ಕಾಡಿನ ನಡುವೆ ಕೃಷಿಭೂಮಿ

ಈ ಪ್ಲಾಟಿನ ಇನ್ನೊಂದು ಪಾರ್ಶ್ವದಲ್ಲಿ 330ಕ್ಕೂ ಹೆಚ್ಚು ತೆಂಗಿನ ಮರಗಳು ಫಲ ನೀಡುತ್ತಿವೆ. ಈ ಮರಗಳಿಗೂ ಕಾಳುಮೆಣಸಿನ ಬಳ್ಳಿಗಳು ಚೆನ್ನಾಗಿಯೇ ಬಲಿದುಕೊಂಡಿವೆ. ಅಲ್ಲಿಯೇ ಮತ್ತೊಂದು ಭಾಗದಲ್ಲಿ ಸಿಲ್ವರ್ ಓಕ್, ಹಲಸು... ಇಂಥ ವಿಭಿನ್ನ ಜಾತಿಯ ಮರಗಳಿದ್ದು, ಅವುಗಳಿಗೂ ಕಾಳುಮೆಣಸಿನ ಬಳ್ಳಿಗಳನ್ನು ಹಬ್ಬಿಸಲಾಗಿದೆ ಇದರಿಂದಾಗಿ ಇವರ ಜಮೀನಿನಲ್ಲಿ ಪಣಿಯಾರ್, ನಿಲಗುಂದ, ಕರಿಮುಂಡ ಸೇರಿದಂತೆ ವಿವಿಧ ತಳಿಗಳ 7–8 ಸಾವಿರ ಕಾಳುಮೆಣಸಿನ ಬಳ್ಳಿಗಳಿದ್ದು ಅವು ಫಸಲನ್ನು ನೀಡಲು ಆರಂಭಿಸಿವೆ. ಅಡಿಕೆತೋಟದಲ್ಲಿರುವ ಕಾಫಿಗಿಡಗಳಿಂದ ಎರಡು ಕ್ವಿಂಟಲ್ ಇಳುವರಿ ಪಡೆಯುತ್ತಿದ್ದಾರೆ.

 

ರಬ್ಬರ್‌ ತೋಟದಲ್ಲಿ ಪಾಲಿಹೌಸ್

ದೀಪಕ್‌ ಅವರು ದೊಡ್ಡ ಪ್ರಮಾಣದಲ್ಲಿ ರಬ್ಬರ್‌ಕೃಷಿಯನ್ನು ಮಾಡುತ್ತಿರುವುದು ವಿಶೇಷ. ಅವರು ಸುಮಾರು 22 ಎಕರೆ ಪ್ರದೇಶದಲ್ಲಿ 4500 ರಬ್ಬರ್‌ಗಿಡ ನೆಟ್ಟಿದ್ದು ಅವುಗಳಲ್ಲಿ ಸುಮಾರು 3200 ಮರಗಳು ಹಾಲು ನೀಡುತ್ತಿವೆ. ಈ ಹಾಲನ್ನು ಸಂಸ್ಕರಿಸುವ ಯಂತ್ರವನ್ನು ಇಟ್ಟುಕೊಂಡಿದ್ದಾರೆ. ಜೊತೆಗೆ, ಅದನ್ನು ವ್ಯವಸ್ಥಿತವಾಗಿ ಒಣಗಿಸಲು ಪುಟ್ಟದಾದ ಪಾಲಿಹೌಸನ್ನು ನಿರ್ಮಿಸಿಕೊಂಡಿದ್ದಾರೆ. 

 

‘ನಾನು ಬೆಳೆದಿರುವ ಎಲ್ಲಾ ಬೆಳೆಗಳು ನಿರೀಕ್ಷೆಯಷ್ಟು ಫಲ ನೀಡುತ್ತಿಲ್ಲ ಎನ್ನುವುದು ಸತ್ಯ. ಆದರೆ ಕೈತುಂಬ ಆದಾಯಕ್ಕೇನೂ ಅವು ಕೊರತೆ ಮಾಡಿಲ್ಲ. ಈ ಆದಾಯದಲ್ಲಿ ನನಗೆ ಸಂತೃಪ್ತಿ ಇದೆ’ ಎನ್ನುತ್ತಾರೆ ದೀಪಕ್‌. 

