ಮೊದಲ ಓದು

ಕನ್ನಡ ಕಂದಮ್ಮಗಳಿಗಾಗಿ ರಚಿಸಲಾಗಿರುವ 60ಕ್ಕೂ ಹೆಚ್ಚಿನ ಶಿಶುಗೀತೆಗಳನ್ನು ನಿರ್ಮಲಾ ಸುರತ್ಕಲ್‌ ‘ಅ ಆ ಇ ಈ ಉ ಊ’ನಲ್ಲಿ ಕೊಟ್ಟಿದ್ದಾರೆ. ಮಕ್ಕಳ ಭಾವಲೋಕಕ್ಕೆ ಸಂಬಂಧಿಸಿದ, ಅವರ ಪರಿಚಿತ ಜಗತ್ತಿನ ವಸ್ತುಗಳನ್ನು ಇಟ್ಟುಕೊಂಡು ರಚಿಸಲಾದ ಬಾಲಗೀತೆಗಳಿವು. ಕನ್ನಡದ ವರ್ಣಮಾಲೆಯ ಹೆಸರು ಹೊತ್ತ ಈ ಸಂಕಲನ ಹಲಬಗೆಯ ಬಣ್ಣದ ಲೋಕವನ್ನು ಮಕ್ಕಳಿಗೆ ತೋರಲು ಪ್ರಯತ್ನಿಸಿದೆ. ‘ತಾತನ ಚಷ್ಮಾ ಅಡಗಿಸಿ ಮೋಜು/ ಪೇಪರ್‌ ಓದುವ ವೇಳೆ/ ಕಿವಿಯನ್ನು ಹಿಂಡಿ, ಅಮ್ಮನ ಗುದ್ದು / ಅಬ್ಬಾ ಇವನ ಗೋಳೇ!’ (ಒಳ್ಳೆಯ ಹೆಸರು, ಪು. 21) ಎಂಬಲ್ಲಿ ಮಗುವಿನ ಸಹಜ ತುಂಟಾಟದ ಚಿತ್ರವಿದೆ. ಇಂತಹ ಮನೋಹರ, ಮನದುಂಬುವ ಚಿತ್ರಗಳು ಇಲ್ಲಿನ ಅನೇಕ ಗೀತೆಗಳಲ್ಲಿವೆ.

 

ಇಲ್ಲಿನ ‘ನನ್ನ ಹೀರೋ’ ಗೀತೆಯಲ್ಲಿ ಡ್ರೈವರ್‌ ಮಾಮನೇ ಹೀರೋ ಆಗುತ್ತಾನೆ. ಅಂಜದೆ, ಅಳುಕದೆ ರಸ್ತೆಯಲ್ಲಿ ಬಸ್ಸನ್ನು ಓಡಿಸುವ ಅವನು ಸಹಜವಾಗಿಯೇ ಮಕ್ಕಳಿಗೆ ನಾಯಕನಾಗಿ ಕಾಣಿಸುತ್ತಾನೆ. ಬೋಧನೆ, ಎಚ್ಚರಿಕೆಯಿಂದ ಕೂಡಿದ ಈ ಗೀತೆಗಳ ಮೂಲಕ ಮಕ್ಕಳ ಮನಸ್ಸನ್ನು ಆಕರ್ಷಿಸಿ ಅವರನ್ನು ಜೀವಜಗತ್ತಿನ ಕಡೆ ಕರೆದೊಯ್ಯುವುದು ಕವಯಿತ್ರಿಯ ಉದ್ದೇಶ. ಆ ಪ್ರಯತ್ನದಲ್ಲಿ ಅವರು ಸಫಲರಾಗಿದ್ದಾರೆ. ಭಾಷೆಯ ಛಂದ, ಲಯದಿಂದ ಅರಳಿರುವ ಈ ಗೀತೆಗಳು ಹಾಡಿದಾಗ ಮಕ್ಕಳಿಗೆ ಇನ್ನಷ್ಟು ಹತ್ತಿರವಾಗುತ್ತವೆ. ಆಗ ಆ ಹಾಡುಗಳು ಬದುಕಿನ ಕುರಿತ ವಿಸ್ಮಯವನ್ನು ಹೆಚ್ಚಿಸಲು, ತಿಳಿವಳಿಕೆಯನ್ನು ವಿಸ್ತರಿಸಲು ಅನುವು ಮಾಡಿಕೊಡುತ್ತವೆ. 

