ಕಿರಿಯನಾದರೂ ಹಿರಿದಾದ ಸಾಧನೆ

 

ಇಲ್ಲಿಯ ಎ.ಪಿ.ಎಂ.ಸಿಯಲ್ಲಿ ಹಮಾಲಿ ಕೆಲಸ ಮಾಡುವ ಫಕೀರಪ್ಪ ವದೇಗೊಳ 4.2 ಫೂಟು ಎತ್ತರವಿದ್ದು, ತನ್ನ ವಯಸ್ಸಿಗೆ ಮೀರಿ ಹಿರಿದಾದ ಸಾಹಸ ಮಾಡುತ್ತಿದ್ದಾರೆ. 38 ವರ್ಷದ ಇವರು ಶಾಲೆಯ ಮುಖವನ್ನೇ ನೋಡಿಲ್ಲ. ಬಡ ಕುಟುಂಬದಿಂದ ಬಂದಿರುವ ಇವರ ತಂದೆ ದಿವಂಗತ ಪರಸಪ್ಪ ಕೂಡಾ ಹಮಾಲಿ ಕೆಲಸ ಮಾಡುತ್ತಿದ್ದರು. ಪರಸಪ್ಪನವರ ಮೂವರು ಮಕ್ಕಳಲ್ಲಿ ಒಬ್ಬ ಮೃತಪಟ್ಟಿದ್ದು, ಮಲ್ಲಪ್ಪ ಮತ್ತು ಫಕೀರಪ್ಪ ಎ.ಪಿ.ಎಂ.ಸಿಯಲ್ಲಿ ದುಡಿಯುತ್ತಿದ್ದಾರೆ. ಇವರ ತಾಯಿ ಕೂಲಿ ಕೆಲಸ ಮಾಡುತ್ತಿದ್ದು, ಫಕೀರಪ್ಪ ಅವರ ಹೆಂಡತಿ ಮುಸುರೆ ತಿಕ್ಕುವ ಕೆಲಸ ಮಾಡುತ್ತಿದ್ದಾರೆ. ಇಬ್ಬರು ಮಕ್ಕಳನ್ನು ಓದಿಸಬೇಕೆಂಬ ಹಂಬಲದಿಂದ ಸ್ವಾಭಿಮಾನ ತೊರೆದು, ಈ ದಂಪತಿ ದುಡಿಯುತ್ತಿದ್ದಾರೆ.

 

ಪರಂಪರಾಗತವಾಗಿ ಬಂದ ಹಮಾಲಿ ಕೆಲಸ ಇವರ ಕುಟುಂಬಕ್ಕೆ ಸಿಕ್ಕ ಬಳುವಳಿ. ಸುಮಾರು 20 ವರ್ಷಗಳಿಂದ ಫಕೀರಪ್ಪ ಹಮಾಲಿ ಮಾಡುತ್ತಿದ್ದು, ಆಗಾಗ ಇವರಿಗೆ ಕಾಲು ಮತ್ತು ಸಂದುಗಳಲ್ಲಿ ನೋವು ಕಾಣಿಸುತ್ತದೆ.

 

‘ನಮ್ಗ ಮನಿ ನಡಸಾಕ್‌ ಹಮಾಲಿ ಬಿಟ್ರ ಬ್ಯಾರೆ ಕೆಲ್ಸಾ ಬರೂದಿಲ್ಲಾ. ಒಂದೊಂದ್‌ ಸಲಾ ಕೆಲಸಾ ಸಿಗೂದಿಲ್ಲಾ. ಹಂಗಾಗಿ ಭಾಳ ತ್ರಾಸ್‌ಪಟ್ಟೇವಿ. ರೈತರು ಎ.ಪಿ.ಎಂ.ಸಿಗೆ ಮಾಲು ತಂದ್ರ ಮಾತ್ರ ದಿನಕ್ಕ 200 ರಿಂದ 300 ರೂಪೈ ಕಮಾಯಿ ಆಗತೈತಿ....’ ಎನ್ನುತ್ತಾರೆ ಫಕೀರಪ್ಪ.

 

ಸಂಸಾರದ ಭಾರ ಹೊರಲು ಇವರು ಧಾನ್ಯದ ಭಾರವಾದ ಚೀಲಗಳನ್ನು ಹೊರುವುದು ಅನಿವಾರ್ಯವಾಗಿದೆ. ಸಹೋದರರ ಪೈಕಿ ಚಿಕ್ಕವನಾದ ಇವರು ಛಲದಿಂದ ಬದುಕುತ್ತಿದ್ದು, ಇವರನ್ನು ಎ.ಪಿ.ಎಂ.ಸಿ ಹಮಾಲರು ಬಲು ಅಕ್ಕರತೆಯಿಂದ ಕಾಣುತ್ತಾರೆ.