 

‘ಸಂಪೂರ್ಣ ಕೃಷಿಚಟುವಟಿಕೆಗೆ ವರ್ಷಕ್ಕೆ ಆರರಿಂದ ಏಳು ಲಕ್ಷ ಖರ್ಚು ಮಾಡುತ್ತೇನೆ. ಇಷ್ಟು ಮಾಡಿದರೂ ಮಾರುಕಟ್ಟೆಯಲ್ಲಿ ಉತ್ತಮವಾದ ದರ ಸಿಗುತ್ತದೆ ಎಂಬ ವಿಶ್ವಾಸವಿಲ್ಲ. ಇಂದು ಸಿಕ್ಕಿದ ದರ ನಾಳೆ ಸಿಗುವುದಿಲ್ಲ. ಈ ಸ್ಪರ್ಧಾತ್ಮಕ ಯುಗದಲ್ಲಿ ಕೃಷಿಕರು ಪ್ರತಿಯೊಂದು ಹಂತದಲ್ಲಿಯೂ ಸ್ಪರ್ಧೆಯನ್ನು ಎದುರಿಸುವುದು ಅನಿವಾರ್ಯವಾಗಿದೆ. ಆಯಾ ಸಂದರ್ಭಗಳಿಗೆ ಸಂಭವಿಸುವ ಅವಘಡಗಳನ್ನು ಎದುರಿಸಿ, ಕೃಷಿಯನ್ನು ಮಾಡಲೇಬೇಕು. ಒಂದಲ್ಲದಿದ್ದರೆ ಇನ್ನೊಂದು ಕೃಷಿಯಿಂದ ಆದಾಯ ಬರುವ ಸಂತೃಪ್ತಿ ನನಗಿದೆ’ ಎನ್ನುತ್ತಾರೆ ಅವರು. ಅಂದಹಾಗೆ ಇವರು ವರ್ಷಕ್ಕೆ ಎಲ್ಲಾ ಬೆಳೆಗಳಿಗೆ 18ಲಕ್ಷ ರೂಪಾಯಿವರೆಗೂ ಆದಾಯ ಗಳಿಸುತ್ತಿದ್ದಾರೆ.

 

‘ಕೃಷಿಯಲ್ಲಿ ನೆಮ್ಮದಿಯಿಂದ ಬದುಕನ್ನು ಕಟ್ಟಿಕೊಳ್ಳುವುದು ಸುಲಭವಲ್ಲ. ಪ್ರತಿಯೊಂದು ಬೆಳೆಗಳನ್ನು ಸೂಕ್ಷ್ಮವಾಗಿ ಗ್ರಹಿಸಿ, ಅದರ ಚಲನವಲನವನ್ನು ನೋಡುತ್ತಾ, ಅದಕ್ಕೆ ಬೇಕಾಗುವ ಪೋಷಕಾಂಶ, ಗೊಬ್ಬರ, ನೀರನ್ನು ಸಕಾಲದಲ್ಲಿಯೇ ನೀಡಿ ಸಂರಕ್ಷಿಸಬೇಕು. ವ್ಯವಸ್ಥಿತವಾಗಿ ಆರೈಕೆ ಮಾಡಿ ಪೋಷಿಸಿದ ಗಿಡಗಳೆಲ್ಲಾ ಫಲ ಬರುವವರೆಗೂ ಕಾಯಬೇಕು’ ಎನ್ನುವ ದೀಪಕ್‌, ‘ಕೃಷಿಯಲ್ಲಿ ತಾಳಿದವನು ಬಾಳಿಯಾನು’ ಎನ್ನುತ್ತಾರೆ.