ಜುಳು ಜುಳು ಕುಲು ಕುಲು ಕೇಳುತಿದೆ
ಸಲಿಲವು ತುಳುಕುತ ಸಾಗುತಿದೆ
ಅಮ್ಮಾ, ಯಾರದು ಈ ಹಾಡು?
ಹಾಡಿನ ಒಡಲನು ತೆರೆದು ಇಡು!
ಹಾಡು, ಹರಿಯುವ ನೀರಿನದೆ?
ನಿಶ್ಚಲ ನಿಂತಿರೊ ಬಂಡೆಯದೆ?
ಹೊರಳುತ ಉರುಳುವ ಹರಳಿನದೆ?
ಎಲ್ಲಿಗೊ ತೆರಳುವ ಮರಳಿನದೆ?
ಅಮ್ಮಾ, ಯಾರದು ಈ ಹಾಡು?
ಹಾಡಿನ ಜಾಡನು ಹಿಡಿದು ಕೊಡು!
ಬೆಟ್ಟದ ಹೊಟ್ಟೆಯ ಹಾಡೆ ಇದು?
ಧಾರೆಯನೆರೆಯುವ ಕಣಿವೆಯದು?
ಮರಗಳ ಮರ್ಮರಕುತ್ತರವೋ?
ತಿರುಗಾಟದ ಪದ ಭೂಮಿಯದೋ?
ಅಮ್ಮಾ, ಯಾರದು ಈ ಹಾಡು?
ಹಾಡಿನ ಗೂಡನು ಹುಡುಕಿ ಬಿಡು!
ನೀರಿಗೆ ಇಳಿದರೆ ನೀರೆಯರು?
ಕಿಲಕಿಲ ನಗುವ ಲಲನೆಯರು?
ಆಡುತ್ತಿದೆಯೆ ನೀರಾಟ
ಕಿನ್ನರಿ ಕಿನ್ನರ ಪರಿವಾರ?
ಅಮ್ಮಾ, ಯಾರದು ಈ ಹಾಡು?
ಹಾಡಿನ ಗೂಢವ ಬಿಡಿಸಿ ಬಿಡು!
ಜುಳು ಜುಳು ಗಂಗೆಯ ಜೋಗುಳವೆ?
ಕುಲು ಕುಲು ಮೀನ್ಗಳ ಕಲರವವೆ?
ಪಡಿನುಡಿಯಿತೆ ಆ ಪಾತಾಳ?
ಬುಸುಗುಡುತಿವೆಯೇ ಆ ವ್ಯಾಳ?
ಅಮ್ಮಾ, ಯಾರದು ಈ ಹಾಡು?
ಹಾಡನ್ನೂಡುತ ಕಲಿಸಿಕೊಡು!
ಹಾಡು, ನುಡಿಸುವ ಸೂರ್ಯನದೆ?
ನಗಿಸುವ ಕೀಟಲೆ ಗಾಳಿಯದೆ?
ನದಿಯೆದೆ ಕರಗಿಸೊ ಹಕ್ಕಿಯದೆ?
ಎದೆಯಲ್ಲುಳಿಯುವ ಚಂದ್ರನದೆ?
ಅಮ್ಮಾ, ಯಾರದು ಈ ಹಾಡು?
ಹಾಡನು ಕುಡಿಯುತ ಬೆಳೆಯಗೊಡು!