ಬೀದಿನಾಯಿ ಹಾವಳಿ: ನಾಗರಿಕರ ಆತಂಕ

ಮಂಡ್ಯ: ನಗರದಲ್ಲಿ ಬೀದಿನಾಯಿಗಳ ಹಾವಳಿ ಹೆಚ್ಚಿದ್ದು, ನಿಯಂತ್ರಿಸಬೇಕು ಎಂಬ ಕೂಗು ಸಾರ್ವಜನಿಕರಿಂದ ಹಲವಾರು ವರ್ಷಗಳಿಂದ ಕೇಳಿ ಬರುತ್ತಿದೆ.
ಆದರೆ, ನಗರಸಭೆ ಹಾವಳಿ ನಿಯಂತ್ರಿಸಲು ಮಾಡಿದ ಯತ್ನಗಳಿಗೂ ಫಲ ಸಿಗದ್ದರಿಂದ ಮುಂದೇನು ಮಾಡಬೇಕು ಎಂಬ ಗೊಂದಲದಲ್ಲಿದೆ.

ನಾಯಿಗಳನ್ನು ನಿಯಂತ್ರಿಸಬೇಕು ಎಂದು ನಗರಸಭೆಯ ಸಾಮಾನ್ಯಸಭೆ ಹಾಗೂ ಹೊರಗಡೆ ಮೂರು ವರ್ಷಗಳಿಂದ  ಜನರಿಂದ ಒತ್ತಾಯವಿದೆ.
ನಾಯಿ ಕಡಿತದಿಂದ ಆಗಾಗ ಜನರು ಆಸ್ಪತ್ರೆಗೆ ದಾಖಲಾಗುತ್ತಲೇ ಇದ್ದಾರೆ. ಪ್ರಮುಖ ರಸ್ತೆಗಳೂ ಸೇರಿ ಎಲ್ಲೆಡೆ ನಾಯಿಗಳ ಹಿಂಡು ಕಾಣಬಹುದಾಗಿದೆ.

ಕೆಲವೆಡೆ ರಸ್ತೆ ಮಧ್ಯೆ ಮಲಗಿರುತ್ತವೆ. ವಾಹನ ಸವಾರರು ಕೈಯಲ್ಲಿ ಜೀವ ಹಿಡಿದು ಚಾಲನೆ ಮಾಡುವ ಸ್ಥಿತಿ ಇದೆ. ಹೋಟೆಲ್‌ಗಳ ಮೇಲಿಲ್ಲ ನಿಯಂತ್ರಣ: ಹೋಟೆಲ್‌, ರಸ್ತೆ ಬದಿಯ ಆಹಾರದ ಅಂಗಡಿಗಳ ಮೇಲೆ ನಿಯಂತ್ರಣ ಇಲ್ಲದಿರುವುದೂ ಬೀದಿಗಳಲ್ಲಿ ನಾಯಿಗಳ ಸಂತತಿ ಹೆಚ್ಚಲು ಕಾರಣವಾಗಿದೆ.

ಸಸ್ಯಾಹಾರ, ಮಾಂಸಾಹಾರ ಮಾರುವ, ರಸ್ತೆ ಬದಿ ವ್ಯಾಪಾರಿಗಳು ರಸ್ತೆ ಬದಿಯಲ್ಲಿ ತ್ಯಾಜ್ಯ ಹಾಕುತ್ತಾರೆ. ಅದೇ ನಾಯಿಗಳಿಗೆ ಆಹಾರವಾಗಿದೆ. ಅದನ್ನು ತಿಂದ ನಾಯಿಗಳು ಆಹಾರವಿಲ್ಲದಾಗ ಜನರ ಮೇಲೆ ಮುಗಿ ಬೀಳುತ್ತಿವೆ.

ವಾಹನಗಳಿಗೆ ದುಂಬಾಲು: ಕೆಲವೆಡೆ ವಾಹನಗಳಲ್ಲಿ ಹೊರಟರೆ ಅವುಗಳ ಹಿಂದೆಯೇ ನಾಯಿಗಳು ದುಂಬಾಲು ಬೀಳುತ್ತವೆ. ದ್ವಿಚಕ್ರ ವಾಹನ ಚಾಲಕರು ಗಾಬರಿಯಾಗಿ ಬಿದ್ದಿರುವ ಉದಾಹರಣೆಗಳೂ ಸಾಕಷ್ಟಿವೆ. ಕೆಲವರು ನಾಯಿಗಳ ಹಾವಳಿಯಿಂದ ಮಾರ್ಗ ಬದಲಿಸಿದ್ದಾರೆ.

ಪಾದಚಾರಿಗಳಿಗೆ ಕಷ್ಟ:  ಮಂಡ್ಯದಲ್ಲಿ ಪಾದಚಾರಿಗಳ ಕಷ್ಟ ಹೇಳತೀರದಾಗಿದೆ. ಬಹುತೇಕರು ನಾಯಿಗಳಿವೆಯೇ ಎಂದು ನೋಡಿಯೇ ರಸ್ತೆಗಿಳಿಯಬೇಕು.
ಹಿಂಡು, ಹಿಂಡಾಗಿ ತಿರುಗುವ ನಾಯಿಗಳನ್ನು ನೋಡಿದಾಗ ಒಂದು ಕ್ಷಣ ಮನದಲ್ಲಿ ಭಯ ಮೂಡಲಿದೆ. ತಡ ರಾತ್ರಿ ಬರುವವರು ಮನೆಗಳಿಗೆ ನಡೆದು ಹೋಗದಂತಹ ಸ್ಥಿತಿ ನಿರ್ಮಾಣವಾಗಿದೆ.

ಅಸಹಾಯಕ ನಗರಸಭೆ
ಮಂಡ್ಯ:  ಬೀದಿ ನಾಯಿ ನಿಯಂತ್ರಣ ಕುರಿತು ನಗರಸಭೆಯು ಅಸಹಾಯಕ ಸ್ಥಿತಿಯಲ್ಲಿ ಇದೆ. ಎರಡು ವರ್ಷದ ಹಿಂದೆ ಕೆಲ ಬೀದಿನಾಯಿಗಳು ಸಾವನ್ನಪ್ಪಿದ್ದವು. ಆಗ ಕೆಲ ಪ್ರಾಣಿ ಪ್ರೇಮಿಗಳು, ನಗರ ಸಭೆಯಿಂದಲೇ ಹೊಡೆದು ಸಾಯಿಸಲಾಗಿದೆ ಎಂದು ಕೂಗು ಹಾಕಿದರು. ಈ ಕುರಿತು ಕೇಂದ್ರದ ಸಚಿವರಿಗೂ ದೂರು ನೀಡಲಾಯಿತು.