ಸೋಲ್‌: ಲಂಚ ಹಗರಣವೊಂದಕ್ಕೆ ಸಂಬಂಧಿಸಿದಂತೆ ಸ್ಯಾಮ್ಸಂಗ್‌ ಸಂಸ್ಥೆಯ ಅಧ್ಯಕ್ಷರ ಮಗ ಲೀ ಜೆ ಯೊಂಗ್‌ ಅವರನ್ನು ಬಂಧಿಸಬೇಕಾಗಿದ್ದು, ಅವರ ವಿರುದ್ಧ ವಾರೆಂಟ್‌ ಜಾರಿ ಮಾಡುವಂತೆ ಸೋಮವಾರ ದಕ್ಷಿಣ ಕೊರಿಯಾದ ಸಿಯೊಲ್‌ ನ್ಯಾಯಾಲಯಕ್ಕೆ ಅಧಿಕಾರಿಗಳು ಮನವಿ ಮಾಡಿದ್ದಾರೆ.
‘ನಮ್ಮ ಮನವಿಗೆ ನ್ಯಾಯಾಲಯ ಸಮ್ಮತಿ ಸೂಚಿಸಿದರೆ ಲೀ ಅವರು ಬಂಧನಕ್ಕೊಳಗಾಗುವ ಸ್ಯಾಮ್ಸಂಗ್‌ ಸಂಸ್ಥೆಯ ಮೊದಲ ಕಾರ್ಯನಿರ್ವಹಣಾಧಿಕಾರಿಯಾಗುತ್ತಾರೆ’ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ದಕ್ಷಿಣ ಕೊರಿಯಾದ ಅಧ್ಯಕ್ಷ ಪಾರ್ಕ್‌ ಜಿಯುನ್‌ ಹೈ ವಾಗ್ದಂಡನೆಗೆ ಒಳಗಾಗಿದ್ದರು. ಪಾರ್ಕ್‌ ಅವರ ಆಪ್ತ ಚೊಯಿ ಸೂನ್‌ ಸಿಲ್‌ ಅವರು ಈ ಪ್ರಕರಣದಲ್ಲಿ ಮುಖ್ಯ ಆರೋಪಿ ಎನ್ನಲಾಗಿದೆ.
