆಯ ಚಿತ್ರವನ್ನು ನೋಡಿದರೆ ಮತ್ತೊಮ್ಮೆ ಮಗದೊಮ್ಮೆ ನೋಡುವ ಮನಸ್ಸಾಗುತ್ತದೆ. ಸುಂದರ ಸಮುದ್ರದ ತಪ್ಪಲಿನಲ್ಲಿರುವ  ಕೋಟೆಯಂತಹ ಮನೆಗಳು ನೋಡುಗರ ಮೊಗದಲ್ಲಿ ಆನಂದ ಮೂಡಿಸುತ್ತವೆ.

ಬೆಟ್ಟ ಗುಡ್ಡಗಳಲ್ಲಿ ಸಾಲು ಸಾಲು ಮೆಟ್ಟಿಲ ರೀತಿಯಲ್ಲಿ ಕಟ್ಟಿರುವ ಮನೆಗಳು ಅಚ್ಚರಿಯಂತೆ ಕಾಣುತ್ತವೆ. ಈ ರೀತಿಯ ಛಾಯಚಿತ್ರ ಸೆರೆಹಿಡಿದು  ದೇಶ ವಿದೇಶಗಳ ಚಿತ್ರಣವನ್ನು ಕಲಾಪ್ರೇಮಿಗಳಿಗೆ ಅರ್ಪಿಸಿದ್ದಾರೆ. 

ಕೊರೆಯುವ ಚಳಿಯಲ್ಲಿ ಮಂಜಿನ ಹೊದಿಕೆಯ ಮಧ್ಯೆ ಇರುವ ಸುಂದರ ಚಿತ್ರಗಳು ನೋಡುಗರನ್ನು ಮಂಜಿನೆಡೆಗೆ ಕೊಂಡೊಯ್ಯುವ ಭಾವನೆ ಹುಟ್ಟಿಸುತ್ತವೆ.
ಮಂಜಿನ ಹನಿ ಹಿಮಗೂಡಿ ಹೆಪ್ಪುಗಟ್ಟುವಿಕೆಯ ಚಿತ್ರಗಳು ಕನ್ನಡಿ ಮುಂದೆ ನಿಂತ ಭಾವನೆ ಅರಳಿಸುತ್ತವೆ.

ಅತ್ಯಂತ ಗಾಢ ಬಣ್ಣಗಳಿಂದ ಕೂಡಿರುವ ಚಿತ್ರಗಳು ನೋಡುಗರನ್ನು ಬಣ್ಣದ ಪ್ರಪಂಚಕ್ಕೆ ಕೊಂಡೊಯ್ಯುತ್ತವೆ. ಇಲ್ಲಿನ ಸ್ಥಳಗಳಿಗೆ ಭೇಟಿ ನೀಡದಿದ್ದರೂ ಇವರು ಕ್ಲಿಕ್ಕಿಸಿರುವ ಅದ್ಭುತ ಚಿತ್ರಗಳನ್ನು ನೋಡಿದರೆ ನೈಜ ಅನುಭವ ಪಡೆದ ಖುಷಿ ನಮ್ಮದಾಗುತ್ತದೆ.

ಸ್ಥಳ:
ಯುಬಿ ಸಿಟಿ, 8ನೇ ಮಹಡಿ ಸಬ್‌ಲೈಮ್‌ ಗ್ಯಾಲರಿ. ಬೆಳಗ್ಗೆ 11ಗಂಟೆಯಿಂದ ರಾತ್ರಿ 8 ರವರೆಗೆ  ವೀಕ್ಷಣೆಗೆ ಅವಕಾಶ. ಮಾರ್ಚ್‌ 4 ಕೊನೆಯ ದಿನ.