ಮಾಸ್ಕೊ: ಜರ್ಮನಿಯ ಸರ್ವಾಧಿಕಾರಿ ಅಡಾಲ್ಫ್ ಹಿಟ್ಲರ್ ಆದೇಶದ ಮೇರೆಗೆ ನಿರ್ಮಿಸಲಾಗಿದ್ದ ನಾಜಿ ನೆಲೆಯೊಂದನ್ನು ರಷ್ಯಾದ ಆರ್ಕ್ಟಿಕ್ ರಾಷ್ಟ್ರೀಯ ಉದ್ಯಾನವನದ ಸಂಶೋಧಕರು ಪತ್ತೆಹಚ್ಚಿದ್ದಾರೆ. ಇದು ಉತ್ತರ ಧ್ರುವ ಪ್ರದೇಶದಿಂದ ಸಾವಿರ ಕಿ.ಮೀ. ದೂರದಲ್ಲಿರುವ ಅಲೆಕ್ಸಾಂಡ್ರಾ ಲ್ಯಾಂಡ್‌ನ ದ್ವೀಪದಲ್ಲಿ ಪತ್ತೆಯಾಗಿದೆ. ಸದ್ಯ ಈ ಭೂಪ್ರದೇಶ ರಷ್ಯಾದ ವ್ಯಾಪ್ತಿಯಲ್ಲಿದೆ.
ಬಂಕರ್‌ಗಳ, ಪೆಟ್ರೋಲ್ ಬಾಂಬ್‌ಗಳ ಮತ್ತು ಕಾಗದಪತ್ರಗಳ 500ರಷ್ಟು ಅವಶೇಷಗಳೂ ನಾಜಿ ನೆಲೆಯಲ್ಲಿ ಕಂಡುಬಂದಿವೆ. ದ್ವೀಪದಲ್ಲಿ ಚಳಿ ಹೆಚ್ಚಿರುವುದು ಅವಶೇಷಗಳು ಈವರೆಗೂ ಉಳಿದಿರಲು ಕಾರಣವಾಗಿದೆ. 1942ರಲ್ಲಿ ಈ ನೆಲೆ ನಿರ್ಮಾಣಗೊಂಡಿರಬಹುದು. 1943ರಿಂದ 1944ರವರೆಗೆ ಕಾರ್ಯಾಚರಣೆ ನಡೆಸಿರುವ ಸಾಧ್ಯತೆ ಇದೆ ಎಂದು ಸಂಶೋಧಕರು ತಿಳಿಸಿದ್ದಾರೆ.
