ಸಾಹಿತಿ, ಸಾಹಿತ್ಯ ವಿಮರ್ಶೆಯಿಂದ ಬೆಳಕಿಗೆ

ಬಸವಕಲ್ಯಾಣ: `ಸಾಹಿತ್ಯ ವಿಮರ್ಶೆಗೆ ಒಳಗಾಗದ ಹೊರತು ಸಾಹಿತಿ ಬೆಳಕಿಗೆ ಬರಲಾರ’ ಎಂದು ಉಪನ್ಯಾಸಕ ಭೀಮಾಶಂಕರ ಬಿರಾದಾರ ಹೇಳಿದರು.
ತಾಲ್ಲೂಕಿನ ಹುಲಸೂರನಲ್ಲಿ ಮಂಗಳವಾರ ಕನ್ನಡ ಸಾಹಿತ್ಯ ಪರಿಷತ್ತಿನಿಂದ ಆಯೋಜಿಸಿದ್ದ ಕಲ್ಯಾಣ ಕರ್ನಾಟಕ ಕನ್ನಡ ಸಾಹಿತ್ಯ ಸಮ್ಮೇಳನದ ಕನ್ನಡ ಸಾಹಿತ್ಯದ ಅನನ್ಯತೆಗಳು ಗೋಷ್ಠಿಯಲ್ಲಿ ಅವರು ಯುವ ಸಾಹಿತ್ಯ ಕುರಿತು ಮಾತನಾಡಿದರು.

ಈ ಭಾಗದಲ್ಲಿ ಸಾಹಿತ್ಯ ರಚಿಸುವವರ ಕೊರತೆ ಇಲ್ಲ. ಯುವಕರಲ್ಲಿ ಈ ಬಗ್ಗೆ ಹೆಚ್ಚಿನ ಉತ್ಸಾಹ ಕಂಡು ಬರುತ್ತಿದೆ. ಆದರೆ, ಅವರ ಸಾಹಿತ್ಯ ವಿಮರ್ಶಿಸಲ್ಪಡುತ್ತಿಲ್ಲ. ಆದ್ದರಿಂದ ರಾಜ್ಯಮಟ್ಟದಲ್ಲಿ ಅವರು ಬೆಳೆಯುತ್ತಿಲ್ಲ. ಯುವ ಜನತೆ ಇತ್ತಿಚಿಗೆ ಫೇಸ್ ಬುಕ್, ವಾಟ್ಸ್ಪ್ ನಲ್ಲಿ ಬರೆಯುವ ಆನಲೈನ್ ಸಾಹಿತ್ಯ ರಚಿಸುವದಕ್ಕೆ ಉತ್ಸಾಹ ತೋರುತ್ತಿದ್ದಾರೆ. ಆಧುನಿಕ ಜಗತ್ತಿಗೆ ಹೊಂದಿಕೊಂಡು ಹೋದರೆ ಹೆಚ್ಚಿನ ಪ್ರಚಾರ ದೊರಕಬಲ್ಲದು ಎಂದರು.

ಕನ್ನಡ ಸಾಹಿತ್ಯ ಸಂಘದ ಅಧ್ಯಕ್ಷ ಶಿವಲಿಂಗ ಹೆಡೆ ಮಾತನಾಡಿ, ಪಂಪ, ರನ್ನನಿಂದ ಕುವೆಂಪು ಹಾಗೂ ಇತ್ತೀಚಿನ ಕೆಲ ಹಿರಿಯ ಸಾಹಿತಿಗಳು ಯುವಕರಿಗೆ ಪ್ರೇರಣೆ ನೀಡುವ ಸಾಹಿತ್ಯವನ್ನು ಬರೆದಿದ್ದಾರೆ. ಯಾವುದೇ ಸಾಹಿತ್ಯವಿದ್ದರೂ ಮೌಲ್ಯಯುತ ಆಗಿರಬೇಕು. ಸಮಾಜದ ಸಮಸ್ಯೆಗಳಿಗೆ ಸ್ಪಂದಿಸಬೇಕು ಎಂದರು.

ರಜಿಯಾ ಬಳಬಟ್ಟೆ ಮಹಿಳಾ ಸಾಹಿತ್ಯದ ಕುರಿತು ಮಾತನಾಡಿ, ಕನ್ನಡದಲ್ಲಿ ಮಹಿಳೆಯರಿಂದ ವಿಫುಲ ಸಾಹಿತ್ಯ ರಚನೆಯಾಗಿದೆ. ಆದರೆ, ಈ ಭಾಷೆಯ ಸಾಹಿತ್ಯಕ್ಕೆ 8 ಜ್ಞಾನಪೀಠ ಪ್ರಶಸ್ತಿಗಳು ಬಂದರೂ ಒಂದೂ ಮಹಿಳೆಯರಿಗೆ ದೊರೆತಿಲ್ಲ. ಇದನ್ನು ನೋಡಿದರೆ ಮಹಿಳಾ ಸಾಹಿತಿಗಳನ್ನು ಇನ್ನುವರೆಗೂ ಗಂಭೀರವಾಗಿ ಪರಿಗಣಿಸುತ್ತಿಲ್ಲ ಎಂಬುದು ಗೊತ್ತಾಗುತ್ತದೆ ಎಂದರು.

