ಸಾರ್ವಜನಿಕರ ಬಳಕೆಗೆ ಸಿಗದ ಈಜುಕೊಳ!

 

ನವನಗರದ ಜಿಲ್ಲಾ ಕ್ರೀಡಾಂಗಣದ ಆವರಣದಲ್ಲಿ ಯುವಜನ ಸೇವೆ ಹಾಗೂ ಕ್ರೀಡಾ ಇಲಾಖೆಯಿಂದ 2002ರಲ್ಲಿ ಈ ಈಜುಕೊಳ ನಿರ್ಮಿಸಲಾಗಿದೆ. ಉತ್ತರ ಕರ್ನಾಟಕ ಭಾಗದಲ್ಲಿ ಡೈವಿಂಗ್ ಅವಕಾಶ ಇರುವ ಏಕೈಕ ಈಜುಕೊಳವನ್ನು ಹೊಂದಿರುವ ಶ್ರೇಯ ಬಾಗಲಕೋಟೆ ಜಿಲ್ಲೆ ಹೊಂದಿದೆ. ಅಂತರರಾಷ್ಟ್ರೀಯ ಮಟ್ಟದ ಈಜು ಸ್ಪರ್ಧೆ ಆಯೋಜಿಸಬಹುದು ಎಂದು ಈಜುಕೊಳ ಕಟ್ಟುವಾಗಲೇ ಹೇಳಲಾಗಿತ್ತು. ಭೂಸೇನಾ ನಿಗಮ  ಈಜುಕೊಳ ಕಟ್ಟಿದೆ. ಇಲ್ಲಿನ ಸವಲತ್ತು ಅಂತರರಾಷ್ಟ್ರೀಯ ಮಟ್ಟದ್ದಾದರೂ ಗುಣಮಟ್ಟ ಮಾತ್ರ ಕಳಪೆಯಾದ ಕಾರಣ ಕೇವಲ ಒಂದೂವರೆ ದಶಕದಲ್ಲಿಯೇ ಈ ದುಃಸ್ಥಿತಿಗೆ ತಲುಪಿದೆ.

 

37 ಲಕ್ಷ ಗ್ಯಾನಲ್ ನೀರು ತುಂಬಬಹುದಾದ ಸಾಮರ್ಥ್ಯ ಹೊಂದಿರುವ ಈಜುಕೊಳದಲ್ಲಿ ಈಗ ನಿತ್ಯ 10 ಸಾವಿರ ಲೀಟರ್‌ಗೂ ಹೆಚ್ಚು ನೀರು ಸೋರಿಕೆಯಾಗುತ್ತಿದೆ. ಇದರಿಂದ ಬಕಾಸುರನ ಹೊಟ್ಟೆಗೆ ಅರೆ ಕಾಸಿನ ಮಜ್ಜಿಗೆ ಎಂಬಂತೆ ಈಜುಕೊಳದ ಒಡಲಿಗೆ ನೀರು ತುಂಬಿಸುವುದೇ ಕ್ರೀಡಾ ಇಲಾಖೆಗೆ ತಲೆನೋವಾಗಿ ಪರಿಣಮಿಸಿದೆ ಹಾಗಾಗಿ ಅದನ್ನು ಮುಚ್ಚಲಾಗಿದೆ.

 

