ಮೈಸೂರಿನ ಸರಸ್ವತಿಪುರಂ ಬಳಿ ಇರುವ ಜವರೇಗೌಡ ಉದ್ಯಾನಕ್ಕೆ ಮಿತ್ರರೊಂದಿಗೆ ಸಾಯಂಕಾಲ ವಾಯುವಿಹಾರಕ್ಕೆ ಹೋಗಿದ್ದೆ. ವಾಯುವಿಹಾರ ಮುಗಿಸಿ ಆ ಉದ್ಯಾನದ ಪ್ರವೇಶ ದ್ವಾರದ ಬಳಿ ಇರುವ ಕೆನರಾ ಬ್ಯಾಂಕಿನ ಎದುರಿನ ಚುರುಮುರಿ ಗಾಡಿಯ ಬಳಿ ಬಂದು ಚುರುಮುರಿ ತೆಗೆದುಕೊಂಡೆವು.
ಅಲ್ಲಿಯೇ ನಿಂತುಕೊಂಡು ತಿನ್ನುವ ಬದಲು ಉದ್ಯಾನದ ಪ್ರವೇಶ ದ್ವಾರದ ಪಕ್ಕ ಇರುವ ಜಗಲಿಯ ಮೇಲೆ ಕುಳಿತು ತಿನ್ನೋಣ ಎಂದು ನಾವು ಮಾತನಾಡಿಕೊಳ್ಳುವಷ್ಟರಲ್ಲಿ ಆ ಚುರುಮುರಿ ಮಾರುತ್ತಿದ್ದ ವ್ಯಕ್ತಿ ಹೇಳಿದರು: ‘ಅಲ್ಲಿ ಕುಳಿತುಕೊಂಡು ತಿನ್ನಿ. ಆದರೆ ಪೇಪರ್ ಪೊಟ್ಟಣವನ್ನು ಮಾತ್ರ ಇಲ್ಲಿಯೇ ತಂದು ಹಾಕಬೇಕು’.
ಆ ವ್ಯಕ್ತಿಯ ಪರಿಸರ ಕಾಳಜಿ ನೋಡಿ ಆತನ ಮೇಲೆ ನಮಗೆ ಅಭಿಮಾನ ಮೂಡಿತು. ನಂತರ ಆತನ ಹೆಸರೇನು ಎಂದು ವಿಚಾರಿಸಿದೆವು. ‘ಶಿವ’ ಎಂದು ತಿಳಿಯಿತು. ಸರಸ್ವತಿಪುರಂ ಬಳಿ ಹೋದವರು ನಮ್ಮ ಶಿವನನ್ನು ಭೇಟಿ ಮಾಡಿ ಅಭಿನಂದಿಸುವಿರಾ?
-ಪಿ.ಜೆ. ರಾಘವೇಂದ್ರ, ಮೈಸೂರು