ಜನಪದ ಸಾಹಿತ್ಯ ಮಹಿಳೆಯರಿಂದಲೇ ಹುಟ್ಟಿಕೊಂಡಿದೆ. 12 ನೇ ಶತಮಾನದಲ್ಲಿ ಬಸವಾದಿ ಶರಣರು ಮಹಿಳೆಯರಿಗೆ ಸಮಾನ ಅವಕಾಶ ನೀಡಿ ಮಹಿಳಾ ಸಾಹಿತಿಗಳನ್ನು ಬೆಳೆಸಿದ್ದಾರೆ. ಜಯದೇವಿತಾಯಿ ಲಿಗಾಡೆ, ಗೀತಾ ನಾಗಭೂಷಣ, ನೇಮಿಚಂದ್ರ, ಸಾ.ರಾ.ಅಬೂಬಕರ್ ಕನ್ನಡ ಸಾಹಿತ್ಯದಲ್ಲಿ ಗಮನಾರ್ಹ ಕಾರ್ಯ ಮಾಡಿದ್ದಾರೆ ಎಂದರು.
ಎ.ಕೆ.ರಾಮೇಶ್ವರ ಮಾತನಾಡಿ, ಮಕ್ಕಳಲ್ಲಿ ನೈತಿಕ ಬಲವನ್ನು ತುಂಬಬಲ್ಲ ಮಕ್ಕಳ ಸಾಹಿತ್ಯ ರಚನೆ ಆಗಬೇಕು. ಶಾಲೆಗಳಲ್ಲಿ ಭವಿಷ್ಯ ಉಜ್ವಲಗೊಳಿಸುವ ಶಿಕ್ಷಣ ದೊರಕಬೇಕು ಎಂದು ಹೇಳಿದರು.

ಮಹಾದೇವಪ್ಪ, ವಿಜಯಲಕ್ಷ್ಮಿ ಇಜಾರೆ, ವೈಜನಾಥ ಕಮಠಾಣೆ, ಎಸ್.ಎಸ್.ಶಿವಣಕರ್, ವಿಜಯಕುಮಾರ ಗೌರೆ, ಜಗನ್ನಾಥ ಹಲಮಡಗೆ, ಬಾಬುರಾವ ಬಿರಾದಾರ, ಸೋಮಶೇಖರ, ವೇಣುಗೋಪಾಲ ಶೀಲವಂತ ಇವರನ್ನು ಸನ್ಮಾನಿಸಲಾಯಿತು. ಶಿವಾನಂದ ಸ್ವಾಮೀಜಿ, ಸಾಯಗಾಂವ ಶಿವಾನಂದ ದೇವರು, ಜಿಲ್ಲಾ ಪಂಚಾಯಿತಿ ಸದಸ್ಯ ಸುಧೀರ ಕಾಡಾದಿ, ಕನ್ನಡ ಸಾಹಿತ್ಯ ಪರಿಷತ್ತಿನ ಜಿಲ್ಲಾ ಘಟಕದ ಅಧ್ಯಕ್ಷ ಸುರೇಶ ಚನ್ನಶೆಟ್ಟಿ, ಎಂ.ಎಸ್.ಮನೋಹರ ಪಾಲ್ಗೊಂಡಿದ್ದರು.

ಗಡಿಗ್ರಾಮಗಳಲ್ಲಿ  ಕನ್ನಡ ಶಾಲೆಗಳ ಸ್ಥಾಪನೆಗೆ ಮನವಿ
ಬಸವಕಲ್ಯಾಣ: ತಾಲ್ಲೂಕಿನ ಗಡಿ ಭಾಗದ 15 ಗ್ರಾಮಗಳಲ್ಲಿ ಕನ್ನಡ ಶಾಲೆಗಳಿಲ್ಲ. ಆದ್ದರಿಂದ ಈ ಬಗ್ಗೆ ಕನ್ನಡ ಸಾಹಿತ್ಯ ಪರಿಷತ್ತಿನಿಂದ ಪ್ರಯತ್ನಿಸಬೇಕು ಎಂದು ಗ್ರಾಮದ ವಿವಿಧ ಸಂಘಟನೆಗಳ ಪ್ರಮುಖರಿಂದ ಕಲ್ಯಣ ಕರ್ನಾಟಕ ಸಾಹಿತ್ಯ ಸಮ್ಮೇಳನದ ವೇದಿಕೆಯಲ್ಲಿ ಕನ್ನಡ ಸಾಹಿತ್ಯ ಪರಿಷತ್ತಿನ ಜಿಲ್ಲಾ ಘಟಕದ ಅಧ್ಯಕ್ಷ ಸುರೇಶ ಚನ್ನಶೆಟ್ಟಿ ಅವರಿಗೆ ಮನವಿ ಪತ್ರ ಸಲ್ಲಿಸಲಾಯಿತು.