ಹಲವು ಬಾರಿ ಸ್ಥಗಿತ: ‘ಈ ಹಿಂದೆ ನವನಗರದಲ್ಲಿ ನೀರಿನ ಸಮಸ್ಯೆಯ ಕಾರಣಕ್ಕೆ ಈಜುಕೊಳವನ್ನು ಹಲವು ಬಾರಿ ಮುಚ್ಚಲಾಗಿತ್ತು.ಮನೋಜ್‌ಜೈನ್ ಜಿಲ್ಲಾಧಿಕಾರಿಯಾಗಿದ್ದ ವೇಳೆ ಸಣ್ಣಪುಟ್ಟ ದುರಸ್ತಿ ಕಾರ್ಯ ಪೂರ್ಣಗೊಳಿಸಿ ಈಜುಕೊಳವನ್ನು ಸಾರ್ವಜನಿಕ ಬಳಕೆಗೆ ತೆರೆಯಲಾಗಿತ್ತು. ಆದರೆ ನೀರಿನ ಸೋರಿಕೆ ಜಾಸ್ತಿಯಾದ ಕಾರಣ ಕಳೆದ ಜೂನ್‌ ತಿಂಗಳಿನಿಂದ ಸ್ಥಗಿತಗೊಳಿಸಲಾಗಿದೆ’ ಎಂದು ಯುವಜನ ಸೇವೆ ಮತ್ತು ಕ್ರೀಡಾ ಇಲಾಖೆ ಸಹಾಯಕ ನಿರ್ದೇಶಕ ವಿಲಾಸ್‌ ಗಾಡಿ ಹೇಳುತ್ತಾರೆ.

 

‘ಇಲ್ಲಿ ಡೈವಿಂಗ್ ಸೌಲಭ್ಯ ಇರುವ ಕಾರಣ ಒಂದು ಭಾಗದಲ್ಲಿ ಈಜುಕೊಳ18 ಅಡಿ ಆಳ ಇದೆ. ಇನ್ನೊಂದು ಕಡೆ 4 ಅಡಿ ಇದೆ. ಇದು ಕೂಡ ಈಜುಪಟುಗಳ ಸುರಕ್ಷತೆಗೂ ಆತಂಕಕಾರಿಯಾಗಿದೆ. ಸಾಮಾನ್ಯವಾಗಿ 4ರಿಂದ 6 ಅಡಿ ನೀರು ಇದ್ದರೆ ಅಷ್ಟಾಗಿ ಸಮಸ್ಯೆಯಾಗುವುದಿಲ್ಲ. ಆದರೆ ಹೆಚ್ಚು ಆಳ ಇರುವ ಕಡೆ ಜೀವಕ್ಕೆ ಎರವಾಗುವ ಸಾಧ್ಯತೆ ಹೆಚ್ಚಾಗಿದೆ. ಹಾಗಾಗಿ ಇಲ್ಲಿ ಅವಘಡಗಳು ಘಟಿಸುತ್ತಿವೆ. ಇದೂ ಕೂಡ ಈಜುಕೊಳ ಮುಚ್ಚಲು ಪ್ರಮುಖ ಕಾರಣ’ ಎಂದು ಗಾಡಿ ಮಾಹಿತಿ ನೀಡಿದರು.

 

ಇಲ್ಲಿ ಈಜಲು ಬಂದು ಸಾವಿಗೀಡಾದ ಇಬ್ಬರಿಗೆ ಇತ್ತೀಚೆಗಷ್ಟೇ ₹ 5 ಲಕ್ಷ ಪರಿಹಾರ ನೀಡಲಾಗಿದೆ ಎಂದು ಹೇಳುವ ಅವರು, ಈಜುಕೊಳದ ಸೋರಿಕೆಯಿಂದಾಗಿ ಅದರ ನಿರ್ವಹಣೆ ವೆಚ್ಚವೇ ಮಾಸಿಕ ₹ 60 ಸಾವಿರ ಬರುತ್ತಿದೆ. ಮತ್ತೆ ಈಜುಕೊಳವನ್ನು ದುರಸ್ತಿಪಡಿಸಿ ಸಾರ್ವಜನಿಕ ಬಳಕೆಗೆ ನೀಡಲು ₹ 60ರಿಂದ 70 ಲಕ್ಷ ಅನುದಾನದ ಅಗತ್ಯವಿದೆ. ಹಣ ಕೊಡಲು ಜಿಲ್ಲಾ ಪಂಚಾಯ್ತಿಗೆ ಮನವಿ ಮಾಡಲಾಗಿದೆ ಎಂದು ಅವರು ತಿಳಿಸಿದರು.

 

**

 

**