ಉಪ್ಪೂರರ ಡೈರಿ ಹಾಗೂ ಶಿಷ್ಯಪ್ರೀತಿ ಈಗಿನ ತಲೆಮಾರಿನವರಿಗೆ ಸುಬ್ರಹ್ಮಣ್ಯ ಧಾರೇಶ್ವರ ಗೊತ್ತು, ಕೊಳಗಿ ಕೇಶವ ಹೆಗಡೆ ಗೊತ್ತು. ಕೆಲವರಿಗಾದರೂ ಕೆ.ಪಿ. ಹೆಗಡೆ ಗೊತ್ತು. ಕಾಳಿಂಗ ನಾವುಡರ ಬಗ್ಗೆ ಕೇಳಿಯಾದರೂ ಗೊತ್ತು. ಆದರೆ ನಾರ್ಣಪ್ಪ ಉಪ್ಪೂರರ ಬಗ್ಗೆ ಹೆಚ್ಚಿನ ಮಾಹಿತಿ ತಿಳಿದಿರಲಿಕ್ಕಿಲ್ಲ. ಈ ಎಲ್ಲ ಸ್ಟಾರ್ ಭಾಗವತರ ಗುರು ನಾರ್ಣಪ್ಪ ಉಪ್ಪೂರರು. 

 

ಯಕ್ಷಗಾನ ಕ್ಷೇತ್ರದಲ್ಲಿ ಎಂದೆಂದೂ ಅಳಿಸಲಾಗದ ಪಡಿಯಚ್ಚು ಮೂಡಿಸಿದ ಕಲಾವಿದರು ಅವರು. ನಾರ್ಣಪ್ಪ ಉಪ್ಪೂರರು ಹಾಗಿದ್ದರು, ಹೀಗಿದ್ದರು, ಹೀಗೆ ಹೀಗೆ ಆಟ ಮಾಡಿಸುತ್ತಿದ್ದರು ಎಂದು ಅವರ ಶಿಷ್ಯರು ಮತ್ತು ಅವರನ್ನು ರಂಗದಲ್ಲಿ ಕಂಡ ಅಭಿಮಾನಿಗಳು ಹೇಳುತ್ತಿದ್ದರೂ ಇಂದಿನ ತಲೆಮಾರಿಗೆ ಅವರನ್ನು ಸರಿಯಾಗಿ ಪರಿಚಯಿಸುವ ಕೆಲಸವಾಗಿರಲಿಲ್ಲ. ಈಗ ಅಂತಹ ಕೆಲಸವನ್ನು ನಾಗರಾಜ ಮತ್ತಿಗಾರ ಮಾಡಿದ್ದಾರೆ. ನಾರ್ಣಪ್ಪ ಉಪ್ಪೂರರೇ ತಮ್ಮ ಬದುಕಿನ ಬಗ್ಗೆ ಆಗಾಗ ಬರೆದ ಡೈರಿಯನ್ನು ಹಾಗೆಯೇ ಪ್ರಕಟಿಸಿದ್ದಾರೆ. ಜೊತೆಗೆ ಉಪ್ಪೂರರ ಶಿಷ್ಯರೂ ಕೂಡ ತಮ್ಮ ಗುರುಗಳ ಬಗ್ಗೆ ಭಾವಪೂರ್ಣವಾಗಿ ಜೊತೆಗೆ ವಿದ್ವತ್ ಪೂರ್ಣವಾಗಿಯೂ ಬರೆದಿದ್ದಾರೆ.

 

ಇದನ್ನು ಯಾವುದೇ ಕಾರಣಕ್ಕೂ ಆತ್ಮಕತೆ ಎನ್ನುವ ಹಾಗಿಲ್ಲ. ಯಾಕೆಂದರೆ ಉಪ್ಪೂರರು ತಮ್ಮ ಬಗ್ಗೆ ಹೆಚ್ಚಿನ ವಿವರಗಳನ್ನು ಇಲ್ಲಿ ಹೇಳಿಕೊಂಡಿಲ್ಲ. ಮೊದಲ ನಾಲ್ಕು ಅಧ್ಯಾಯಗಳಲ್ಲಿ ನಾರಣಪ್ಪ ಉಪ್ಪೂರರೇ ತಮ್ಮ ಬದುಕಿನ ಬಗ್ಗೆ ಬರೆದುಕೊಂಡ ವಿವರಗಳು ಇವೆ ನಿಜ. ಆದರೆ ಅದು ಅಪೂರ್ಣ. ಉಳಿದ ಭಾಗಗಳಲ್ಲಿ ಅವರ ಶಿಷ್ಯರು ಬರೆದ ಲೇಖನಗಳು ಗಮನಾರ್ಹವಾಗಿವೆ.  ಉಪ್ಪೂರರ ಡೈರಿ ಆಗಿನ ಕಾಲದ ಕಲಾವಿದನೊಬ್ಬನ ಸಂಕಷ್ಟವನ್ನು ವಿವರಿಸಿದರೆ ಶಿಷ್ಯರ ಲೇಖನಗಳು ಉಪ್ಪೂರರ ವೈಶಿಷ್ಟ್ಯವನ್ನು ಬಣ್ಣಿಸಿವೆ. ಯಕ್ಷಗಾನವನ್ನು ಗಂಭೀರವಾಗಿ ಅಭ್ಯಾಸ ಮಾಡುವವರಿಗೆ ಇದೊಂದು ಉತ್ತಮ ಪಠ್ಯ.