ಮಂಗಳೂರು: ತನ್ನ ಸದಸ್ಯರಿಂದ ಮಿತಿರಹಿತ ಅಡಿಕೆ ಖರೀದಿಸಲು ಕ್ಯಾಂಪ್ಕೊ ತೀರ್ಮಾನಿಸಿದ್ದು, ಈಗಾಗಲೇ ಖರೀದಿ ಪ್ರಕ್ರಿಯೆಗೆ ಚಾಲನೆ ನೀಡಿದೆ. ನೋಟು ರದ್ದತಿಯ ನಂತರ ಮಾರುಕಟ್ಟೆ ಧಾರಣೆಯ ಸ್ಥಿರತೆ ಕಾಯ್ದುಕೊಳ್ಳಲು, ವಾರಕ್ಕೆ ₹24ಸಾವಿರ ಮೌಲ್ಯದ ಅಡಿಕೆ ಖರೀದಿಸಲು ನಿರ್ಧರಿಸಿತ್ತು.
ನಂತರ ಇದೇ 9ರಿಂದ ಖರೀದಿಯ ಮಿತಿಯನ್ನು ತಿಂಗಳಿಗೆ 5 ಕ್ವಿಂಟಲ್‌ಗೆ ನಿಗದಿಗೊಳಿಸಿತ್ತು. ಸಂಸ್ಥೆಯ ಸದಸ್ಯರ ಅಹವಾಲು ಮತ್ತು ತೊಂದರೆಗಳನ್ನು ಪರಿಗಣಿಸಿ, ಖರೀದಿ ಮಿತಿಯನ್ನು ಹಿಂಪಡೆದಿರುವ ಕ್ಯಾಂಪ್ಕೊ, ಮಿತಿರಹಿತ ಖರೀದಿ ಮಾಡುವುದಾಗಿ ಅಧ್ಯಕ್ಷ ಎಸ್‌.ಆರ್‌. ಸತೀಶ್ಚಂದ್ರ ತಿಳಿಸಿದ್ದಾರೆ.
