‘ಕಬಂಧಾಸುರ’ ಬೆಂಗಳೂರು

ಸಾಗಿಬಂದ ಹಾದಿ

ಜನನ: 09ನೇ ಸೆಪ್ಟಂಬರ್, 1946

ಪರಿಚಯ: ಬೆಂಗಳೂರಿನ ಸಾಂಸ್ಕೃತಿಕ ವಲಯದಲ್ಲಿ ಸದಾ ಕ್ರಿಯಾಶೀಲರಾಗಿರುವ ಕವಿ ಬಿ.ಆರ್.ಲಕ್ಷ್ಮಣರಾವ್‌ ಸಾಹಿತ್ಯದ ಎಲ್ಲಾ ಪ್ರಕಾರಗಳಲ್ಲಿಯೂ ತೊಡಗಿಸಿಕೊಂಡವರು. ಅವರ ಕಾವ್ಯದಲ್ಲಿರುವ ತುಂಟತನ, ಗಟ್ಟಿತನ, ಮತ್ತು ಗಾಂಭೀರ್ಯ ಸಹೃದಯರ ಮನಗೆದ್ದಿದೆ. ಪ್ರೀತಿ, ಪ್ರೇಮ, ಪ್ರಣಯ, ವಿರಹದ ಭಾವಗಳಿಗೆ ಬಿಆರ್‌ಎಲ್‌ ನೀಡಿರುವ ಕಾವ್ಯಸ್ವರೂಪ ವಿಶಿಷ್ಟ. ಅನೇಕ ಧಾರಾವಾಹಿಗಳಿಗೂ ಶೀರ್ಷಿಕೆ ಗೀತೆಗಳನ್ನು ಬರೆದಿದ್ದಾರೆ.

ಗುರುಗಳಾದರು...

ಲಂಕೇಶ್ ಅವರ ಒಡನಾಟದಲ್ಲಿ ನನಗೆ ಆಗಿನ ಕನ್ನಡ ಸಾಹಿತ್ಯದ ನವ್ಯ ಪರಿಸರದ ಪರಿಚಯವಾಯಿತು. ಅನೇಕ ಮುಖ್ಯ ಲೇಖಕರು ಪರಿಚಯವಾಗಲು ಲಂಕೇಶ್ ಕಾರಣರಾದರು. ಅವರ ಮೂಲಕವೇ ವೈಎನ್ಕೆ ಪರಿಚಯವೂ ಆಯಿತು.

 

ಒಮ್ಮೆ ಲಂಕೇಶ್‌ ‘ಬಾರಯ್ಯ ‘ಪ್ರಜಾವಾಣಿ’ಗೆ ಹೋಗೋಣ’ ಅಂದರು. ಆಯಿತು ಎಂದು ಹೋದೆ. ಆಗ ವೈಎನ್ಕೆ ಅಲ್ಲಿ ಸುದ್ದಿ ಸಂಪಾದಕರಾಗಿದ್ದರು. ಅಲ್ಲಿಗೆ ಹೋದ ಮೇಲೆ ‘ಗುಂಡು  ಹಾಕೋಣವೇ’ ಎಂದು ವೈಎನ್ಕೆ ಮತ್ತು ಲಂಕೇಶ್ ಮಾತಾಡಿಕೊಂಡರು. ಆಗ ಬ್ರಿಗೇಡ್ ರೋಡ್‌ನಲ್ಲಿ ಬ್ರಿಸ್ ಅಂತ ಬಾರ್ ಇತ್ತು. ಅಲ್ಲಿಗೆ ಹೋಗಲು ನಿರ್ಧರಿಸಿದರು. ಆದರೆ, ವೈಎನ್ಕೆ ‘ಈ ಹುಡುಗ ಇದ್ದಾನಲ್ಲ’ ಎಂದು ಕೇಳಿದರು. ಆಗ ಲಂಕೇಶ್‌ ‘ಏಯ್ ಲಕ್ಷ್ಮಣ ಗುಂಡು ಹಾಕ್ತೀಯಾ’ ಎಂದು ಕೇಳಿದರು.

 

ನನಗದರ ಪರಿಚಯವಿರಲಿಲ್ಲ. ಆಗ ವೈಎನ್ಕೆ ನನ್ನನ್ನು ತಮಾಷೆ ಮಾಡಿ ‘ಓ.. ಇವನಿಗೆ  ಓನಾಮದಿಂದ ಶುರು ಮಾಡಬೇಕಲ್ಲ’ ಎಂದರು. ಹೀಗೆ ಲಂಕೇಶ್, ವೈಎನ್ಕೆ ಅವರು ನನಗೆ ಸಾಹಿತ್ಯಕ್ಕೆ ಗುಂಡಿಗೆ ಆದ್ಯ ಗುರುಗಳಾದರು.