ಹೂಳು ತುಂಬಿದ ತೋರಣಗಟ್ಟಿ ಕೆರೆಗೆ ಬೇಕಿದೆ ಕಾಯಕಲ್ಪ

 

ತ್ಯಾಜ್ಯ ವಸ್ತುಗಳಿಂದ ದುರ್ನಾತ­ದಿಂದಾಗಿ ಸುತ್ತಮುತ್ತಲಿನ ಜನತೆ ಪ್ರತಿನಿತ್ಯ ತೊಂದರೆ ಅನುಭವಿ­ಸುತ್ತಿ­ದ್ದಾರೆ. ಪಟ್ಟಣ ಪಂಚಾಯ್ತಿ ಇದರ ಬಗ್ಗೆ ಕಾಳಜಿ ವಹಿಸದಿರುವುದು ಸಾರ್ವಜನಿಕರ ಅಸಮಾಧಾನಕ್ಕೆ ಕಾರಣವಾಗಿದೆ.

 

ತೋರಣಗಟ್ಟಿ ಕೆರೆ ಸಿಟಿಎಸ್ ನಕ್ಷೆಯ ಪ್ರಕಾರ 5 ಎಕರೆಗೂ ಹೆಚ್ಚು ವಿಶಾಲ ಪ್ರದೇಶ ಹೊಂದಿದೆ. ಕೆರೆಯ ಪಕ್ಕದಲ್ಲೇ ಇರುವ ಬಸ್‌ ನಿಲ್ದಾಣಕ್ಕೆ ಹೋಗುವವರು, ಕೆರೆಯಿಂದ ಬರುವ ವಾಸನೆಯನ್ನು ತಡೆದುಕೊಳ್ಳಲಾಗದೇ ಮೂಗು ಮುಚ್ಚಿಕೊಂಡು ಓಡಾಡುತ್ತಿದ್ದಾರೆ.

 

ಪಟ್ಟಣದ ಮಧ್ಯ ಭಾಗದಲ್ಲಿರುವ ತೋರಣಗಟ್ಟಿ ಕೆರೆ ಬೀಸಾಡುತ್ತಿರುವ ತಾಜ್ಯವಸ್ತುಗಳ ದುರ್ನಾತದಿಂದ ಸುತ್ತಮುತ್ತಲಿನ ಜನತೆ ಪ್ರತಿ ನಿತ್ಯ ತೊಂದರೆಯನ್ನು ಅನುಭವಿಸುತ್ತಿದೆ. ಪಟ್ಟಣವನ್ನು ಶುಚಿಯಾಗಿಡಬೇಕಾದ ಪಟ್ಟಣ ಪಂಚಾಯ್ತಿಯವರು ಇದರ ಬಗ್ಗೆ ನಿರ್ಲಕ್ಷ್ಯವಹಿಸಿರುವದು ಆಡಳಿತದ ವೈಫಲ್ಯಕ್ಕೆ ಹಿಡಿದ ಕನ್ನಡಿಯಾಗಿದೆ.

 

ಬಸ್ ನಿಲ್ದಾಣದ ಸುತ್ತಮುತ್ತಲಿರುವ ವಿವಿಧ ಅಂಗಡಿಗಳ ಮಾಲೀಕರು ಕಸ ಕಡ್ಡಿಗಳನ್ನು ಹಾಗೂ ಚಿಕನ್, ಮಟನ್, ಕಬಾಬ್ ಮಾರಾಟ ಮಾಡುವ ವ್ಯಾಪಾರಸ್ಥರು ಅಂಗಡಿ ಮುಚ್ಚುವ ಸಮಯದಲ್ಲಿ ತ್ಯಾಜ್ಯ ವಸ್ತುಗಳನ್ನು ಕೆರೆಯಲ್ಲಿ ಎಸೆಯುತ್ತಿರುವುದರಿಂದ ಇಲ್ಲಿ ಗಬ್ಬು ವಾಸನೆ ಹರಡುವಂತಾಗಿದೆ.

 

ಉತ್ತಮ ಮಳೆ ಬಿದ್ದರೆ ಕೆರೆ ತುಂಬಿ ವರ್ಷವಿಡೀ ಪಟ್ಟಣದ ರೈತರಿಗೆ ದನ ಕರುಗಳನ್ನು ತಂದು ನೀರು ಕುಡಿಸಿ ಮೈತೊಳೆಯಲು ಬಳಸಬಹುದು. ಜತೆಗೆ ಬಟ್ಟೆ ಒಗೆಯಲು ಸಹ ಕೆರೆಯ ಬಳಕೆ ಆಗುತ್ತದೆ. ಆದರೆ ಕಳೆದ ಐದು ವರ್ಷಗಳಿಂದ ಸರಿಯಾಗಿ ಮಳೆ ಬೀಳದೇ ಕೆರೆಯಲ್ಲಿ ನೀರು ಇಲ್ಲದಂತಾಗಿ ಇದು ತ್ಯಾಜ್ಯ ವಸ್ತುಗಳನ್ನು ಬಿಸಾಡುವ ತಾಣವಾಗಿ ಪರಿಣಮಿಸಿದೆ.

 

ಇದರಲ್ಲಿ ಕಸ ಕಡ್ಡಿಗಳನ್ನು ಚೆಲ್ಲಬೇಡಿ ಎಂದು ಸಂಬಂಧಿಸಿದ ಅಧಿಕಾರಿ­ಗಳಾಗಲಿ ಪಟ್ಟಣ ಪಂಚಾಯ್ತಿ­ಯವರಾಗಲಿ ಇಲ್ಲಿನ  ವ್ಯಾಪಾರಸ್ಥರಿಗೆ ನೋಟೀಸ್ ಜಾರಿಗೊಳಿಸಿಲ್ಲ. ಹೀಗಾಗಿ ತ್ಯಾಜ್ಯ ವಸ್ತುಗಳನ್ನು ಬಳಸುವುದು ಅಬಾಧಿತವಾಗಿ ಮುಂದುವರಿದಿದೆ. ಈ ಬಗ್ಗೆ ಸೂಕ್ತ ಕ್ರಮ ಕೈಗೊಳ್ಳಬೇಕೆಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ. 

 

**

 

***